Ndzima 8

Ku Balekela Munhu Wa Tihanyi

YOSEFA u pfuxa Mariya leswaku a n’wi nyika rungula ra xihatla. Ntsumi ya Yehova a ya ha ku humelela ka yena, yi ku: “Pfuka, u teka xihlangi ni mana wa xona, u baleka u ya Egipta, u ya tshama kona ndzi ko ndzi ku byela; hikuva Heroda ú ta lava xihlangi leswaku a xi dlaya.”

Hi ku hatlisa, ha vanharhu ka vona va baleka. Naswona i nkarhi lowunene hikuva Heroda u twe leswaku vativi va tinyeleti va n’wi xisile naswona va sukile etikweni. Tsundzuka, a a va fanele ku tlhela va ya vika eka yena loko va n’wi kumile Yesu. Heroda u hlundzukile. Kutani eka matshalatshala yo dlaya Yesu, u lerisa leswaku va dlaya vafana hinkwavo eBetlehema ni swifundza swa rona lava va nga ni malembe mambirhi ni lavantsongo. U veka ku hlayela loku ka malembe hi ku ya hi rungula leri a ri kumeke eku sunguleni eka vativi va tinyeleti lava va teke va huma eVuxeni.

Ku dlayiwa ka vana hinkwavo va vafana i nchumu wo chavisa ku wu vona! Masocha ya Heroda ma nghena hi muti na muti. Naswona loko va kuma n’wana wa mufana, va n’wi vutla emavokweni ya mana wa yena. A hi swi tivi leswaku va dlaye vana vangani, kambe ku rila ni nkosi lowukulu wa vamanana ku hetisisa vuprofeta lebyi nga Bibeleni hi muprofeta wa Xikwembu Yeremiya.

Hi nkarhi wolowo, Yosefa ni ndyangu wa yena va kume vuhlayiseki aEgipta naswona sweswi va tshama kona. Kambe vusiku byin’wana ntsumi ya Yehova yi humelela nakambe eka Yosefa hi norho. Ntsumi yi ri, “Pfuka, u teka xihlangi ni mana wa xona, u tlhelela etikweni ra Israyele, hikuva lava a va lava ku xi dlaya, va file.” Kutani eku hetisekeni ka vuprofeta byin’wana bya Bibele lebyi nge N’wana wa Xikwembu u ta humesiwa aEgipta, ndyangu wu tlhelela ekaya ka wona.

Handle ko kanakana Yosefa u kunguhata ku tshama eYudiya, laha a a va tshama kona edorobeni ra Betlehema va nga si balekela aEgipta. Kambe u twa leswaku n’wana wo biha wa Heroda Arkelawusi sweswi i hosi ya Yudiya, naswona eka norho wun’wana u tsundzuxiwa hi Yehova hi ta khombo. Kutani Yosefa ni ndyangu wa yena va ya en’walungwini kutani va tshama edorobeni ra Nazareta eGaleliya. Laha endhawini leyi, ekule ni ntsindza wa vutomi bya vukhongeri bya Vuyuda, hi laha Yesu a kuleleke kona. Matewu 2:13-23; Yeremia 31:15; Hosea 11:1.

▪ Loko vativi va tinyeleti va nga tlheleli, i nchumu wihi wo chavisa lowu Hosi Heroda a wu endleke, kambe Yesu u sirheleriwa hi ndlela yihi?

▪ Loko va suka aEgipta, ha yini Yosefa a nga ha tlheli a tshama eBetlehema?

▪ I vuprofeta byihi bya Bibele lebyi hetisekaka sweswi?