‘Rifu Ri Ta Herisiwa’
“Rifu i nala wo hetelela la nga ta [herisiwa].” —1 VAKORINTO 15:26.
1, 2. (a) Hi wihi ntshembo lowu muapostola Pawulo a wu nyikeke lava feke? (b) Hi xihi xivutiso lexi khumbaka ku pfuxiwa ka vafi lexi Pawulo a xi hlamuleke?
“NDZA pfumela . . . eku pfukeni ka miri, ni le vuton’wini lebyi nga heriki.” Sweswo swi kumeka eka leswi vuriwaka Dyondzo ya Vaapostola. Makhatoliki ni Maprotestente swa fanela leswaku va vula marito wolawo, handle ko lemuka leswaku tidyondzo ta vona ti fana ni filosofi ya Magriki ku nga ri leswi a swi pfumela hi vaapostola. Hambiswiritano, muapostola Pawulo u kanete filosofi ya Magriki naswona a a nga pfumeli leswaku moya-xiviri a wu fi. Kambe, a a ri ni ntshembo lowu tiyeke wa ku hanya enkarhini lowu taka, naswona hi ku huhuteriwa u tsarile a ku: “Rifu i nala wo hetelela la nga ta [herisiwa].” (1 Vakorinto 15:26) Sweswo swi vula yini eka vanhu lava faka?
2 Leswaku hi kuma nhlamulo, a hi tlheleleni eka bulo ra Pawulo malunghana ni ku pfuxiwa ka vafi, leri tsariweke eka 1 Vakorinto ndzima 15. Tsundzuka leswaku eka tindzimana to rhanga, Pawulo u kombise leswaku ku pfuka ka vafi i dyondzo ya nkoka ya Vukreste. Sweswi u hlamula xivutiso xo karhi: “Nilokoswiritano, un’wana u ta ku: ‘Lava feke va ta pfuxiwa njhani? Ina, xana va ta huma hi miri wa muxaka muni?’”—1 Vakorinto 15:35.
I Miri Wa Muxaka Muni?
3. Hikwalaho ka yini van’wana va yi ala dyondzo ya ku pfuxiwa ka vafi?
3 Loko a tlakusa xivutiso lexi, swi nga ha endleka leswaku Pawulo a a lava ku lwisana ni nkucetelo wa filosofi ya Plato. Plato a a dyondzisa leswaku munhu u ni moya-xiviri lowu nga fiki lowu ponaka loko miri wu fa. Eka lava va kurisiweke hi mianakanyo yoleyo, a swi kanakanisi leswaku dyondzo ya Vukreste a yi vonaka yi nga laveki. Loko moya-xiviri wu pona rifu, xikongomelo xa ku pfuka ka vafi i yini? Ku tlula kwalaho, swi nga ha endleka leswaku dyondzo ya ku pfuka ka vafi a yi vonaka yi nga twali. Loko miri wu nghene entshurini, xana ku pfuka ku nga va kona hi ndlela yihi? Muhlamuseri wa Bibele, Heinrich Meyer u vula leswaku ku kaneta ka Vakorinto van’wana kumbexana a ku sekeriwe eka “filosofi ya leswaku ku pfuxiwa ka miri a ku koteki.”
4, 5. (a) Hikwalaho ka yini mianakanyo ya lava pfumalaka ripfumelo yi nga twali? (b) Hlamusela xifaniso xa Pawulo xa “ndzoho leyi nga riki na nchumu.” (c) Xikwembu xi va nyika mimiri ya njhani vatotiwa lava pfuxiweke?
