Leswi Mahungu Lamanene Ma Pfunaka Swona Endhawini Ya Ka N’wina
NAMUNTLHA hi tala ku twa vanhu va ku: “Milawu ya Vukreste a yi pfuni nchumu. Yi nga ka yi nga tirhi eka vanhu va namuntlha lava xiyimo xa vona xi rharhanganeke.” Hambiswiritano, bulo leri vikiweke exikarhi ka murhangeri wa Mahindu, Mohandas K. Gandhi ni khale ka Muyimeri wa Manghezi le Indiya, Lord Irwin, ri kombise mianakanyo leyi hambaneke. Ku vuriwa leswaku Lord Irwin u vutise Gandhi leswi a voneke swi ri swona swi nga tlhantlhaka swiphiqo exikarhi ka Great Britain na Indiya. Gandhi u teke Bibele kutani a pfula eka ndzima ya vuntlhanu ya Matewu ivi a ku: “Loko tiko ra ka n’wina ni ra ka hina mo tirhisa tidyondzo leti andlariweke hi Kreste eka Dyondzo leyi ya le Ntshaveni, hi ta va hi tlhantlhe swirhalanganya, hayi swa matiko ya hina ntsena, kambe ni swa misava hinkwayo.”
Dyondzo yoleyo yi vulavula hi ku khathala hi timhaka ta moya, ku va ni moya wo rhula, ku va ni tintswalo ni ku rhandza leswo lulama. A yi soli ku dlaya ntsena kambe ni ku hlundzukela van’wana, a yi soli vuoswi ntsena kambe ni ku ehleketa kunene ha byona. Yi lwisana ni swiendlo swo dlaya vukati swi nga fanelanga, leswi hahlulaka mindyangu ni ku cinisa vana gija. Ya hi byela: ‘Rhandza ni lava ku vengaka, u phamela lava pfumalaka, u tshika ku avanyisa van’wana hi ndlela leyi pfumalaka tintswalo, u khoma van’wana hi ndlela leyi u lavaka ku khomiwa ha yona.’ Switsundzuxo leswi hinkwaswo, loko swi tirhisiwa, swi ta va ni vuyelo lebyinene. Loko vanhu va ndhawu ya ka n’wina va ya va swi tirhisa, ndhawu ya ka n’wina yi ta ya yi antswa!
Timbhoni ta Yehovha i xikhutazo lexinene emhakeni leyi. Bibele yi ti dyondzisa ku xixima vukati. Vana va tona va leteriwa hi misinya ya milawu leyinene. Nkoka wa ndyangu wa kandziyisiwa. Mindyangu leyi nga ni vun’we i nkateko endhawini ya ka n’wina, hambi ku ri eka rixaka ra ka n’wina. Matimu ma tele hi swikombiso swa mimfumo ya misava leyi waka loko vuxaka bya ndyangu byi tsekatseka ni loko mahanyelo yo biha ma andzile. Loko vanhu ni mindyangu leyi Timbhoni ta Yehovha ti yi tsundzuxaka ku hanya hi misinya ya milawu ya Vukreste va andza, ku ta va ni ku hunguteka ka milutlo, ku tikhoma ko biha ni vugevenga endhawini ya ka n’wina.
Xin’wana xa swirhalanganya leswikulu leswi hlaselaka vanhu ni matiko i xihlawuhlawu xa rixaka. Ku hambana ni sweswo, muapostola Petro u te: “Ndza swi xiya leswaku Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” Pawulo na yena u tsale a ku: “A ku na Muyuda kumbe Mugriki, a ku na hlonga kumbe munhu la ntshunxekeke; a ku na wanuna kumbe wansati; hikuva hinkwenu mi munhu un’we evun’weni na Kreste Yesu.” (Mintirho 10:34, 35; Vagalatiya 3:28) Timbhoni ta Yehovha ta swi amukela leswi. Vanhu va tinxaka ni mivala hinkwayo va tshama ni ku tirha swin’we eyindlu-nkulu ya tona ya misava hinkwayo, emarhavini ni le mavandlheni.
EAfrika tinxaka tin’wana ti hanya bya kondlo ni ximanga. Hambiswiritano, etinhlengeletanweni ta Timbhoni ta Yehovha kwalaho, vanhu lava humaka eka tinxaka to tala leti hambaneke va dya swin’we, va etlela endhawini yin’we ni ku gandzela swin’we hi ku twanana loku heleleke ni hi xinakulobye lexikulu. Vatirhela-mfumo va hlamala loko va vona leswi. Xikombiso xa vuyelo bya vun’we bya Vukreste bya ntiyiso xi hlamuseriwe hi Amsterdam News ya le New York ya August 2, 1958. Nhlamuselo ya kona yi susumetiwe hi ku xiya nhlengeletano ya matiko hinkwawo ya Timbhoni leyi boxiweke hala henhla, leyi a yi ri eDorobeni ra New York, laha a ku hlengeletane vanhu lava tlulaka kotara ya miliyoni.
“Kwihi na kwihi Manegro, valungu ni va le Vuxeni, va swiyimo hinkwaswo ni va le swiphen’wini hinkwaswo swa misava, va hlangane hi ntsako na hi ku ntshunxeka. . . Timbhoni leti gandzelaka to huma ematikweni ya 120 ti tshame swin’we ni ku gandzela swin’we hi ku rhula, ti komba Maamerika ndlela leyi swi nga endliwaka hi ku olova ha yona. . . . Nhlengeletano leyi i xikombiso lexi nga erivaleni xa ndlela leyi vanhu va nga tirhaka ni ku tshama swin’we ha yona.”
Vo tala va nga vula leswaku milawu ya Vukreste a yi pfuni eka misava leyi ya namuntlha. Kambe, i yini xin’wana lexi tirheke, kumbe lexi nga ta tirha? Milawu ya Vukreste yi nga pfuna swinene loko yo tirhisiwa endhawini ya ka n’wina sweswi, naswona yi ta va xisekelo xo hlanganisa ‘matiko, tinxaka ni vanhu’ hinkwavo emisaveni, ehansi ka vulawuri bya Mfumo wa Xikwembu lowu nga ta fuma vanhu.—Nhlavutelo 7:9, 10.
[Marito lama tshahiweke exihlokweni lama nga eka tluka 23]
Vanhu va tinxaka ni mivala hinkwayo va tirha kun’we
[Marito lama tshahiweke exihlokweni lama nga eka tluka 24]
Vukreste bya tirha. I yini xin’wana lexi tirheke?