Ndzima 5

Ku Velekiwa Ka Yesu—Kwihi Naswona Rini?

MUFUMI wa Mfumo wa Rhoma, Khezari Awugusto, u lerise leswaku un’wana ni un’wana u fanele ku tlhelela ekaya ra laha a velekiweke kona leswaku a ta tsarisiwa. Kutani Yosefa u ya endhawini leyi a tswaleriweke eka yona, muti wa Betlehema.

Vanhu vo tala va le Betlehema leswaku va tsarisiwa, naswona ndhawu leyi Yosefa na Mariya va nga yi kumaka ku tshama ka yona ntsena hi le xitaleni. Laha, laha timbhongolo ni swifuwo swin’wana swi tshamaka kona, Yesu u velekiwa kona. Mariya u n’wi phutsela hi tinguvu kutani a n’wi lata exidyelweni, ndhawu leyi khomaka swakudya swa swifuwo.

Entiyisweni a ku ri nkongomiso wa Xikwembu wa leswaku Khezari Awugusto a endla nawu wa ku tsarisiwa. Leswi swi endle swi koteka leswaku Yesu a velekeriwa eBetlehema, tiko leri Matsalwa ya vhumbeke khale leswaku yi ta va ndhawu yo velekela mufumi la tshembisiweke.

Vona nkoka wa vusiku lebyi! Enhoveni ku vonakala lokukulu ka voninga eka ntlawa wa varisi. I ku dzuneka ka Yehova! Naswona ntsumi ya Yehova ya va byela yi ku: “Mi nga chavi! Vonani, ndzi mi tivisa mahungu lamanene lama nga ta tsakisa tiko hinkwaro swinene; hi leswaku namuntlha hi velekeriwe mulondzovoti emutini wa Davhida; i Kriste hosi. Xikombiso eka n’wina hi lexi. Mi ta kuma xihlangi lexi phutseriweke hi nguvu, xi latiwile exitsengelweni.” Xikan’we-kan’we tintsumi to tala ta humelela kutani ti yimbelela ti ku: “Ku dzuneka a ku ve eka Xikwembu ematilweni ya le henhla-henhla, ku rhula a ku ve emisaveni eka vanhu lava xi tsakelaka.”

Loko tintsumi ti suka, varisi va byelana va ku: “A hi yeni eBetlehema, hi ya vona leswi humeleleke kona, leswi [Yehova a] nga hi tivisa swona.” Kutani va famba hi ku hatlisa ku ya kona kutani va kuma Yesu laha tintsumi ti va byeleke leswaku va ta n’wi kuma kona. Loko varisi va hlamusela leswi ntsumi yi va byeleke swona, hinkwavo lava swi twaka va hlamala. Mariya u hlayisa swilo leswi vuriwaka kutani a tsaka embilwini ya yena.

Vanhu vo tala namuntlha va tshemba leswaku Yesu u velekiwe hi December 25. Kambe December i nguva ya timpfula, leyi titimelaka eBetlehema. Varisi a va nga ta ya enhoveni na vusiku ni mintlhambi hi nkarhi wolowo wa lembe. Nakambe, Khezari wa Rhoma kumbexana a nga ta swi lava leswaku vanhu lava ana se a va lava ku n’wi hundzukela va teka maendzo hi xixika ku ya tsarisiwa. Entiyisweni Yesu u velekiwe kwalomu ka ku sungula ka xixikani xa lembe. Luka 2:1-20; Mikea 5:2.

▪ Ha yini Yosefa na Mariya va ya eBetlehema?

▪ I nchumu wihi wo tsakisa lowu humelelaka evusikwini lebyi Yesu a velekiwaka ha byona?

▪ Hi swi tivisa ku yini leswaku Yesu a nga velekiwanga hi December 25?