4 Pawulo u paluxa vuhava bya mianakanyo ya vona a ku: “Wena munhu loyi a nga anakanyiki! Lexi u xi byalaka a xi hanyi loko xi nga sungulanga xi fa; naswona loko ku ri lexi u xi byalaka, a wu byali miri lowu nga ta mila, kambe u byala ndzoho leyi nga riki na nchumu, yi nga va ya koroni kumbe yin’wana ni yin’wana ya leti seleke; kambe Xikwembu xi yi nyika miri hilaha xi rhandzaka hakona, mbewu yin’wana ni yin’wana yi va ni miri wa yona n’wini.” (1 Vakorinto 15:36-38) Xikwembu a xi nga ta pfuxa mimiri leyi vanhu a va ri na yona loko va ha ri emisaveni. Kambe, a ku ta va ni ku hundzuka.
5 Pawulo u fanisa ku pfuka ka vafi ni ku mila ka mbewu. Mbewu leyitsongo ya koroni a yi fani ni ximilana lexi nga ta huma eka yona. The World Book Encyclopedia yi ri: “Loko mbewu yi sungula ku mila, yi tswonga mati yo tala. Mati ma endla leswaku mbewu yi cinca hi tindlela to tala. Nakambe ma endla leswaku leswi nga endzeni ka mbewu swi kukumuka, swi handzula xifunengeto xa mbewu.” Kahle-kahle, mbewu ya fa yi nga ha vi mbewu, yi va ximilana lexi tlhaveke. “Xikwembu xi yi nyika miri,” hi mongo wa leswaku xi veka milawu ya sayense leyi lawulaka ndlela leyi xi kulaka ha yona, naswona mbewu yin’wana ni yin’wana yi kuma miri hi ku ya hi muxaka wa yona. (Genesa 1:11) Hilaha ku fanaka, Vakreste lava totiweke va sungula va fa tanihi vanhu va nyama. Kutani, hi nkarhi lowu vekiweke wa Xikwembu, xi va tlherisela evuton’wini hi miri lowuntshwa hi ku helela. Hilaha Pawulo a byeleke Vafilipiya hakona, “Yesu Kreste . . . [u] ta pfuxeta miri wa hina lowu tsongahatiweke leswaku wu twananisiwa ni miri wakwe lowu vangamaka.” (Vafilipiya 3:20, 21; 2 Vakorinto 5:1, 2) Va pfuxiwa va ri ni mimiri ya moya kutani va hanya exivandleni xa moya.—1 Yohane 3:2.
6. Hikwalaho ka yini swi twala ku anakanya leswaku Xikwembu xi nga nyika lava pfuxiweke mimiri leyi faneleke ya moya?
6 Xana leswi swa tika ku swi tshemba? Doo! Pawulo u vula leswaku swiharhi swi ni mimiri yo hambana-hambana. Ku engetela kwalaho, u pimanisa tintsumi ta le tilweni ni vanhu va nyama ni ngati, a ku: “Ku ni mimiri ya le tilweni ni mimiri ya le misaveni.” Nakambe ku ni swivumbiwa swo hambana-hambana leswi nga hanyiki. “Tinyeleti ta hambana hi ku vangama ka tona,” ku vule Pawulo, khale swinene sayense yi nga si swi kuma leswaku ku ni tinyeleti ta wasi, tinyeleti letikulu to tshwuka ni letitsongo to basa. Hi ku ya hi leswi, xana a swi twali leswaku Xikwembu xi nga nyika vatotiwa lava pfuxiweke mimiri ya moya leyi faneleke?—1 Vakorinto 15:39-41.
