Yesu U Velekiwe Kwihi Naswona Rini?

Khezari Awugusto mufumi wa Mfumo wa Rhoma, u lerise leswaku vanhu hinkwavo va fanele va tsarisiwa. Hikwalaho Yosefa na Mariya va fanele va teka riendzo va ya emutini lowu Yosefa a velekiweke eka wona, ku nga muti wa Betlehema lowu nga edzongeni wa Yerusalema.

Vanhu vo tala va te eBetlehema leswaku va ta tsarisiwa. Ndhawu leyi Yosefa na Mariya va yi kumaka leswaku va tshama eka yona, hile xivaleni xa tihanci ni swifuwo swin’wana ntsena. Hi kona laha Yesu a velekiwaka kona. Mariya u n’wi phutsela hi malapi kutani a n’wi lata exidyelweni, ku nga nchumu lowu swifuwo swi dyelaka eka wona.

Swi nga ha endleka leswaku Xikwembu hi xona xi endleke leswaku Khezari Awugusto a veka nawu wolowo wo tsarisa vanhu. Hikwalahokayini? Hikuva swi endle leswaku swi koteka ku Yesu a velekiwa eBetlehema, kaya ra kokwa wakwe Hosi Davhida. Matsalwa a ma profete khale leswaku emutini wolowo a ku ta velekiwa Hosi leyi tshembisiweke.—Mikiya 5:2.

Hakunene lebyi i vusiku bya nkoka! Le nhoveni, ku ni ku vonakala loku rhendzelaka ntlawa wa varisi. I ku vangama ka Yehovha! Yin’wana ya tintsumi ta Yehovha yi byela varisi yi ku: “Mi nga chavi, yingisani, ndzi mi byela mahungu lamanene lama nga ta tisa ntsako lowukulu eka vanhu hinkwavo. Hikuva namuntlha mi velekeriwe muponisi emutini wa Davhida, loyi a nga Kreste Hosi. Xikombiso xa n’wina hi lexi: Mi ta kuma n’wana a phutseriwe hi malapi, a latiwe exidyelweni.” Hi ku hatlisa ku humelela tintsumi tin’wana to tala ti ku: “Dzunisani Xikwembu lexi nga ematilweni, naswona lava xi va rhandzaka emisaveni va ta va ni ku rhula.”—Luka 2:10-14.

Loko tintsumi ti famba, varisi va byelana va ku: “A hi yeni eBetlehema, hi ya vona leswi nga endleka hilaha Yehovha a hi tiviseke hakona.” (Luka 2:15) Hiloko va hatlisa kutani va fika va kuma Yesu loyi a ha ri ricece laha ntsumi yi nga vula leswaku va ta n’wi kuma kona. Vanhu va hlamarile loko varisi va hlamusela leswi ntsumi yi va byeleke swona. Hiloko Mariya a hlayisa marito lawa hinkwawo, a anakanyisisa hi leswi ma vulaka swona.

Vanhu vo tala namuntlha va tshemba leswaku Yesu u velekiwe hi ti 25 ta December. Kambe etindhawini ta Betlehema, hi December ku ni timpfula ni xirhami. Mikarhi yin’wana ku va ni gamboko. Kutani hi nkarhi lowu elembeni, varisi a va nga kumeki enhoveni va ri ni swifuwo swa vona nivusiku. Nakambe mufumi wa Rhoma a a nga ta lerisa vanhu lava a a swi tiva leswaku a va wu rhandzi mfumo wakwe ku teka riendzo ra masiku yo hlaya leswaku va ta tsarisiwa ku ri karhi ku titimela swinene. Swi le rivaleni leswaku Yesu u velekiwe hi October.