Yesu A Pfuxa N’wana Wa Jaha Wa Noni

Loko Yesu a ha ku heta ku horisa nandza wa ndhuna ya masocha, u suka eKapernawume a ya eNayini, ku nga doroba leri nga ekule hi 32 wa tikhilomitara ku ya edzongavupeladyambu. A nga fambi a ri yexe. U famba ni vadyondzisiwa vakwe ni ntshungu lowukulu. Swi nga ha endleka a ku ri nimadyambu loko va fika ehandle ka muti wa Nayini. Kwalaho, va hlangana ni Vayuda vo tala va ri karhi va ya eku lahleni ka mufi. Ntsumbu wa jaha wu yisiwa ehandle ka muti leswaku wu ya lahliwa.

Loyi a nga ni gome lerikulu exikarhi ka vanhu volavo, i mana wa jaha rolero. I noni naswona n’wana wakwe la nga yexe se u file. Loko nuna wakwe a fa, a lo ti salele ntsena ni n’wana wakwe wa jaha loyi a n’wi rhandzaka. Ehleketa ndlela leyi a a titwa a ri ekusuhi na rona, ntshembo lowu a ri na wona hi jaha rakwe ni ndlela leyi a a tiyiseka hayona leswaku ri ta n’wi hlayisa ni ku n’wi sirhelela enkarhini lowu taka. Kambe sweswi na rona se ri file. Sweswi u ta sala na mani naswona u ta hlayisiwa hi mani?

Loko Yesu a vona wansati loyi, u n’wi twela vusiwana swinene hileswi a nga ni gome lerikulu ni ku twa ku vava. Hi ndlela yo kombisa ntwelavusiwana, u n’wi tiyisekisa a ku: “Tshika ku rila.” U tlhela a endla swo tlula sweswo. Wa tshinela ivi a khumba rihlaka leri rhwaleke mufi. (Luka 7:13, 14) Swiendlo swakwe swi endla leswaku vaaki va le dorobeni lava a va ri karhi va rila, va yima va n’wi langutisa. Vo tala va nga va va tivutisa leswi, ‘Xana u vula yini naswona u lava ku endla yini?’

Xana va endla yini lava va fambaka na Yesu lava n’wi voneke a endla masingita yo tala ni ku horisa vanhu? Swi tikomba onge a va nga si tshama va vona Yesu a pfuxa munhu loyi a feke. Hambileswi enkarhini lowu hundzeke ku veke ni ku pfuxiwa ka vafi, xana Yesu a a ta swi kota ku endla sweswo? (1 Tihosi 17:17-23; 2 Tihosi 4:32-37) Hiloko a lerisa a ku: “Jaha, ndzi ri eka wena, pfuka!” (Luka 7:14) Hakunene swi ve tano. Jaha ri pfuka ri tshama ivi ri sungula ku vulavula. Hiloko Yesu a ri nyika mana wa rona loyi a nga eku hlamaleni naswona a tsakeke. Sweswi mana wa rona a nga ha ri yexe.

Loko vanhu va vona leswaku jaha ra hanya, va dzunisa Yehovha Munyiki wa Vutomi, ivi va ku: “Hi ni muprofeta loyi a nga ni matimba.” Van’wana va tlangela matimba ya xiendlo xa Yesu xo hlamarisa, hi ku vula va ku: “Xikwembu xi tsundzuke vanhu va xona.” (Luka 7:16) Mahungu lawa yo tsakisa ma hangalaka hi ku hatlisa emitini ya le kusuhi ni laha Yesu a nga kona, ku ya fika eNazareta laha a humaka kona laha a swi teka kwalomu ka khume wa tikhilomitara ku ya kona. Nakambe ma hangalaka ku ya fika ni le dzongeni wa Yudiya.

Yohane Mukhuvuri wa ha ri ekhotsweni naswona u swi navela hi mbilu hinkwayo ku tiva masingita lawa Yesu a ma endlaka. Vadyondzisiwa va Yohane va ya eka yena va ya n’wi byela hi masingita wolawo. Yohane u angula njhani?