7. Xana swi vula yini ku nga onhaki? ku nga fi?
7 Kutani Pawulo u ri: “Ni ku pfuka ka vafi ku tano. Wu byariwa wu ri lowu onhakaka, wu pfuxiwa wu ri lowu nga onhakiki.” (1 Vakorinto 15:42) Miri wa munhu, hambiloko a hetisekile, wa onhaka. Wu nga dlayiwa. Hi xikombiso, Pawulo u vule leswaku Yesu la pfuxiweke a nge he “vuyeli eku onhakeni.” (Mintirho 13:34) A nge he tlheli a hanya a ri emirini wa nyama lowu onhakaka, hambiloko a hetisekile. Mimiri leyi Xikwembu xi yi nyikaka vatotiwa lava pfuxiweke a yi onhaki—a yi fi kumbe ku bola. Pawulo u ya emahlweni a ku: “Wu byariwa wu ri lowu tsongahatekaka, wu pfuxiwa wu ri lowu vangamaka. Wu byariwa wu ri lowu tsaneke, wu pfuxiwa wu ri ni matimba. Wu byariwa wu ri miri wa nyama, wu pfuxiwa wu ri miri wa moya.” (1 Vakorinto 15:43, 44) Ku tlula kwalaho, Pawulo u ri: “Nchumu lowu wu faka wu fanele wu ambala ni ku ka wu nga fi.” Ku nga fi swi vula ku nga heli, vutomi lebyi nga herisekiki. (1 Vakorinto 15:53; Vaheveru 7:16) Hi ndlela leyi, lava pfuxiweke va ni “xifaniso xa lowa le tilweni,” Yesu, loyi a endleke leswaku va kuma ku pfuxiwa.—1 Vakorinto 15:45-49.
8. (a) Hi swi tivisa ku yini leswaku lava pfuxiweke va ha ri vanhu lava a va ri vona loko va ha hanya emisaveni? (b) Hi byihi vuprofeta lebyi hetisekaka loko ku pfuxiwa vanhu eku feni?
8 Ku nga khathariseki ku hundzuriwa loku, vanhu lava pfuxiweke va ha ri vanhu lava a va ri vona va nga si fa. Va ta pfuxiwa va ri ni mikhumbulo leyi fanaka ni timfanelo leti fanaka ta Vukreste ta xiyimo xa le henhla. (Malakiya 3:3; Nhlavutelo 21:10, 18) Eka mhaka leyi va tekelela Yesu Kreste. U cincile a suka eka xivumbeko xa moya a ya eka xa munhu wa nyama. Kutani a fa a tlhela a pfuxiwa a ri moya. Kambe, “Yesu Kreste i wun’we tolo ni namuntlha, ni hi masiku.” (Vaheveru 13:8) Mawaku lunghelo ro vangama swonghasi leri vatotiwa va nga na rona! Pawulo u ri: “Kambe loko nchumu lowu wu onhakaka wu ambala ku ka wu nga onhaki, ni nchumu lowu wu faka wu ambala ku ka wu nga fi, kutani ku ta endleka rito leri tsariweke, leri nge: ‘Rifu ri miteriwa makumu.’ ‘Rifu, ku hlula ka wena ku kwihi ke? Rifu, ndzhombo wa wena wu kwihi ke?’”—1 Vakorinto 15:54, 55; Esaya 25:8; Hosiya 13:14.
Xana Ku Ni Ku Pfuxiwa Ka Laha Misaveni?
9, 10. (a) Hi mongo wa 1 Vakorinto 15:24, xana “makumu” i yini, naswona hi swihi swiendlakalo leswi vaka kona malunghana na wona? (b) I yini leswi faneleke swi endleka loko rifu ri ta herisiwa?
9 Xana ku ni ntshembo wo karhi hi timiliyoni leti nga riki na wona ntshembo wo kuma vutomi bya moya lebyi nga riki na ku fa etilweni? Ina wu kona! Endzhaku ko hlamusela leswaku ku pfuxeriwa etilweni ku endleka hi nkarhi wa vukona bya Kreste, Pawulo u hlamusela swiendlakalo leswi landzelaka, a ku: “Endzhaku ku fika makumu, loko a nyiketa mfumo eka Xikwembu tlhelo Tata wa yena, loko a [herise] hulumendhe hinkwayo ni vulawuri ni vuhosi hinkwabyo.”—1 Vakorinto 15:23, 24.
