N’wana Loyi A Tshembisiweke

Yosefa na Mariya va tshama eYerusalema ku ri ni ku va va vuyela eNazareta. Loko Yesu a ri ni masiku ya nhungu, va n’wi yimbisile hilaha Nawu lowu Xikwembu xi wu nyikeke Vaisrayele wu vulaka hakona. (Levhitika 12:2, 3) Nakambe a ku ri ndhavuko wa kona leswaku n’wana wa mufana a thyiwa vito hi siku rero. Va thye n’wana wa vona vito leri nge Yesu hilaha ntsumi Gabriyele yi vuleke hakona.

Se ku hundze nkarhi wo tlula n’hweti naswona Yesu u ni masiku ya 40. Xana sweswi vatswari va yena va n’wi yisa kwihi? Va n’wi yisa etempeleni eYerusalema laha a ko va tikhilomitara ti nga ri tingani ku suka laha a va tshama kona. Nawu wu vula leswaku loko wansati a veleka n’wana wa jaha, endzhaku ka masiku ya 40 u fanele a nyikela gandzelo ra ku tibasisa etempeleni.—Levhitika 12:4-8.

Mariya u endla tano. U tisa swinyenyana swimbirhi leswitsongo tanihi gandzelo rakwe. Leswi swi hi byela swo karhi hi xiyimo xa timali xa Yosefa na Mariya. Hi ku ya hi Nawu, ku fanele ku nyikeriwa khuna leritsongo ni xinyenyana. Kambe loko manana a nga swi koti ku humesa khuna, u ta humesa magugurhwana mambirhi kumbe swituvana swimbirhi. Lexi i xiyimo xa Mariya ni leswi a swi nyikeleke.

Loko Yosefa na Mariya va ri etempeleni, mukhalabye un’wana u ye eka vona. Vito ra yena i Simiyoni. Xikwembu xi n’wi byele leswaku a nge fi a nga si vona Kreste kumbe Mesiya wa Yehovha la tshembisiweke. Hi siku leri, Simiyoni u kongomisiwe hi moya lowo kwetsima leswaku a ya etempeleni, laha a nga fika a kuma Yosefa na Mariya ni ricece ra vona. Hiloko Simiyoni a fika a tlakula n’wana.

Loko Simiyoni a ha tlakule Yesu, u khensa Xikwembu a ku: “Wena, Hosi Leyi Tlakukeke, tshika nandza wa wena a fa hi ku rhula hilaha u vuleke hakona, hikuva se ndzi vone loyi u nga ta n’wi tirhisa ku ponisa loyi u n’wi nyikeleke leswaku a ta voniwa hi vanhu hinkwavo, hi yena ku vonakala loku nga ta susa munyama ematihlweni ya vamatiko, vanhu va wena ku nga Vaisrayele va ta dzunisiwa hikwalaho ka yena.”—Luka 2:29-32.

Sweswo swi va hlamarisile Yosefa na Mariya. Kutani Simiyoni a va katekisa a tlhela a byela Mariya leswaku n’wana wakwe “u hlawuriwe ku wisa ni ku pfuxa vo tala eIsrayele” ni leswaku Mariya u ta va ni mbitsi onge hiloko a tlhaviwe hi tlhari ro leha.—Luka 2:34.

Hi siku leri ku tlhele ku fika munhu un’wana. Munhu loyi i Ana, muprofeta wa xisati loyi a nga ni malembe ya 84. Kahlekahle a nga xwi etempeleni. Hi nkarhi lowu u ya eka Yosefa, Mariya na Yesu loyi a ha ri ricece. Ana a sungula ku khensa Xikwembu ni ku vulavula hi Yesu eka lava n’wi yingisaka.

Ehleketa hi ndlela leyi Yosefa na Mariya a va tsake ha yona loko va vona swiendlakalo leswi le tempeleni! Hakunene hinkwaswo leswi swi kombisa leswaku n’wana wa vona hi Loyi a Tshembisiweke wa Xikwembu.