Nkoka Lowu Nga Erivaleni Wa Mahungu Lamanene Endhawini Ya Ka N’wina
Eka misava leyi ya manguva lawa hakanyingi hi twa ku vuriwa mianakanyo leyi: “Milawu ya Vukriste a hi leyi olovaka. Yi nga ka yi nga tirhi eka vandla ra namuntlha leri rharhanganeke.” Hambi swi ri tano, eku vulavurisaneni loku vikiweke exikarhi ka murhangeri wa Mahindu, Mohandas K. Gandhi ni khale ka museketeri wa Hosi ya Manghezi wa le India, Lord Irwin, ku kombisiwe mianakanyo leyi hambaneke. Lord Irwin u vutise Gandhi leswi a voneke swi ri swona swi nga tlhantlhaka swiphiqo exikarhi ka Great Britain na India. Gandhi u teke Bibele kutani a pfula eka ndzima ya vuntlhanu ya Matewu ivi a ku: “Loko tiko ra ka n’wina ni ra ka hina mo hlangana eka tidyondzo leti andlariweke hi Kriste eka Dyondzo leyi ya le Ntshaveni, hi ta va hi tlhantlhile swirhalanganya, hayi swa matiko ya hina ntsena kambe ni swa misava hinkwayo.”
Dyondzo yoleyo yi vulavula hi ku lava vumoya, ku va la rhuleke, la lamulaka, la nga ni tintswalo, la rhandzaka leswo lulama. A yi soli ku dlaya ntsena kambe ni ku hlundzukela van’wana; hayi vuoswi ntsena kambe ni ku navela loko biha. Yi lwisana ni swiendlo swo dlaya vukati swi nga fanelanga leswi hahlulaka mindyangu ni ku karhata vana. Ya hi byela: ‘Rhandza ni lava ku vengaka, u phamela lava pfumalaka, u tshika ku avanyisa van’wana hi ndlela leyi pfumalaka tintswalo, u khoma van’wana hi ndlela leyi u lavaka ku khomiwa ha yona.’ Switsundzuxo leswi hinkwaswo, loko swi tirhisiwa, swi ta humesa mimpfuno leyi hlamarisaka. Loko vanhu lava yi tirhisaka endhawini ya ka n’wina va tala, hi kona ndhawu ya ka n’wina yi vaka leyi antswaka!
Timbhoni ta Yehova ti ni nkucetelo emhakeni leyi. Bibele yi va dyondzisa ku xixima vukati. Vana va vona va leteriwa hi misinya ya milawu leyinene. Nkoka wa ndyangu wa kandziyisiwa. Mindyangu leyi nga ni vun’we i nkateko endhawini ya ka n’wina, hambi ku ri eka rixaka ra ka n’wina. Matimu ma tele hi swikombiso swa mimfumo ya misava leyi waka loko swiboho swa ndyangu swi tsanile ni loko vuhunguki byi andzile. Loko vanhu ni mindyangu leyi Timbhoni ta Yehova ti yi kucetelaka ku hanya hi misinya ya milawu ya Vukriste va andza, ku ta va ni ku ehla ka ku lutla ka vana, vuhunguki ni vugevenga endhawini ya ka n’wina!
Xin’wana xa swirhalanganya leswikulu leswi hlaselaka vanhu ni matiko i ku langutelana ehansi ka tinxaka. Ku hambana ni sweswo, muapostola Petro u te: “Ndza twisisa swinene sweswi leswaku Xikwembu a xi yi hi nghohe ya vanhu; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” Pawulo na yena u tsarile a ku: “A ku na Muyuda kumbe Mugriki, a ku na hlonga kumbe muntshunxeki, a ku na wanuna kumbe wansati, hikuva hinkwenu mi un’we eka Kriste Yesu.” (Mintirho 10:34, 35; Vagalatiya 3:28) Timbhoni ta Yehova ta swi amukela leswi. Tinxaka hinkwato ni mihlovo hinkwayo va tshama ni ku tirha kun’we eyindlu-nkulu ya vona ya misava, eka marhavi ni le mabandlheni.
EAfrika tinxaka tin’wana a ti swi koti ku hlangana ti nga lwi. Hambi swi ri tano, etinhlengeletanweni ta Timbhoni ta Yehova kwalaho, vanhu lava humaka eka tinxaka to tala leti hambaneke va dya ni ku etlela ni ku gandzela kun’we hi ku twanana loku heleleke ni xinakulobye lexi kufumelaka. Vatirhela-mfumo va hulumendhe va hlamala loko va vona leswi. Xikombiso xa ku hlanganisa ka Vukriste bya ntiyiso xi hlamuseriwe hi Amsterdam News ya le New York ya August 2, 1958. Marito ya kona ma susumetiwe hi ku xiya nhlengeletano ya matiko hinkwawo ya Timbhoni leyi vuriweke emahlweninyana—leyi a yi ri eMutini wa New York laha a ku hlengeletane vanhu lava tlulaka kotara ya miliyoni.
“Kwihi na kwihi Manegro, valungu ni va le Vuxeni, va vutomi hinkwabyo lebyi hambaneke ni va le swiphen’wini hinkwaswo swa misava, va hlangane hi ntsako na hi ku ntshunxeka. . . . Timbhoni leti gandzelaka to huma ematikweni ya 120 ti tshame swin’we ni ku gandzela swin’we hi ku rhula, ti komba Maamerika ndlela leyi swi nga endliwaka hi ku olova ha yona. . . . Nhlengeletano i xikombiso lexi vangamaka xa hi laha vanhu va nga tirhaka ni ku tshama swin’we ha kona.”
Vo tala va nga vula leswaku milawu ya Vukriste a yi olovi eka misava leyi ya namuntlha. Kambe, i yini xin’wana lexi tirheke, kumbe lexi nga ta tirha ke? Milawu ya Vukriste yi nga va ya nkoka wa xiviri loko yo tirhisiwa endhawini ya ka n’wina sweswi, naswona yi ta va xisekelo xo hlanganisa hinkwawo ‘matiko, tinxaka ni vanhu’ emisaveni hinkwayo ehansi ka vulawuri bya Mfumo wa Xikwembu ehenhla ka vanhu.—Nhlavutelo 7:9, 10.
[Marito lama tshahiweke exihlokweni lama nga eka tluka 24]
Va tinxaka ni mihlovo hinkwayo va tirha kun’we
[Marito lama tshahiweke exihlokweni lama nga eka tluka 24]
Vukriste bya olova. I yini xin’wana lexi tirheke?