10 “Makumu” i makumu ya ku Fuma ka Kreste ka Gidi ra Malembe, loko hi ku titsongahata ni hi ku tshembeka Yesu a teka Mfumo a wu nyika Xikwembu tlhelo Tata wakwe. (Nhlavutelo 20:4) Xikongomelo xa Xikwembu xa ku “hlengeleta swilo hinkwaswo nakambe eka Kreste” xi ta va xi hetisekile. (Vaefesa 1:9, 10) Kambe, Kreste u ta sungula a herisa “hulumendhe hinkwayo ni vulawuri ni vuhosi hinkwabyo” lebyi lwisanaka ni ku rhandza ka Xikwembu tanihi Hosi. Leswi a hi ndzoviso lowu endliwaka hi Armagedoni ntsena. (Nhlavutelo 16:16; 19:11-21) Pawulo u ri: “[Kreste] u fanele a va hosi ku fikela loko Xikwembu xi veke valala hinkwavo ehansi ka milenge ya yena. Rifu i nala wo hetelela la nga [ta herisiwa].” (1 Vakorinto 15:25, 26) Ina, vuthala hinkwabyo bya xidyoho xa Adamu swin’we ni rifu swi ta va swi susiwile. Kutani ke, Xikwembu xi ta va xi humese vanhu hinkwavo “eka masirha-bako ya xitsundzuxo” hi ku pfuxa vafi.—Yohane 5:28.
11. (a) Hi swi tivisa ku yini leswaku Xikwembu xi nga tlhela xi endla mimoya-xiviri leyi feke? (b) Lava pfuxeriweke emisaveni va ta nyikiwa mimiri ya njhani?
11 Leswi swi vula ku tlhela ku endliwa moya-xiviri wa munhu. Xana a swi koteki? Doo, hikuva Pisalema 104:29, 30 ya hi tiyisekisa leswaku Xikwembu xi nga swi endla sweswo: “Loko u ŝi tekela ku hefemula, ŝa hela, kutani ŝi tlhelela nṭhurini. Loko u engeta u ruma moya wa wena, ŝi v̌uyela ŝi v̌elekiwa.” Hambileswi vanhu lava pfuxiweke va nga ta va vanhu lava a va ri vona va nga si fa, a swi bohi leswaku va va ni mimiri leyi fanaka ni ya khale. Ku fana ni lava pfuxeriweke etilweni, Xikwembu xi ta va nyika miri lowu xi wu tsakelaka. A swi kanakanisi leswaku mimiri ya vona leyintshwa yi ta va leyi hanyeke kahle naswona yi nga hambani ngopfu ni mimiri ya vona yo sungula leswaku va ta kota ku voniwa hi varhandziwa va vona.
12. Xana ku pfuxeriwa emisaveni ku humelela rini?
12 Xana ku pfuxiwa ka vafi laha misaveni ku ta endleka rini? Marta, malunghana ni makwavo Lazaro, u te: “Ndza swi tiva leswaku u ta pfuka eku pfuxiweni ka lava feke hi siku ro hetelela.” (Yohane 11:24) A a swi tivisa ku yini sweswo? Ku pfuxiwa ka vafi a ku ri mhaka leyikulu esikwini ra yena, hikuva Vafarisi a va pfumela leswaku ku kona kambe Vasaduki a va nga pfumeli. (Mintirho 23:8) Nakambe, Marta a nga ha va a twile hi ta timbhoni ta le mahlweni ka Vukreste leti a ti ri ni ntshembo wa ku pfuxiwa eku feni. (Vaheveru 11:35) Nakambe, a nga ha va a swi kume eka Daniyele 12:13 leswaku ku pfuxiwa ka vafi ku ta va kona esikwini ro hetelela. A nga ha va a swi twe ni le ka Yesu hi yexe. (Yohane 6:39) ‘Siku rero ro hetelela’ ri kotlana ni ku Fuma ka Kreste ka Gidi ra Malembe. (Nhlavutelo 20:6) Anakanya leswaku nyanyuko wu ta va njhani hi “siku” rero loko xiendlakalo lexi lexikulu xi sungula!—Ringanisa Luka 24:41.
