Dyondza Eka Ndlela Leyi Yesu A Langutaneke Ni Miringo Hayona

Loko Yesu a ha ku khuvuriwa hi Yohane, moya wa Xikwembu wu n’wi kongomise emananga ya Yudiya. Swi tele leswi a faneleke a anakanyisisa ha swona. Loko Yesu a khuvuriwa, ‘matilo ma pfulekile.’ (Matewu 3:16) Hikwalaho a a kota ku tsundzuka swilo leswi a swi dyondzeke ni leswi a swi endleke loko a ri etilweni. A swi kanakanisi leswaku a a ri ni swo tala leswi a a ta anakanyisisa ha swona!

Yesu u hete masiku ya 40 ni vusiku bya 40 emananga. Hi nkarhi wolowo a a nga dyi nchumu. Hikwalaho, loko Yesu a khomiwa hi ndlala, Sathana Diyavulosi u te eka yena leswaku a ta n’wi ringa, a ku: “Loko u ri n’wana wa Xikwembu, byela maribye lawa ma hundzuka swinkwa.” (Matewu 4:3) Leswi a swi tiva leswaku swi hoxile ku tirhisa matimba yakwe yo endla masingita leswaku a enerisa ku navela kakwe, Yesu u bakanye ndzingo wolowo.

Diyavulosi a nga helanga matimba. U ringeta ndlela yin’wana. U tlhontlha Yesu leswaku a tilahlela ehansi a ri ehenhla ka tempele. Kambe Yesu a nga pfumeli ku endla nchumu wolowo lowu a wu ta n’wi vangela matihlo. Hi ku tirhisa matsalwa Yesu u komba leswaku swi hoxile ku ringa Xikwembu hi ndlela leyi.

Kutani eka ndzingo wa vunharhu, hi ndlela yo karhi Diyavulosi u kombe Yesu “mifumo hinkwayo ya misava ni ku vangama ka yona” kutani a ku: “Ndzi ta ku nyika swilo leswi hinkwaswo loko wo khinsama u ndzi gandzela.” Nakambe Yesu u arile, u te: “Suka, Sathana!” (Matewu 4:8-10) A nga pfumelanga ku phasiwa hi ndzingo wolowo hikuva a a swi tiva leswaku ntirho wo kwetsima wu fanele wu endleriwa Yehovha ntsena. U hlawule ku tshama a tshembekile eka Xikwembu.

Hi nga dyondza swo karhi eka miringo leyi ni le ka ndlela leyi Yesu a anguleke hayona. Miringo leyi a yi ri ya xiviri, leswi vulaka leswaku Diyavulosi a ko va mahanyelo yo biha hilaha vanhu van’wana va vulaka hakona. Diyavulosi u kona naswona i xivumbiwa lexi nga vonakiki. Mhaka leyi yi tlhela yi kombisa leswaku tihulumendhe ta laha misaveni i ta Diyavulosi; wa tilawula. Phela loko mifumo leyi a yi nga ri ya yena, ku yi tshembisa Yesu a swi nga ta va ndzingo.

Ku engetela kwalaho, Diyavulosi a a tiyimisele ku hakela Yesu hi ku n’wi nyika mifumo hinkwayo ya misava loko a a lo pfumela ku n’wi khinsamela. Diyavulosi a nga ha ringeta ku hi ringa hi ndlela leyi fanaka, kumbexana a hi komba tindlela to olova to kuma rifuwo ra misava leyi, ndhuma kumbe swikhundlha. Hi kombisa leswaku hi tlharihile loko hi landzela xikombiso xa Yesu hi ku va hi tshama hi tshembekile eka Xikwembu ku nga khathariseki ndzingo lowu nga hi welaka! Kambe tsundzuka leswaku Diyavulosi u sukele Yesu kutani “a yimela nkarhi wun’wana leswaku a ta tlhela a n’wi ringa.” (Luka 4:13) Na le ka hina swi nga va tano, hikwalaho hi fanele hi tshama hi hlomile.