Ndzima 26

U Le Kaya eKapernawume Nakambe

MANUKU ndhuma ya Yesu yi hangalakile hinkwako, naswona vanhu vo tala va endzela etlhelo ka tindlela laha a tshamaka kona. Hambi swi ri tano, endzhaku ka masiku, u tlhela a ya eKapernawume hi Lwandle ra Galeliya. Hi ku anghwetla mahungu ya hangalaka emutini hinkwawo leswaku u le kaya nakambe, naswona vo tala va ta endlwini laha a nga kona. Vafarisi ni vadyondzisi va Nawu va huma endhawini ya le kule ku fana ni le Yerusalema.

Ntshungu i wukulu swinene lerova wu pfala nyangwa, naswona a ka ha ri na xivandla xa munhu un’wana leswaku a nghena endzeni. Xiteji xa xiendlakalo lexi xiyekaka hakunene xi andlariwile. Leswi swi humelelaka eka xiendlakalo lexi i swa nkoka swinene, hikuva swi hi pfuna ku tlangela leswaku Yesu a a ri ni matimba yo susa xivangelo xa ku vaviseka ka vanhu ni ku tlherisela rihanyo eka hinkwavo lava a va hlawulaka.

Loko Yesu a ri karhi a dyondzisa ntshungu, mune wa vavanuna va tisa munhu la khwanyaleke swirho a ri esangwini. Va lava leswaku Yesu a hanyisa munghana wa vona, kambe hikwalaho ka ntshungu, a va swi koti ku nghena. A swi twisa ku vava swonghasi! Hambi swi ri tano, a va tshikangi. Va khandziya ehenhla ka vuandlalo bya lwangu, va endla mbhovo eka byona, ivi va nembeleta masangu lawa munhu la khwanyaleke swirho a etleleke eka wona ekusuhi na Yesu.

Xana Yesu u hlundzukile hikwalaho ka ku kavanyetiwa loku? Nikantsongo! Kambe ke, u nyanyuriwe ngopfu hi ripfumelo ra vona. U byela la khwanyaleke swirho a ku: “U rivaleriwile swidyoho swa wena.” Kambe xana Yesu hakunene a nga rivalela swidyoho? Vatsari ni Vafarisi a va anakanyi tano. Etimbilwini ta vona va ri: “Hikwalaho ka yini munhu loyi a nga vulavurisa leswi ke? Ú sandza Xikwembu! I mani la nga rivalelaka swidyoho, loko xi nga ri Xikwembu ntsena ke?”

Hi ku tiva mianakanyo ya vona, Yesu u ri eka vona: “Mi vilela hikwalaho ka yini etimbilwini ta n’wina ke? Ku olova yini ke? Xana hi loko ndzi ku ka loyi a khwanyeleke swirho: ‘U rivaleriwile swidyoho swa wena,’ kumbe loko ndzi ku ka yena: ‘Pfuka, u teka masangu ya wena, u famba’?”

Kutani, Yesu u pfumelela ntshungu, kun’we ni vakaneti va yena, ku vona xikombiso xo hlamarisa lexi nga ta paluxa leswaku u ni matimba yo rivalela swidyoho emisaveni ni leswaku hakunene i munhu wa matimba la tshameke a hanya. U hundzulukela eka la khwanyaleke swirho ivi a ku: “Ndzi ri ka wena, teka masangu ya wena, u ya kaya.” Kutani hi ku anghwetla u endla tano, a huma ni sangu rakwe emahlweni ka vona hinkwavo! Hi ku hlamala vanhu va dzunisa Xikwembu ni ku huwelela va ku: “Swilo leswo tano a hi si swi vona”!

Xana u swi xiyile leswaku Yesu u boxa swidyoho mayelana ni vuvabyi ni leswaku ku rivaleriwa ka swidyoho ku fambisana ni ku kuma rihanyo lerinene? Bibele yi hlamusela leswaku mutswari wa hina wo sungula, Adamu, u dyohile ni leswaku hina hinkwerhu hi kume vuyelo bya ndzhaka bya xidyoho xexo, hi leswaku, vuvabyi ni rifu. Kambe ehansi ka ndzawulo wa Mfumo wa Xikwembu, Yesu u ta rivalela swidyoho swa hinkwavo lava rhandzaka Xikwembu ni ku xi tirhela naswona enkarhini wolowo vuvabyi hinkwabyo byi ta susiwa. Sweswo swi ta va swinene swonghasi! Marka 2:1-12; Luka 5:17-26; Matewu 9:1-8; Varhoma 5:12, 17-19.

▪ Ku andlariwa ka xiendlakalo lexi xiyekaka hakunene a ku ri kwihi?

▪ Loyi a khwanyaleke swirho u fikelela Yesu hi ndlela yihi?

▪ Ha yini hinkwerhu hi ri na xidyoho, naswona Yesu u lunghiselela ntshembo wa leswaku ku rivaleriwa ka swidyoho swa hina ni rihanyo leri hetisekeke swi koteka hi ndlela yihi?