I Vamani Lava Nga Ta Vuya?
13. Hi xihi xivono xa ku pfuxiwa ka vafi lexi tsariweke eka Nhlavutelo 20:12-14?
13 Eka Nhlavutelo 20:12-14 ku tsariwe xivono xa Yohane xa ku pfuxiwa ka laha misaveni: “Ndzi vona vafi, lavakulu ni lavatsongo, va yime emahlweni ka xiluvelo, kutani ku pfuriwa tibuku-nsongwa. Kambe ku pfuriwa buku-nsongwa yin’wanyana; i buku-nsongwa ya vutomi. Kutani vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona. Kutani lwandle ri humesa vafi lava nga eka rona, rifu ni Hayidesi swi humesa vafi lava nga eka swona, kava loko munhu ni munhu a avanyisiwa hi ku ya hi swiendlo swa yena. Kutani rifu ni Hayidesi swi lahleriwa etiveni ra ndzilo. Tiva leri ra ndzilo ri vula rifu ra vumbirhi.”
14. I vamani lava nga ta va exikarhi ka lava pfuxiweke eku feni?
14 Ku pfuxiwa ku ta hlanganisa “lavakulu ni lavatsongo,” lava dumeke ni lava nga nyawuriki lava tshameke va hanya kutani va fa. Phela, ni tincece ti ta va exikarhi ka nhlayo yoleyo! (Yeremiya 31:15, 16) Eka Mintirho 24:15, ku paluxiwa mhaka yin’wana ya nkoka: “Ku ta va ni ku pfuxiwa ka lava lulameke ni ka lava nga lulamangiki.” Lava xiyekaka exikarhi ka lava “lulameke” i vavanuna ni vavasati vo tshembeka va khale, vo tanihi Avele, Enoko, Nowa, Abrahama, Sara na Rahava. (Vaheveru 11:1-40) Anakanya u ri karhi u vulavula ni vanhu vo tano kutani u kuma timhaka ta khale ta le Bibeleni leti va ti voneke hi mahlo! “Lava lulameke” va ta katsa magidi ya vanhu lava chavaka Xikwembu lava feke eminkarhini ya sweswinyana, lava a va nga ri na wona ntshembo wa le tilweni. Xana ku ni xirho xa ndyangu wa ka n’wina kumbe murhandziwa wa wena loyi a nga ha vaka a ri un’wana wa vona? Mayana ku tsakisa ka swona ku tiva leswaku u nga tlhela u va vona! Kambe ke, “lava nga lulamangiki” lava va nga ta pfuxiwa i vamani? Va katsa timiliyoni, kumbexana magidi ya timiliyoni, leti feke ti nga wu kumanga nkarhi wo dyondza ni ku tirhisa ntiyiso wa Bibele.
15. Leswaku lava pfuxiwaka va ta “avanyisiwa hi ku landza swilo leswi tsariweke eka tibuku-nsongwa” swi vula yini?
15 Xana lava pfuxiwaka va ta “avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona” hi ndlela yihi? Tibuku-nsongwa leti a hi nxaxamelo wa swiendlo swa vona swa khale; loko va fa, va ntshunxiwile eka swidyoho leswi va swi endleke loko va ha hanya. (Varhoma 6:7, 23) Hambiswiritano, vanhu lava pfuxiweke va ta va va ha ri ehansi ka xidyoho xa Adamu. Kutani ke, swi vula leswaku tibuku-nsongwa leti ti ta va ti tamele swiletelo swa Xikwembu leswi vanhu hinkwavo va faneleke va swi landzela loko va ta vuyeriwa swinene eka gandzelo ra Yesu Kreste. Loko vuthala byo hetelela bya xidyoho xa Adamu byi ta va byi susiwile, ‘rifu ri ta herisiwa’ hi ku helela. Eku heleni ka gidi ra malembe, Xikwembu xi ta va “swilo hinkwaswo eka vanhu hinkwavo.” (1 Vakorinto 15:28) Munhu a nge he lavi ku yimeriwa hi Muprista Lonkulu kumbe Mukutsuri. Vanhu hinkwavo va ta endliwa va hetiseka hilaha Adamu a ri hakona eku sunguleni.
