“Swidyoho Swa Wena Swi Rivaleriwile”

Vanhu lava tshamaka ekule se a va ti twile ta Yesu. Vo tala va davule mananga ma sala ma hlangana, leswaku va ya yingisela Yesu loko a dyondzisa ni ku vona mitirho yakwe yo hlamarisa. Hambiswiritano, endzhaku ka masiku u tlhelele eKapernawume, ndhawu leyi a endleke mitirho yo tala eka yona. Mhaka ya leswaku Yesu u vuyile yi hatle yi hangalaka emutini hinkwawo lowu nga etlhelo ka Lwandle ra Galeliya. Hikwalaho ka sweswo vo tala va te eka yindlu leyi a a ri eka yona. Van’wana va vona a ku ri Vafarisi ni vadyondzisi va Nawu lava sukaka etindhawini hinkwato ta le Galeliya ni le Yudiya, ku katsa ni le Yerusalema.

“Hiloko ku ta vanhu vo tala swinene lerova ku nga ha vi na ndhawu, hambi ku ri enyangweni, kutani a sungula ku va byela mahungu lamanene.” (Marka 2:2) Se a ku ta endleka nchumu wo hlamarisa. A a ku ri xiendlakalo lexi hi pfunaka ku vona leswaku Yesu u ni matimba yo tsuvula rimitsu ra ku xaniseka ka vanhu ni ku endla leswaku vanhu hinkwavo lava a va hlawuleke va va ni rihanyo lerinene.

Loko Yesu a ri karhi a dyondzisa ekamareni leri a ri lo mphaa hi vanhu, vavanuna va mune va n’wi tisele wanuna loyi a omeke swirho va n’wi rhwale hi sangu. A va lava leswaku Yesu a hanyisa munghana wa vona. Kambe leswi a ku lo mphaa hi vanhu, a va nga swi koti “ku n’wi fikisa eka Yesu.” (Marka 2:4) Ehleketa ndlela leyi sweswo swi va heteke matimba ha yona. Hiloko va khandziya ehenhla ka yindlu va fika va hahlula lwangu. Kutani va ehlisa sangu leri munhu loyi a omeke swirho a a ri eka rona.

Xana Yesu u hlundzukile leswi a va n’wi kavanyeta? Doo! Ku ri na sweswo u tsakisiwe hi ripfumelo ra vona kutani u te eka yena: “Swidyoho swa wena swi rivaleriwile.” (Matewu 9:2) Kambe xana hakunene Yesu a nga rivalela swidyoho? Vatsari ni Vafarisi va sungule ku kanela hi mhaka leyi, va ku: “Hikwalaho ka yini munhu loyi a vulavula hi ndlela leyi? U rhukana Xikwembu. A nga kona la nga rivalelaka swidyoho handle ka Xikwembu”—Marka 2:7.

Leswi a a tiva leswi va swi ehleketaka, Yesu u te eka vona: “Hikwalaho ka yini mi ehleketa swilo swo tano etimbilwini ta n’wina? I yini lexi olovaka, xana i ku byela munhu loyi a omeke swirho u ku, ‘Swidyoho swa wena swi rivaleriwile,’ kumbe i ku vula u ku, ‘Pfuka u teka sangu ra wena u famba’?” (Marka 2:8, 9) Hikwalaho ka gandzelo leri Yesu a a ta ri nyikela hi ku famba ka nkarhi, wa swi kota ku rivalela swidyoho swa vanhu.

Kutani Yesu u kombe ntshungu ni lava va n’wi xopaxopaka leswaku u ni matimba yo rivalela vanhu swidyoho. U langute wanuna la omeke swirho kutani a ku eka yena: “Ndzi ri eka wena, Pfuka, teka sangu ra wena u muka.” Hiloko a pfuka, a teka sangu rakwe a famba va n’wi langutile. Vanhu hinkwavo va hlamala, kutani va dzunisa Xikwembu va ku: “A hi si tshama hi vona nchumu wo fana ni lowu”!—Marka 2:11, 12.

I swa nkoka ku xiya leswaku Yesu u vula leswaku mavabyi ma fambisana ni swidyoho ni leswaku ku rivaleriwa swidyoho swi fambisana ni ku va la hanyeke. Bibele yi hi dyondzisa leswaku mutswari wa hina wo sungula Adamu u dyohile kutani hinkwerhu ka hina hi tluleriwe hi vuyelo bya xidyoho xexo, ku nga mavabyi ni rifu. Kambe ehansi ka Mfumo wa Xikwembu, Yesu u ta rivalela swidyoho swa vanhu hinkwavo lava rhandzaka Xikwembu ni ku xi tirhela. Kutani mavabyi ma ta heriseriwa makumu.—Varhoma 5:12, 18, 19.