Ndhuna Ya Masocha Yi Kombisa Ripfumelo Lerikulu

Endzhaku ka loko a nyikele Dyondzo yakwe ya le Ntshaveni, Yesu u ya emutini wa Kapernawume. Loko a ri kwalaho, vakulukumba van’wana va Vayuda va ya eka yena. Va rhumiwe hi wanuna wa rixaka rin’wana loyi ku nga ndhuna ya masocha, ya Murhoma.

Nandza wa ndhuna ya masocha loyi a rhandzekaka, wa vabya swinene naswona u le kusuhi ni ku fa. Hambileswi ndhuna ya masocha yi nga riki Muyuda, yi kombela Yesu leswaku a yi pfuna. Vayuda va byela Yesu leswaku nandza wa wanuna yoloye “u latiwile endlwini hikwalaho ko oma swirho, wa vabya swinene.” (Matewu 8:6) Vakulukumba va Vayuda va tiyisekisa Yesu leswaku ndhuna leyi ya masocha swa fanela leswaku yi pfuniwa, va vula leswi: “U rhandza rixaka ra hina naswona u hi akele ni sinagoga.”—Luka 7:4, 5.

Hi ku hatlisa, Yesu u famba ni vakulukumba va ya endlwini ya ndhuna ya masocha. Loko va nga si fika endlwini, ndhuna ya masocha yi rhume vanghana va yona leswaku va ya vula va ku: “Nkulukumba, u nga tikarhati, hikuva a swi ndzi faneli ku va u nghena endlwini ya mina. Hi yona mhaka leyi ndzi nga tivona ndzi nga faneleki ku ta eka wena.” (Luka 7:6, 7) Mawaku ku titsongahata loku humaka eka wanuna loyi a a tolovele ku lerisa kunene! Nakambe swi kombisa ndlela leyi wanuna loyi a hambaneke hayona ni Varhoma lava a va xanisa malandza.—Matewu 8:9.

A swi kanakanisi leswaku ndhuna ya masocha ya swi tiva leswaku Vayuda va papalata ku tihlanganisa ni vanhu lava nga riki Vayuda. (Mitirho 10:28) Kumbexana ndhuna ya masocha a yi ehleketa leswaku vanghana va yona va ta kombela Yesu va ku: “Vula rito, kutani u endla leswaku nandza wa mina a hola.”—Luka 7:7.

Yesu u hlamarisiwa hileswi a swi twaka kutani a ku: “Ndza mi byela, hambi eIsrayele a ndzi ri kumanga ripfumelo ro fana ni leri.” (Luka 7:9) Loko va tlhelela endlwini ya ndhuna ya masocha, vanghana va yona va kume leswaku nandza loyi a a vabya swinene se u horile.

Loko Yesu a heta ku horisa nandza yoloye, u tirhisa xiendlakalo xexo ku tiyisekisa leswaku vanhu lava nga riki Vayuda lava nga ni ripfumelo va ta katekisiwa, hi ku vula a ku: “Vo tala lava humaka evuxeni ni le vupeladyambu va ta ta va fika va tshama etafuleni na Abrahama na Isaka na Yakobo eMfun’weni wa matilo.” Ku ta endleka yini hi Vayuda lava nga riki na ripfumelo? Yesu u vula leswaku va ta “cukumeteriwa ehandle emunyameni. Kwalaho hi laha va nga ta rila va tlhela va getsela ni meno.”—Matewu 8:11, 12.

Xisweswo, Vayuda lava nga wu amukeliki nkateko lowu rhangeke wu nyikiwa vona wo va xiphemu xa Mfumo na Kreste, a va nge amukeriwi. Kambe lava nga riki Vayuda va ta pfumeleriwa ku tshama etafuleni rakwe, ku nga “eMfun’weni wa matilo.”