A A Ma Kuma Kwihi Matimba Yo Endla Masingita?

Endzhaku ko dyondzisa hi ku rivalela ekaya ka Simoni lowa Mufarisi, Yesu u tlhela a teka riendzo rin’wana ro ya chumayela eGaleliya. I lembe rakwe ra vumbirhi entirhweni wakwe wo chumayela naswona sweswi a nga fambi yexe. U famba ni vaapostola va 12 ni vavasati van’wana lava “humesiweke madimona va tlhela va hanyisiwa eka mavabyi ya vona.” (Luka 8:2) Exikarhi ka vona ku na Mariya Magadala, Suzana na Yowana loyi nuna wakwe a a ri ndhuna endlwini ya Hosi Heroda Antipasi.

Loko vanhu va ya va twa swo tala hi Yesu, va sungula ku phikizana hi leswi a swi endlaka. Sweswo swi vange hileswi ku yisiweke wanuna wun’wana eka Yesu leswaku a ta n’wi horisa, wanuna loyi a a ri ni madimona, a nga voni naswona a nga vulavuli. Sweswi wanuna loyi, a nga ha ri na madimona naswona se wa vona ni ku tlhela a vulavula. Vanhu va hlamala, ivi va ku: “Xana loyi a hi N’wana wa Davhida?”—Matewu 12:23.

Ntshungu wu hlengeletana endlwini leyi Yesu a nga eka yona naswona wu lo hontlo lerova yena ni vadyondzisiwa vakwe va tsandzeka ni ku dya. A hi vanhu hinkwavo lava ehleketaka leswaku Yesu i “N’wana wa Davhida” loyi a tshembisiweke. Vatsari van’wana ni Vafarisi va fambe mpfhuka wo leha ku suka eYerusalema kambe a va telanga ku ta dyondza eka Yesu kumbe ku n’wi seketela. Va byela vanhu va ku: “U na Belzebule” naswona u tirhisana ni “hosi ya madimona.” (Marka 3:22) Loko maxaka ya Yesu ma twa leswi Yesu a hehliwaka ha swona, hiloko ma tshinela eka Yesu leswaku ma ta n’wi tshikisa ku chumayela. Hikwalahokayini?

Enkarhini lowu, hambi ku ri vamakwavo va Yesu a va tshembi leswaku i N’wana wa Xikwembu. (Yohane 7:5) Yesu loyi sweswi a vonakaka a vanga njhekanjhekisano eka vanhu, u hambane hi ku helela na Yesu loyi va n’wi tivaka loyi va kuleke na yena eNazareta. Hi ku ehleketa leswaku u ni xiphiqo xa miehleketo, va ri: “Wa penga.”—Marka 3:21.

Xana entiyisweni vumbhoni byi kombisa yini? Yesu wa ha ku horisa wanuna loyi a a ri ni madimona loyi sweswi a vonaka ni ku tlhela a vulavula. Ku hava loyi a nga kanetaka sweswo. Hikwalaho, vatsari ni Vafarisi va ringeta ku hehla Yesu hi swihehlo swa mavunwa. Va ri: “Muyisa loyi u hlongola madimona hi Belzebule, hosi ya madimona.”—Matewu 12:24.

Leswi Yesu a tivaka leswi nga emiehleketweni ya vatsari ni Vafarisi, u ri: “Mfumo wun’wana ni wun’wana lowu avaneke wu ta wa naswona muti wun’wana ni wun’wana kumbe ndyangu lowu avaneke a wu nge tiyi. Hilaha ku fanaka, loko Sathana a hlongola Sathana, swi vula leswaku u avanile; xana mfumo wa yena wu nga tiya ke?”—Matewu 12:25, 26.

Mayana ndlela leyinene yo hlamulana na vona! Vafarisi va swi tiva kahle leswaku ku ni Vayuda van’wana lava kotaka ku hlongola madimona. (Mitirho 19:13) Hikwalaho, Yesu u va vutisa a ku: “Loko ndzi hlongola madimona hi Belzebule, xana vana va n’wina va ma hlongola hi mani?” Hi marito man’wana, leswi a va hehla Yesu, a va fanele va hehla ni Vayuda volavo. Yesu u ya emahlweni a va hlamula a ku: “Kambe loko ku ri leswaku ndzi hlongola madimona hi moya wa Xikwembu, Mfumo wa Xikwembu se wu mi hundzile.”—Matewu 12:27, 28.

Ku kombisa leswaku ku hlongola kakwe madimona i vumbhoni lebyi kombisaka leswaku u ni matimba yo tlula ya Sathana, Yesu u ri: “Xana munhu a nga yi hlaserisa ku yini yindlu ya wanuna wa matimba kutani a teka nhundzu yakwe, loko a nga rhanganga hi ku n’wi boha? Endzhaku ka sweswo hi kona a nga tekaka leswi nga endlwini yakwe. Loyi a nga yimiki na mina u lwa na mina naswona loyi a nga hlengeletiki na mina wa hangalasa.” (Matewu 12:29, 30) Swi le rivaleni leswaku vatsari ni Vafarisi va lwisana na Yesu, byebyo i vumbhoni bya leswaku i malandza ya Sathana. Va le ku chaviseni ka vanhu leswaku va fambela ekule ni N’wana wa Xikwembu, loyi a endlaka masingita hi ku pfuniwa hi Yehovha.

Yesu u lemukisa vakaneti lava va Sathana a ku: “Vanhu va ta rivaleriwa swidyoho swa vona hinkwaswo, ku nga khathariseki swidyoho leswi va swi endlaka ni mavulavulelo ya vona ya nhlambha. Kambe loyi a sandzaka moya lowo kwetsima a nge pfuki a rivaleriwile, u ta va ni nandzu hilaha ku nga heriki.” (Marka 3:28, 29) Ehleketa leswi sweswo swi vulaka swona eka vaseketeri va Sathana lava va lwisanaka ni leswi moya lowo kwetsima wa Xikwembu wu swi endlaka!