Ku Pfuxiwa Loku Hlelekeke
16. (a) Hikwalaho ka yini swi twala ku anakanya leswaku ku pfuxiwa ka vafi ku ta va fambiselo leri hlelekeke? (b) I vamani lava swi nga ha endlekaka va va vo sungula ku pfuxiwa?
16 Tanihi leswi ku pfuxeriwa etilweni ku hlelekeke, “un’wana ni un’wana exiyin’weni xa yena,” swi le rivaleni leswaku ku pfuxeriwa emisaveni a ku nga vi loku nga hlelekangiki. (1 Vakorinto 15:23) Phela, vanhu lava ha ku pfuxiwaka va ta lava ku languteriwa. (Ringanisa Luka 8:55.) Va ta lava swakudya swa nyama naswona—xa nkoka swinene—va ta lava nseketelo wa moya leswaku va kuma vutivi bya Yehovha Xikwembu ni bya Yesu Kreste, lebyi nyikaka vutomi. (Yohane 17:3) Loko hinkwavo a vo pfuxiwa nkarhi wun’we, a swi nga ta koteka ku va langutela kahle. Swa twisiseka ku anakanya leswaku ku pfuka ka vafi ku ta endleka hakatsongotsongo. Vakreste vo tshembeka lava feke endzhakunyana ka ku hela ka mafambiselo ya Sathana kumbexana va ta va exikarhi ka lava nga ta pfuxiwa ku sungula. Nakambe hi nga langutela leswaku vavanuna vo tshembeka va khale lava nga ta va “tihosana,” va hatla va pfuxiwa.—Pisalema 45:16.
17. Hi tihi timhaka leti khumbaka ku pfuxiwa ka vafi leti Bibele yi nga vuliki nchumu ha tona, naswona hikwalaho ka yini Vakreste va nga tikarhati ngopfu hi timhaka to tano?
17 Hambiswiritano, leswi a hi fanelanga hi swi endla swi va mhaka leyikulu. Eka timhaka to tala Bibele a yi vuli nchumu. A yi vuli hi ku kongoma leswaku swilo swi ta endlekisa ku yini, rini kumbe ni ndhawu leyi ku pfuxiwa ka vanhu ku nga ta humelela eka yona. A yi hi byeli laha lava pfuxiwaka va nga ta vekiwa kona, va wundleriwa kona ni ku ambarisiwa kona. Naswona a hi nge swi koti ku vula hi ku tiyiseka leswaku Yehovha u ta ti hlela njhani timhaka to tanihi ku kurisiwa ni ku languteriwa ka vana lava pfuxiweke kumbe ndlela leyi a nga ta ti tamela ha yona timhaka tin’wana leti nga ha khumbaka vanghana va hina kumbe varhandziwa va hina. Ina, i swa ntumbuluko ku anakanya hi swilo swa muxaka wolowo; kambe ku nga ha va vuhunguki ku heta nkarhi munhu a ringeta ku hlamula swivutiso leswi enkarhini wa sweswi swi nga hlamulekiki. Sweswi hi fanele hi lwela ku tirhela Yehovha hi ku tshembeka ni ku kuma vutomi lebyi nga heriki. Vakreste lava totiweke va veka ntshembo wa vona eka ku pfuxeriwa etilweni loku vangamaka. (2 Petro 1:10, 11) “Tinyimpfu tin’wana” ti langutele ndzhaka leyi nga heriki exivandleni xa laha misaveni xa Mfumo wa Xikwembu. (Yohane 10:16; Matewu 25:33, 34) Malunghana ni vuxokoxoko byo tala hi ku pfuxiwa ka vafi lebyi nga tiviwiki, hi fanele hi rindzela Yehovha. Vumundzuku bya hina lebyi tsakisaka byi hlayisekile emavokweni ya Loyi a nga ‘enerisaka ku navela ka xivumbiwa xin’wana ni xin’wana lexi hanyaka.’—Pisalema 145:16; Yeremiya 17:7.
