Ndzima 41
Xivangelo Xa Dzolonga
HI KU hatlisa endzhaku ka loko a hungatiwile ekaya ra Simoni, Yesu u sungula riendzo ra vumbirhi ro chumayela ra le Galeliya. Eka pfhumba ra yena ro sungula ra nsimu, a a heleketiwe hi vadyondzisiwa vakwe vo sungula, Petro, Andriya, Yakobo na Yohane. Kambe vaapostola va 12 kun’we ni vavasati van’wana va famba na yena. Lava va katsa Mariya wa Magdala, Susana na Yona, loyi nuna wa yena a nga ndhuna ya Hosi Heroda.
Loko ku ya emahlweni ka vutirheli bya Yesu ku ri karhi ku kula, na rona dzolonga mayelana ni ntirho wakwe ra kula. Wanuna la nga ni mademona, loyi nakambe a nga bofu naswona a nga mbeveve, u tisiwa eka Yesu. Loko Yesu a n’wi horisa, leswaku a va la ntshunxekeke eka vulawuri bya mademona naswona a kota ku vulavula ni ku vona, mintshungu ya hlamala. Va sungula ku: “Xana munhu loyi a nga va yena N’wana Davhida ke?”
Mintshungu yi hlengeletana hi tinhlayo letikulu yi rhendzela yindlu leyi Yesu a tshamaka eka yona lerova yena ni vadyondzisiwa vakwe va tsandzeka ni ku dya swakudya. Ku engetelela eka lava va anakanyaka leswaku kumbexana i “N’wana Davhida” la tshembisiweke, ku na vatsari ni Vafarisi lava teke va huma hi le Yerusalema ku ta n’wi sandza. Loko maxaka ya Yesu ya twa hi dzolonga leri nga kona ekusuhi na Yesu, va ta va ta n’wi teka. Hikwalaho ka xivangelo xihi?
Ina, hambi ku ri vamakwavo wa Yesu a va nga si tshemba ni sweswi leswaku i N’wana wa Xikwembu. Nakambe, dzolonga ni mpfilumpfilu wa vanhu leswi a swi tlhontlheke i xivumbeko lexi hambaneke hi laha ku heleleke ni xa Yesu loyi va n’wi tiveke loko a ha kula le Nazareta. Hikokwalaho, va tshemba leswaku nchumu wun’wana wu hoxile hakunene emianakanyweni ya Yesu. Va hete hi ku, “Ú hlangane nhloko,” kutani va lava ku n’wi khoma va famba na yena.
Kambe vumbhoni byi le rivaleni leswaku Yesu u hanyise munhu wa mademona. Vatsari ni Vafarisi va swi tiva leswaku va nga ka va nga wu kaneti ntiyiso wa leswi. Kutani leswaku va sola Yesu va byela vanhu va ku: “Munhu loyi, [a] nge swi koti ku hlongola mademona loko ku nga ri hi Belzebule, hosi ya mademona.”
Hi ku tiva miehleketo ya vona, Yesu u vitana vatsari ni Vafarisi ivi a ku: “Mfumo wun’wana ni wun’wana lowu avanaka hi le xikarhi hi ku tilwisa, wu hundzuka wa hava; muti wun’wana ni wun’wana, hambi wu ri ndyangu, lowu avanaka hi le xikarhi ni ku tilwisa, a wu nga tiyi. Ni loko Sathana a hlongola Sathana, ú avane hi le xikarhi, wa tilwisa; kwalaho ke, xana mfumo wa yena wu nga tiyisa ku yini?”
Vona mianakanyo ya matimba swonghasi! Tanihi leswi Vafarisi va vulaka leswaku vanhu lava humaka exikarhi ka vona va hlongole mademona, Yesu nakambe wa vutisa: “Loko kunene ndzi hlongola mademona hi Belzebule, xana vana va n’wina vona va ma hlongola hi mani xana?” Hi marito man’wana, xisolo xa vona eka Yesu hi laha ku fanaka xi fanele ku tirhisiwa ni le ka vona ematshan’wini ya yena. Kutani Yesu wa tsundzuxa: “Kambe loko ndzi hlongola mademona hi Moya wa Xikwembu, swi vula leswaku Mfumo wa Xikwembu wu tile eka n’wina.”
Ku komba leswaku ku hlongola ka yena mademona i vumbhoni bya matimba yakwe eka Sathana, Yesu u ri: “Kumbe munhu a nga nghenisa ku yini endlwini ya nhenha ya matimba a phanga xuma xa yona, loko a nga sungulanga hi ku boha nhenha yoleyo ke? Hi kona a nga ta phanga yindlu ya yena. Loyi a nga yimiki na mina, ú lwa na mina; kutani loyi a nga hlengeletiki na mina, wa hangalasa.” Swi le rivaleni leswaku Vafarsi va lwa na Yesu, va tikomba va ri vayimeri va Sathana. Va hangalasa Vaisrayele eka yena.
Entiyisweni, Yesu u tsundzuxa vakaneti lava va vusathana leswaku ‘loko va sandza Moya, va nga ka va nga rivaleriwi.’ Wa hlamusela: “Un’wana ni un’wana la nga ta dyohela N’wana-wa-Munhu hi ku n’wi sandza, ú ta rivaleriwa; kambe la nga ta dyohela Moya lowo Kwetsima hi ku sandza, a nga ka a nga rivaleriwi, hambi ku ri enkarhini wa sweswi, hambi ku ri enkarhini lowu taka.” Vatsari ni vafarisi volavo va endle xidyoho xexo xi nga rivaleriwiki hi ku nyika Sathana hi vukanganyisi leswi entiyisweni ku nga ku tirha ka singita ka moya lowo kwesima wa Xikwembu. Matewu 12:22-32; Marka 3:19-30; Luka 8:1-3; Yohane 7:5.
▪ Xana riendzo ra Yesu ra vumbirhi ra le Galeliya ri hambana njhani ni lero sungula?
▪ Hikwalaho ka yini maxaka ya Yesu ya ringete ku n’wi teka?
▪ Vafarisi va ringete ku sola mahlori ya Yesu hi ndlela yihi, naswona Yesu u va kanetise ku yini?
▪ Vafarisi volavo va ni nandzu wa yini naswona ha yini?