Ndzima 4

U Tikile Kambe A Nga Tekiwanga

MARIYA u le ka n’hweti ya yena ya vunharhu ya ku tika. U ta tsundzuka leswaku u hete xiphemu xo sungula xa ku tika ka yena a endzele Elizabeta, kambe sweswi u tlhelele ekaya eNazareta. Hi ku hatlisa xiyimo xa yena xi ta va erivaleni xi tiviwa emutini wa ka vona. Entiyisweni u le ka xiyimo lexi khomisaka gome!

Lexi endlaka leswaku xiyimo xi va lexi tikaka hi leswi Mariya a tshembiseke ku va nsati wa Yosefa wa muvatli. Naswona u tiva leswaku ehansi ka nawu wa Xikwembu eIsrayele, wansati la tshembisaka wanuna kambe hi ku tirhandzela a va ni vuxaka bya rimbewu ni nuna un’wana u fanele a khandliwa hi maribye a fa. Xana u ta ku hlamusela njhani ku tika ka yena eka Yosefa?

Tanihi leswi Mariya a a fambile tin’hweti tinharhu, hi nga tshemba leswaku Yosefa u navela ku n’wi vona. Loko va hlangana, kumbexana Mariya u n’wi byela timhaka. A nga ha endla kahle ku hlamusela leswaku ku hikwalaho ka moya wa Xikwembu lowo kwetsima leswi a tikeke. Kambe, hi laha u nga anakanyaka ha kona, lowu i nchumu wo tika ngopfu eka Yosefa ku wu pfumela.

Yosefa u tiva ndhuma leyinene leyi Mariya a nga na yona. Naswona entiyisweni wa n’wi rhandza swinene. Hambi swi ri tano, ku nga khathariseki leswi a nga ta swi vula, swi vonaka onge u tikise hi wanuna un’wana. Hambi swi ri tano, Yosefa a nga lavi leswaku a khandliwa a fa kumbe ku nyumisiwa erivaleni. Kutani u ehleketa ku n’wi thala exihundleni. Emasikwini wolawo, vanhu lava tshembisaneke a va tekiwa tanihi lava tekaneke, naswona ku thala a ku laveka leswaku ku herisiwa ku tshembisana.

Endzhakunyana, loko Yosefa a ha ya emahlweni a xiya timhaka leti, u ya eku etleleni. Ntsumi ya Yehova yi humelela eka yena enorhweni kutani yi ku: “U nga chavi ku titekela Mariya nsati wa wena, hikuva leswi a nga na swona swi huma eka moya lowo kwetsima; ú ta veleka n’wana wa mufana, kutani wena u ta n’wi thya vito ra Yesu, hikuva hi yena loyi a nga ta ponisa tiko rakwe eswidyohweni swa rona.”

Loko Yosefa a pfuka, vona ntsako lowu a nga na wona! Handle ko dya nkarhi u endla leswi ntsumi yi n’wi leriseke ku swi endla. U teka Mariya a ya ekaya ka yena. Entiyisweni, xiendlo lexi xa le rivaleni xi tirha tanihi nkhuvo wa vukati, lexi nyikaka mfungho wa leswaku Yosefa na Mariya sweswi va tekane ximfumo. Kambe Yosefa a nga vi na vuxaka bya rimbewu na Mariya tanihi leswi a tikeke Yesu.

Vonani! Mariya wa tikiwa hi n’wana, hambi swi ri tano, Yosefa u n’wi khandziyisa mbhongolo. Va ya kwihi, naswona ha yini va teka riendzo loko Mariya a ri ekusuhi na ku veleka? Luka 1:39-41, 56; Matewu 1:18-25; Deuteronoma 22:23, 24.

▪ Yosefa u ehleketa yini loko a vona leswaku Mariya u tikile naswona ha yini?

▪ Yosefa a a ta n’wi tharisa ku yini Mariya loko va nga si tekana?

▪ I xiendlo xihi xa le rivaleni lexi tirheke tanihi nkhuvo wa vukati wa Yosefa na Mariya?