Ndzima 36

Ripfumelo Lerikulu Ra Ndhuna Ya Nyimpi

LOKO Yesu a nyikela Dyondzo yakwe eNtshaveni, u fika exikarhi ka kwalomu ka yinhla ya vutirheli bya yena bya le rivaleni. Leswi swi vula leswaku u na kwalomu ka lembe na tin’hweti ta kaye ntsena leswaku a heta ntirho wakwe wa la misaveni.

Sweswi Yesu u nghena emutini wa Kapernawume, laha ku vonakaka ku ri kona laha mintirho yakwe yi sunguleke kona. Laha vakulukumba va Vayuda va n’wi tshinelela ni xikombelo. Va rhumiwe hi ndhuna ya dzana ya Rhoma loyi a nga wa Matiko, wanuna wa rixaka leri hambaneke ni Vayuda.

Nandza la rhandzekaka wa ndhuna ya dzana u le kusuhi ni ku dlaya hi vuvabyi lebyikulu, kutani yi lava leswaku Yesu a hanyisa nandza wa yona. Vayuda va kombelela ndhuna hi matimba: “Swa n’wi fanela leswaku a endleriwa sweswo,” ku vula vona, “hikuva ú rhandza va ka hina, naswona ú hi akele sinagoga.”

Handle ko kanakana, Yesu u famba ni vakulukumba. Kambe, loko va ri kusuhi na ku fika, ndhuna yi rhuma vanakulobye ku ya n’wi byela va ku: “Hosi, u nga tikarhati ku ta fika la, hikuva a swi ndzi fanelanga leswaku wena u ta nghena endlwini ya mina. Na mina ke, a ndzi titwanga ndzi ri loyi ndzi fanelaka ku ta ku hlanganisa.”

Mawaku marito yonghasi yo titsonghata ya ndhuna leyi toloveleke ku lerisa van’wana! Kambe swi vonaka yi ehleketa hi Yesu, yi tsundzuka leswaku mukhuva wu sivela Muyuda ku hlangana ni lava va nga riki Vayuda. Hambi a ri Petro u te: “Ma swi tiva swinene leswaku swa yila eka Muyuda ku endzela munhu wa rixaka rin’wana kumbe ku tshama na yena.”

Kumbexana hi ku nga lavi leswaku Yesu a xaniseka hikwalaho ko tlula mukhuva lowu, ndhuna leyi yi endla leswaku vanakulobye va yona va n’wi kombela: “Lerisa kunene leswaku nandza wa mina a a hanye. Hikuva, mina ndzi nga munhu la fumiwaka hi van’wana, ndzi ni masocha ehansi ka mina; loko ndzi ku eka rin’wana ra wona: ‘Famba!’, ra famba; ni ka rin’wana: ‘Tana!’, ra ta; ni le ka nandza wa mina: ‘Endla leswo karhi!’, wa swi endla.”

Kutani, loko Yesu a twa leswi, wa hlamala. “Ndzi tiyisile ndzi ri ka n’wina,” wa vula, “exikarhi ka Vaisrayele, a ndzi kumanga ni munhu ni un’we la nga ni ku pfumela loko tano.” Endzhaku ka loko a hanyisile nandza wa ndhuna, Yesu u tirhisa nkarhi ku hlamusela hi laha Vamatiko va ripfumelo va nga ta nyikiwa mikateko leyi ariweke hi Vayuda lava nga riki va ripfumelo ha kona.

“Lavo tala,” ku vula Yesu, “va ta huma evuxeni ni le vupela-dyambu, kutani va ta tshama eswakudyeni eMfun’weni wa matilo kun’we na va Abrahama na Isaka, na Yakobo. Kambe vana va Mfumo va ta cukumetiwa handle emunyameni; hi laha ku nga ta va ni mikosi ni ku getsela ka meno.”

‘Vana va Mfumo . . . lava cukumetiweke handle emunyameni,’ i Vayuda va ntumbuluko lava va nga amukeriki nkarhi lowu va nyikiweke wona ku sungula wa ku va vafumi na Kriste. Abrahama, Isaka na Yakobo va yimela lunghiselelo ra Mfumo wa Xikwembu. Xisweswo Yesu u hlamusela hi laha Vamatiko va nga ta amukeriwa ha kona eswakudyeni swa le tilweni, kavula, “eMfun’weni wa matilo.” Luka 7:1-10; Matewu 8:5-13; Mintirho 10:28.

▪ Hikwalaho ka yini Vayuda va kombelela ndhuna ya dzana ya Vamatiko?

▪ I yini lexi nga hlamuselaka leswaku ha yini ndhuna yi kombele leswaku Yesu a nga ngheni endlwini ya yona?

▪ Xana Yesu u vula yini hi nhlamuselo ya yena yo hetelela?