Ndzima 13

Ku Dyondza Eka Miringo Ya Yesu

ENDZAKUNYANA ka ku khuvuriwa ka yena, Yesu u yisiwa emananga ya Yudiya hi moya wa Xikwembu. U na swo tala swo ehleketa ha swona, hikuva eku khuvuriweni ka yena, ‘matilo ma pfulekile,’ leswaku a ta vona swilo swa le tilweni. Hakunene, ku na swilo swo tala leswi a fanelaka ku ehleketisisa ha swona!

Yesu u heta masiku ya 40 ni vusiku bya 40 emananga naswona a nga dyi nchumu enkarhini lowu. Kutani, loko Yesu a khomiwa hi ndlala swinene, Diyavulosi wa n’wi ntshinelela ku ta n’wi ringa, a ku: “Loko u ri N’wana wa Xikwembu, lerisa maribye lawa leswaku ma hundzuka vuswa.” Kambe Yesu wa swi tiva leswaku swi hoxile ku tirhisa matimba ya yena ya mahlori ku anerisa swilaveko swa yena. Kutani u ala ku ringiwa.

Kambe Diyavulosi a nga karhali. U ringeta ku tshinela kun’wana. U ringa Yesu leswaku a tlula a suka ekhumbini ra tempele leswaku tintsumi ta Xikwembu ti ta n’wi ponisa. Kambe Yesu a nga ringeki ku endla swilo sweswo swo lava ku voniwa. Loko a tshaha eMatsalweni, Yesu u komba leswaku swi hoxile ku ringa Xikwembu hi ndlela leyi.

Eka ndzingo wa vunharhu, Diyavulosi u komba Yesu mimfumo hinkwayo ya misava hi tindlela ta mahlori kutani a ku: “Swilo leswi hinkwaswo ndzi ta ku nyika swona loko u ndzi nkhinsamela, u ndzi gandzela.” Nakambe Yesu u ala ku wela exidyohweni a endla leswo biha, u hlawula ku tshama a tshembekile eka Xikwembu.

Hi nga dyondza eka miringo leyi ya Yesu. Hi xikombiso, yi komba leswaku Diyavulosi a hi vubihi ntsena, hi laha vanhu van’wana va vulaka ha kona, kambe i munhu wa xiviri la nga vonakiki. Ndzingo wa Yesu wu komba leswaku mimfumo hinkwayo ya misava i ya Diyavulosi. Phela, a swi ta endlekisa ku yini leswaku, ku va Diyavulosi a yi nyika Kriste swi va ndzingo lowukulu loko a yi nga ri ya yena hakunene?

Kutani anakanya hi leswi: Diyavulosi u vule leswaku a a swi rhandza ku hakela Yesu loko a n’wi gandzela, hambi ku ri ku n’wi nyika mimfumo hinkwayo ya misava. Diyavulosi a nga ha ringeta ku hi ringa hi ndlela leyi fanaka, kumbexana a veka emahlweni ka hina minkarhi leyi tsakisaka yo kuma rifuwo ra misava, matimba, kumbe xikhundlha. Kambe vona ndlela leyi ku nga vutlhari ha yona ku landzelela xikombiso xa Yesu hi ku tshama hi tiyile eripfumelweni eka Xikwembu ku nga khathariseki ndzingo lowu hi nga hlangavetanaka na wona! Matewu 3:16, 4:1-11; Marka 1:12, 13; Luka 4:1-13.

▪ I swilo swihi leswi handle ko kanakana Yesu a tiyiseleke eka swona hi nkarhi wa masiku ya 40 emananga?

▪ Diyavulosi u ringetisa ku yini ku ringa Yesu?

▪ Hi nga dyondza yini eka miringo ya Yesu?