U Horise Munhu Loyi A a Ri Ni Nhlokonho

Loko Yesu ni vadyondzisiwa vakwe va mune va chumayela “emasinagogeni ya vona etikweni hinkwaro ra Galeliya,” mahungu ya swilo swo hlamarisa leswi Yesu a swi endleke ma hangalakile. (Marka 1:39) Mitirho yakwe yi twakale ni le mutini lowu a ku ri ni wanuna loyi a a ri ni nhlokonho. Dokodela Luka u n’wi hlamusela tanihi loyi “a a ri ni nhlokonho yo chavisa.” (Luka 5:12) Loko vuvabyi lebyi, lebyi dlayaka byi kula, byi dlaya swirho swo hambanahambana swa miri.

Kutani wanuna loyi xiyimo xakwe a xi tika swinene naswona a a nga fanelanga a tshama ekusuhi ni vanhu. Ku engetela kwalaho, a a fanele a huwelela a ku: “A ndzi tenganga, a ndzi tenganga!” loko a ri ekusuhi ni vanhu leswaku va nga tshineli ekusuhi na yena ku papalata ku tluleriwa hi vuvabyi. (Levhitika 13:45, 46) Kambe wanuna loyi u endle yini? U ye eka Yesu kutani a wa hi xikandza, a kombela a ku: “Hosi loko u swi lava, u nga ndzi basisa.”—Matewu 8:2.

Mawaku ripfumelo ronghasi leri wanuna loyi a a ri na rona eka Yesu! Naswona vuvabyi byakwe a byi terisa vusiwana. Xana Yesu u endle yini? Xana a wu ta endla yini loko a wu ri kwalaho? Hi ku susumetiwa hi ntwelavusiwana, Yesu u tshambulute voko rakwe kutani a khumba wanuna yaloye. Yesu a ku eka yena: “Ndza swi lava! Basisiwa.” (Matewu 8:3) Hambileswi van’wana swi nga va tikelaka ku swi tshemba kambe hi xitshuketa nhlokonho yi nyamalarile.

Xana u nga tsakela ku va ni Hosi leyi nga ni ntwelavusiwana ni matimba ku fana na Yesu? Ndlela leyi a horiseke wanuna loyi a a ri ni nhlokonho ha yona yi hi tiyisekisa leswaku loko Yesu a ta va Hosi ya misava hinkwayo, ku ta hetiseka vuprofeta lebyi nge: “Yi ta va ni musa eka swisiwana ni lava pfumalaka, yi ta sirhelela vutomi bya swisiwana.” (Pisalema 72:13) Yesu u ta hetisisa ku navela kakwe, ku nga ku pfuna hinkwavo lava xanisekaka.

Tsundzuka leswaku emahlweni ko va ku horisiwa wanuna wa nhlokonho, vanhu a va tsaka hi ntirho wa Yesu. Sweswi vanhu a va ta twa hi nchumu wo hlamarisa lowu a wu endleke. Nilokoswiritano, Yesu a a nga lavi leswaku vanhu va va ni ripfumelo eka yena hikwalaho ka mahungundlela. A a byi tiva vuprofeta lebyi nge: “A nge endli leswaku rito rakwe ri twala exitarateni,” hi ndlela leyi hundzeletiweke. (Esaya 42:1, 2) Kutani Yesu u lerise wanuna loyi a ku: “U nga byeli munhu mhaka leyi, kambe famba u ya tikombisa eka muprista kutani u humesa nyiko leyi Muxe a yi leriseke.”—Matewu 8:4.

Hambiswiritano, wanuna loyi a a nga ha tikoti hi ntsako lerova u tsandzeke ku tikhoma. Hikwalaho u fambe a ya byela vanhu hinkwaswo leswi nga endleka. Sweswo swi endle leswaku vanhu va lava ku swi vona hi ya vona. Sweswo a swi endla leswaku Yesu a nga swi koti ku ya emutini hi ku olova lerova u tshame a ri yexe endhawini leyi ku nga tshamiki vanhu. Nilokoswiritano, vanhu vo tala va tile eka yena leswaku va ta dyondzisiwa ni ku horisiwa.