Ndzima 37

Yesu U Susa Nhlomulo Wa Noni

HI KU anghwetla endzhaku ko horisa nandza wa ndhuna ya nyimpi, Yesu u ya eNayini, muti lowu nga eka tikhilomitara to hundza 32 ku ya evupela-dyambu bya dzonga wa Kapernawume. Vadyondzisiwa vakwe ni ntshungu lowukulu va n’wi heleketa. Kumbexana swi lava ku va ndzhenga loko va tshinelela mindzilakana ya Nayini. Laha va hlanganaka ni ntlawa lowu yaka eswilahlweni. Ntsumbu lowu feke wa jaha wu humesiwa emutini ku ya lahliwa.

Xiyimo xa manana xi chavisa swinene, tanihi leswi a nga noni naswona loyi hi yena n’wana wa yena a ri swakwe ntsena. Loko nuna wakwe a file, a a chaveleleka hi mhaka ya leswi a a ri ni jaha ra yena. Mintshembo ya yena, ku navela ni vusikoti swi talele eka vumundzuku byakwe. Kambe sweswi ku hava loyi a nga ta kuma rito ro chavelela eka yena. Nhlomulo wakwe i wukulu loko vanhu va muti va n’wi heleketa exilahlweni.

Loko Yesu a vona wansati, mbilu ya yena yi tlhaviwa hi nhlomulo wakwe lowukulu. Kutani hi musa, naswona hi ku tiya loku nyikaka ntshembo, u ri eka yena: “U nga rili.” Mukhuva ni xiendlo xakwe swi koka nyingiso wa ntshungu. Kutani a tshinela a khumba vuhlaka lebyi rhwaleke ntsumbu, lava byi rhwaleke va yima. Hinkwavo va fanele va hlamala hi leswi a nga ta swi endla.

I ntiyiso leswaku lava va heleketaka Yesu va n’wi vonile a horisa vanhu vo tala lava vabyaka hi singita. Kambe swi le rivaleni leswaku a va si n’wi vona a pfuxa munhu eku feni. Xana a nga endla nchumu wo tano? Loko a vulavula ni ntsumbu, Yesu wa lerisa: “Jaha, ndzi ri ka wena: Pfuka!” Kutani ri pfuka ri tshama! Ri sungula ku vulavula, ivi Yesu a n’wi yisa eka mana wa yena.

Loko vanhu va vona leswaku hakunene jaha ra hanya, va sungula ku: “Ku humelele muprofeta lonkulu exikarhi ka hina.” Van’wana va ku: “Xikwembu xi endzele tiko ra xona.” Hi ku anghwetla mahungu ya xiendlo lexi xo hlamarisa ya hangalaka hinkwako eYudiya ni matlhelo hinkwawo ya kona.

Yohane Mukhuvuri wa ha ri ekhotsweni, naswona u lava ku tiva swo tala hi mintirho leyi Yesu a kotaka ku yi endla. Kambe vadyondzisiwa va yena va n’wi rungulela swilo hinkwaswo leswi va vonaka Yesu a swi endla. Xana hi yihi nhlamulo ya yena? Luka 7:11-18.

▪ Ku humelela yini loko Yesu a tshinelela eNayini?

▪ Yesu u khumbeka njhani hi leswi a swi vonaka, naswona u endla yini?

▪ Xana vanhu va amukela singita ra Yesu hi ndlela yihi?