18. (a) Hi kwihi ku hlula loku Pawulo a ku kandziyisaka? (b) Hikwalaho ka yini hi tshemba swinene ku pfuxiwa ka vafi?
18 Pawulo u gimeta mhaka ya yena hi ku vula a ku: “A ku nkhensiwe Xikwembu, hikuva xi hi nyika ku hlula hi Hosi ya hina Yesu Kreste!” (1 Vakorinto 15:57) Ina, rifu leri vangiweke hi Adamu ri hluriwa hi gandzelo ra nkutsulo ra Yesu Kreste, naswona vatotiwa ni “tinyimpfu tin’wana” va hlanganyela eka ku hlula koloko. Ina, “tinyimpfu tin’wana” leti hanyaka namuntlha ti ni ntshembo lowu nga wa xitukulwana lexi ntsena. Tanihi xiphemu xa “ntshungu lowukulu” lowu yaka wu andza, ti nga ha pona “nhlomulo lowukulu” lowu taka naswona ti nga ha fi hi tlhelo ra nyama! (Nhlavutelo 7:9, 14) Hambiswiritano, hambi lava va faka hikwalaho ka “nkari ni khombo” kumbe hikwalaho ka malandza ya Sathana, va nga veka ntshembo wa vona eka ku pfuxiwa ka vafi.—Eklesiasta 9:11.
19. Hi xihi xikhutazo lexi Vakreste hinkwavo va faneleke va xi yingisa namuntlha?
19 Hikwalaho ke, hi rindzele siku rero leri vangamaka hi mahlo-ngati, leri ha rona rifu ri nga ta herisiwa. Ku tshemba ka hina xitshembiso xa Yehovha xa ku pfuxiwa ka vafi handle ko kanakana ku hi endla hi languta swilo hi ndlela leyinene. Ku nga khathariseki leswaku hi weriwa hi yini eka vutomi bya sweswi—hambiloko ho fa—a xi kona lexi nga hi tekelaka hakelo leyi Yehovha a yi tshembiseke. Hikwalaho, xikhutazo xa Pawulo xo hetelela eka Vakorinto xa fanela namuntlha hilaha a xi ri hakona eka malembe ya magidi mambirhi lama hundzeke: “Hikwalaho, vamakwerhu lava rhandzekaka, tserhamani, mi nga tsekatsekisiwi, nkarhi hinkwawo mi va ni swo tala swo swi endla entirhweni wa Hosi, mi ri karhi mi tiva leswaku ntirho wa n’wina a hi wa hava eHosini.”—1 Vakorinto 15:58.
U Nga Hlamusela Xana?
◻ Xana Pawulo u xi hlamurise ku yini xivutiso xa mimiri leyi vatotiwa va nga ta va na yona loko va pfuxiwile eku feni?
◻ Xana rifu ri ta hetelela ri herisiwe njhani naswona rini?
◻ I vamani lava nga ta katsiwa eku pfuxiweni ka laha misaveni?
◻ Hi rihi langutelo leri hi faneleke hi va na rona malunghana ni timhaka leti Bibele yi nga vuliki nchumu ha tona?
[Xifaniso lexi nga eka tluka 20]
Mbewu ya “fa” hi ku langutana ni ku cinca lokukulu
[Swifaniso leswi nga eka tluka 23]
Vavanuna ni vavasati vo tshembeka va khale, vo tanihi Nowa, Abrahama, Sara na Rahava, va ta va exikarhi ka lava pfuxiwaka eku feni
[Xifaniso lexi nga eka tluka 24]
Ku pfuxiwa ka vafi ku ta va nkarhi lowu tsakisaka swinene!