Va Balekela Hosi Yo Homboloka

Yosefa u pfuxa Mariya a n’wi byela mahungu ya xihatla. Ntsumi ya Yehovha a ya ha ku humelela eka Yosefa enorhweni yi n’wi byela yi ku: “Pfuka, u teka n’wana ni mana wakwe u balekela Egipta, u tshama kona kukondza ndzi ku rhumela rito, hikuva Heroda u ta hlota n’wana leswaku a n’wi dlaya.”—Matewu 2:13.

Hiloko Yosefa, Mariya ni n’wana wa vona va baleka hi vusiku byebyo. Va baleke hi nkarhi lowu faneleke hikuva Heroda wa ha ku twa leswaku vangoma va tinyeleti va n’wi kanganyisile. A a va byele leswaku va vuya va ta n’wi tivisa laha n’wana a nga kona. Kambe va fambe va nga swi endlanga sweswo. Hikwalaho Heroda u dye makala. Leswi a ha lava ku dlaya Yesu, u lerisa leswaku ku dlayiwa vana hinkwavo va vafana eBetlehema ni le migangeni ya wona lava nga ni malembe mambirhi ku ya ehansi. U tirhisa malembe wolawo hi ku landza leswi vangoma va tinyeleti lava a va huma eVuxeni va n’wi byeleke swona.

Ku dlayiwa ka vana hinkwavo va vafana i nchumu lowu tsemaka nhlana! A hi nge swi tivi leswaku i vana vangani lava dlayiweke kambe ku rila ni ku kalakala ka va mana wa vona ku hetisisa vuprofeta bya Bibele lebyi vuriweke hi muprofeta wa Xikwembu Yeremiya.—Yeremiya 31:15.

Hi nkarhi lowu, Yosefa ni ndyangu wakwe va balekele Egipta va tshama kona. Kutani hi vusiku byin’wana ntsumi ya Yehovha yi tlhela yi humelela eka Yosefa enorhweni, yi ku: “Pfuka u teka n’wana ni mana wakwe, u khoma ndlela u ya etikweni ra Israyele, hikuva lava a va lava ku dlaya n’wana va file.” (Matewu 2:20) Hiloko Yosefa a swi vona leswaku ndyangu wakwe se wu nga tlhelela etikweni ra ka vona. Sweswo a swi hetisisa vuprofeta byin’wana bya Bibele—N’wana wa Xikwembu a vitaniwa a huma Egipta.—Hosiya 11:1.

Yosefa u lava leswaku ndyangu wakwe wu tshama eYudiya, kumbexana ekusuhi ni muti wa Betlehema, laha a va tshama kona va nga se balekela Egipta. Kambe u twa leswaku n’wana wa Heroda lowo homboloka Arkelawusi se i hosi ya Yudiya. Eka norho wun’wana, Xikwembu xi lemukise Yosefa hi khombo leri nga vaka kona. Hiloko Yosefa ni ndyangu wakwe va famba va kongoma en’walungwini va fika va tshama emutini wa Nazareta exifundzheni xa Galeliya, ekule ni ntsindza wa vukhongeri bya Xiyuda. Yesu u kulela emugangeni wolowo, leswi hetisisaka vuprofeta byin’wana lebyi nge: “U ta vuriwa Munazareta.”—Matewu 2:23.