Ndzima 25

Ku Twela Munhu Wa Nhlokonho Vusiwana

LOKO Yesu ni vadyondzisiwa vakwe lava mune va karhi va endzela miti ya Galeliya, mahungu ya swilo leswi hlamarisaka leswi a swi endlaka ya hangalaka exifundzeni hinkwaxo. Rito ra mintirho yakwe ri fikelela muti wun’wana laha ku nga ni wanuna la vabyaka hi nhlokonho. N’anga Luka u n’wi hlamusela a ri “la taleke hi nhlokonho.” Vuvabyi lebyi byo chavisa, eka swiyimo swa byona leswi hluvukeke byi onha swiphemu swo hambana-hambana swa miri hakantsongo-ntsongo. Hikwalaho munhu loyi wa nhlokonho u le ka xiyimo lexi terisaka vusiwana.

Loko Yesu a fika emutini lowu, munhu loyi wa nhlokonho wa n’wi tshinelela. Hi ku ya hi Nawu wa Xikwembu, munhu wa nhlokonho u fanele ku huwelela a tsundzuxa a ku, “thyaka, thyaka!” leswaku a sirhelela van’wana leswaku va nga ti ekusuhi ivi va tluleriwa. Munhu wa nhlokonho kutani a wela emahlweni ka yena ivi a kombela Yesu a ku: “Hosi, loko u swi rhandza, u nga ndzi basisa.”

Vona ripfumelo leri wanuna loyi a a ri na rona eka Yesu! Kambe ke, vuvabyi byakwe byi n’wi endla leswaku a vonaka a terisa vusiwana swonghasi! Yesu u ta endla yini? Wena a wu ta endla yini? A susumetiwa hi ntwelo-vusiwana, Yesu u tshambuluta voko ra yena kutani a khumba wanuna loyi, a ku: “Ndza swi rhandza, hlantsweka u basa.” Kutani hi ku anghwetla nhlokonho wu nyamalala eka yena.

Xana u nga tsakela munhu loyi a nga ni ntwelo-vusiwana wo fana ni loyi leswaku a va hosi ya wena? Ndlela leyi Yesu a ongolaka munhu loyi wa nhlokonho yi hi nyika ntshembo wa leswaku enkarhini wa ndzawulo Yakwe ya Mfumo, vuprofeta bya Bibele byi ta hetiseka: “Yi ta tsetselela swisiwana ni la nge khombyeni, kutani yi ta kutsula vutomi bya swisiwana.” Ina, Yesu enkarhini wolowo u ta hetisisa ku navela ka mbilu ya yena ko pfuna vanhu hinkwavo lava xanisekaka.

Hambi ku ri emahlweni ka ku horisiwa ka munhu wa nhlokonho, vutirheli bya Yesu a byi ri karhi byi vumba ntsako lowukulu exikarhi ka vanhu. Eku hetisekeni ka vuprofea bya Esaya, Yesu u byela munhu la horisiweke a ku: “Tivonele, u nga tshuki u byela munhu.” Kutani wa n’wi letela a ku: “Kambe famba, u ya tikomba eka muprista, u humesa swa ku basisiwa ka wena leswi lerisiweke hi Muxe, swi ta va vumbhoni eka vona.”

Kambe wanuna loyi u tsake ngopfu lerova a nga ka a nga hlayisi singita leri eka yena. Wa suka kutani a sungula ku hangalasa mahungu hinkwako, handle ko kanakana u pfuxa ku tsakela ko tano ni ku navela ku tiva exikarhi ka vanhu lerova Yesu a nga swi koti ku ya emutini hi ku olova. Xisweswo, Yesu u tshama etindhawini ta xivundza laha ku nga tshamiki munhu, kutani vanhu lava humaka ematlhelweni hinkwawo va ta va ta n’wi yingisela ni ku horisiwa emavabyini ya vona. Luka 5:12-16; Marka 1:40-45; Matewu 8:2-4; Levitika 13:45; 14:10-13; Psalma 72:13; Esaya 42:1, 2.

▪ I vuyelo byihi lebyi nhlokonho wu nga vaka na byona, naswona i xitsundzuxo xihi lexi munhu wa nhlokonho a a fanele ku xi nyikela?

▪ Munhu wa nhlokonho u humelela njhani eka Yesu, naswona i yini lexi hi nga xi dyondzaka eka nhlamulo ya Yesu?

▪ Munhu la horisiweke u hluleka ku yingisa Yesu hi ndlela yihi, naswona vuyelo bya kona byi va byihi?