Ndzima 6

N’wana Wa Xitshembiso

EMATSHAN’WINI yo tlhelela eNazareta, Yosefa na Mariya va tshama eBetlehema. Naswona loko Yesu a ri na masiku ya nhungu hi vukhale, va n’wi yimbisa, hi laha Nawu wa Xikwembu eka Muxe wu lerisaka ha kona. Entiyisweni i mukhuva nakambe ku thya n’wana wa mufana vito hi siku ra vunhungu. Kutani va thya n’wana wa vona vito ra Yesu, hi laha Gabriyele a va leriseke ha kona emahlweninyana.

Ku hundze kwalomu ka n’hweti, naswona Yesu u na masiku ya 40 hi vukhale. Hi kwihi laha vatswari va yena sweswi va n’wi yisaka kona? Etempeleni eYerusalema, leyi yi ngo va tikhilomitara ti nga ri tingani, ku suka laha va tshamaka kona. Hi ku ya hi Nawu wa Xikwembu eka Muxe, 40 wa masiku endzhaku ko veleka n’wana wa mufana, manana u fanele ku yisa magandzelo yo tibasisa etempeleni.

Leswi hi leswi Mariya a swi endlaka. U tisa mavondlo mambirhi tanihi gandzelo ra yena. Leswi swi paluxa swin’wana ehenhleni ka xiyimo xa ikhonomi xa Yosefa na Mariya. Nawu wa Muxe wu kombisa leswaku khuna lerintsongo, leri ri nga ra nkoka ku tlula swinyenyana, ri fanele ku nyikeriwa. Kambe loko manana a nga swi fikeleli leswi, swituvana swimbirhi kumbe matuva swi nga ha va swi lunghile.

Etempeleni wanuna la dyuhaleke u tlakula Yesu. Vito ra yena i Simiyoni. Xikwembu xi n’wi paluxele leswaku a nge fi a nga si vona Kriste kumbe Mesiya la tshembisiweke hi Yehova. Loko Simiyoni a ta etempeleni esikwini leri, u kongomisiwa hi moya lowo kwetsima eka n’wana la tlakuriweke hi Yosefa na Mariya.

Loko Simiyoni a tlakula Yesu u nkhensa Xikwembu a ku: “Sweswi hosi, u nga ntshunxa nandza wa wena a tifambela hi ku rhula, hi laha u nga vula ha kona, hikuva mahlo ya mina ma vonile ku ponisa ka wena, loku u ku lunghiseke emahlweni ka matiko hinkwawo, ku nga ku vonakala loku nga voninga matiko, ni loku Israyele tiko ra wena ri nga ta tidzunisa ha kona.”

Yosefa na Mariya va hlamala loko va twa leswi. Kutani Simiyoni wa va katekisa kutani a byela Mariya leswaku n’wana wa yena u ‘velekeriwe leswaku lavo tala va ta khunguvanyeka, van’wana va pfuxiwa etikweni ra Israyele’ ni leswaku gome, ro fana ni tlhari leri tontsweke, ri ta tlhava moya wa yena.

Loyi a nga kona nakambe eka xiendlakalo lexi i muprofeta Ana loyi a nga ni malembe ya 84 hi vukhale. Entiyisweni, a nga kali etempeleni. Hi awara yoleyo u tshinele ekusuhi kutani a sungula ku nkhensa Xikwembu ni ku vulavula hi Yesu eka hinkwavo lava a va ta n’wi yingisa.

Vona ndlela leyi Yosefa na Mariya va tsakaka ha yona eka swiendlakalo leswi etempeleni! Entiyisweni, hinkwaswo leswi swi tiyisa eka vona leswaku n’wana i N’wana la Tshembisiweke wa Xikwembu. Luka 2:21-38; Levitika 12:1-8.

▪ Xana mukhuva wo nyika n’wana wa mufana vito eIsrayele a wu ri rini?

▪ A ku laveka yini eka manana wa Muisrayele loko n’wana wa yena wa mufana a ri na masiku ya 40 hi vukhale, naswona ku hetisisa xilaveko lexi ku paluxa xiyimo xa ikhonomi ya Mariya hi ndlela yihi?

▪ I vamani lava tivaka Yesu eka xiendlakalo lexi, naswona va endla yini ku kombisa leswi?