Mariya—u Tikile Kambe A Nga Tekiwanga

Mariya u khoma n’hweti ya vumune a tikile. Tsundzuka leswaku eka tin’hweti takwe to sungula a tikile, a a endzele xaka rakwe Elizabeta eswintshabyanini swa Yudiya hi tlhelo ra le dzongeni. Kambe sweswi Mariya u tlhelele ekaya eNazareta. Ku nga ri khale vanhu va ta swi vona leswaku u tikile. A swi kanakanisi leswaku xiyimo lexi a xi n’wi dyisi byi rhelela!

Leswi endlaka swi tika swinene hi leswaku u tshembisiwe vukati hi Yosefa lowa muvatli, loyi va tshamaka emugangeni wun’we. Naswona Mariya wa swi tiva leswaku hi ku ya hi Nawu lowu Xikwembu xi wu nyikeke Vaisrayele, loko wansati loyi a tshembisiweke vukati a etlela ni wanuna un’wana hi ku swi rhandza, u fanele a khandliwa hi maribye a fa. (Deteronoma 22:23, 24) Hambileswi Mariya a nga ti khomanga ku biha hi swa masangu, wa ti vutisa leswaku leswi a nga tika u ta yi hlamusela njhani mhaka leyi eka Yosefa naswona ku ta endleka yini.

Leswi Mariya a a nga ri kona ku ringana tin’hweti tinharhu, a swi kanakanisi leswaku Yosefa u navela ku n’wi vona. Loko va hlangana kumbexana Mariya u hlamusela Yosefa hi ta ku tika kakwe ni leswaku u tike hikwalaho ka moya lowo kwetsima wa Xikwembu. Hilaha u swi vonaka hakona mhaka leyi i tlakula va xurhe eka Yosefa leswaku a yi twisisa ni ku yi tshemba.

Yosefa wa swi tiva leswaku Mariya i wansati lonene ni leswaku u ni ndhuma leyinene. Naswona wa n’wi rhandza swinene. Ku nga khathariseki leswi Mariya a n’wi byelaka swona, swi tikomba onge Yosefa u pfumela leswaku Mariya u tike hi leswi a etleleke ni wanuna un’wana. Yosefa a nga swi lavi leswaku Mariya a khandliwa hi maribye a fa kumbe ku n’wi khomisa tingana evanhwini, hikwalaho u endla xiboho xo n’wi tshika exihundleni. Emikarhini yoleyo, vanhu lava tshembisaneke ku tekana a va langutiwa tanihi vanhu lava tekaneke naswona a swi lava leswaku va dlaya vukati leswaku va herisa xitshembiso lexi va xi endleke.

Endzhaku ka sweswo, Yosefa u ya eku etleleni a ri karhi a gayela hi mhaka leyi. Hiloko ntsumi ya Yehovha yi humelele eka yena enorhweni, yi ku: “U nga chavi ku teka Mariya nsati wa wena u famba na yena ekaya, hikuva ku tika kakwe ku vangiwe hi moya lowo kwetsima. Mariya u ta veleka n’wana wa jaha, wena u ta n’wi thya vito ra Yesu, hikuva u ta ponisa vanhu vakwe eswidyohweni swa vona.”—Matewu 1:20, 21.

Loko Yosefa a pfuka, u tsakile leswi se a yi twisisaka kahle mhaka leyi! U namba a endla leswi ntsumi yi n’wi byeleke swona. U teka Mariya a n’wi yisa ekaya. Lexi i xiendlo xa le rivaleni xa nkhuvo wa vukati lexi kombisaka leswaku Mariya na Yosefa se i vanhu lava tekaneke. Nilokoswiritano, Yosefa a nga etleli na yena Mariya loko a ha tike Yesu.

Endzhaku ka tin’hweti, Yosefa na Mariya loyi se a nga ekusuhi ni ku veleka, va fanele va tilulamisela ku teka riendzo ra ku suka ekaya ka vona eNazareta. Va fanele va ya kwihi hi nkarhi lowu Mariya a nga ekusuhi ni ku veleka?