Yesu A Paluxa Lexi Endlaka Munhu A Tsaka

Yesu wa ha ku phindha tidyondzo leti vulavulaka hi xikhongelo kambe a hi tona ntsena leti a ti phindhaka loko a ri eka ntirho wakwe wo chumayela. Loko a endla masingita eGaleliya, Yesu u hehliwe hi mavunwa ya leswaku u endla tano hi matimba ya mufumi wa madimona. Sweswi u hehliwa hi leswi fanaka eYudiya.

Loko Yesu a hlongola dimona leri a ri sivela wanuna ku vulavula, mitshungu ya hlamala. Kambe vakaneti vakwe a va hlamali. Va n’wi hehla hi mavunwa lama fanaka va ku: “U hlongola madimona hi Belzebule hosi ya madimona.” (Luka 11:15) Leswi van’wana va lavaka vumbhoni lebyi engetelekeke bya leswaku hi yena Yesu, va n’wi kombela ku endla xikombiso lexi humaka etilweni.

Loko a xiya leswaku va ringeta ku n’wi ringa, Yesu u va hlamula hi ndlela leyi a hlamuleke vakaneti vo fana na vona eGaleliya. U va hlamusela leswaku mfumo wun’wana ni wun’wana lowu avaneke wu ta wa, hi ku vula a ku: “Loko Sathana na yena a avanile, xana mfumo wakwe wu ta tiyisa ku yini ke?” Kutani Yesu u va byela hi ku kongoma a ku: “Loko ku ri leswaku ndzi hlongola madimona hi matimba ya Xikwembu, Mfumo wa Xikwembu se wu mi hundzile.”—Luka 11:18-20.

Ku vulavula ka Yesu hi “matimba ya Xikwembu” swi fanele swi endle vayingiseri vakwe va tsundzuka mhaka leyi endlekeke endzhakunyana ematin’wini ya Israyele. Lava a va ri ehubyeni ya Faro lava voneke Muxe a endla singita va hlamarile, ivi va ku: “I ritiho ra Xikwembu!” Nakambe a ku ri “ritiho ra Xikwembu” leri tsaleke Milawu ya Khume eka swiphepherhele swa maribye mambirhi. (Eksoda 8:19; 31:18) Hilaha ku fanaka, “ritiho ra Xikwembu” ku nga moya wa xona lowo kwetsima kumbe matimba ya xona lama tirhaka, hi wona ma endlaka leswaku Yesu a hlongola madimona ni ku horisa vanhu lava vabyaka. Hikwalaho, Mfumo wa Xikwembu hakunene wu va hundzile vakaneti lava hikuva Hosi leyi vekiweke ya Mfumo ku nga Yesu, yi endla masingita exikarhi ka vona.

Vuswikoti bya Yesu byo hlongola madimona i vumbhoni bya leswaku u ni matimba ku tlula Sathana, ku fana ni wanuna wa matimba loyi a hlulaka murindzi la hlomeke loyi a langutelaka ndhawu ya le vuhosini. Yesu u tlhela a hlamusela xifaniso xa moya lowu nga basangiki lowu humaka eka wanuna. Loko wanuna loyi a nga sivi ndhawu leyi a yi ri ni mimoya yo biha hi swilo leswinene, moya wolowo wo biha wu ta tlhela wu vuya ni mimoya yin’wana ya nkombo, wu endla leswaku xiyimo xo hetelela xa wanuna loyi xi nyanya ku tlula eku sunguleni. (Matewu 12:22, 25-29, 43-45) Swi vonaka swi ri tano ni hi tiko ra Israyele.

Wansati loyi a yingiseleke Yesu u susumeteleka ku huwelela a ku: “Wa tsaka wansati loyi a ku velekeke a tlhela a ku mamisa!” Vavasati va Vayuda a va navela ku va mana wa muprofeta, ngopfungopfu Mesiya. Hikwalaho, wansati loyi a nga ha va a ehleketa leswaku Mariya u tsakile swinene hileswi a nga mana wa mudyondzisi wo tano. Kambe Yesu u lulamisa wansati loyi mayelana ni laha ntsako wa ntiyiso wu humaka kona, hi ku vula a ku: “Va tsaka lava twaka rito ra Xikwembu va tlhela va endla leswi ri swi vulaka!” (Luka 11:27, 28) Yesu a nga si tshama a ringanyeta leswaku Mariya a dzunisiwa hi ndlela yo karhi. Ku ri na sweswo, munhu a nga kuma ntsako wa xiviri hi ku va nandza wo tshembeka wa Xikwembu, ku nga ri hi ku va xaka ra munhu wo karhi kumbe leswi a swi fikeleleke evuton’wini.

Hilaha Yesu a endleke hakona eGaleliya, u tshinya vanhu lava lavaka xikombiso lexi humaka etilweni. U vula leswaku a xi kona xikombiso lexi va nga ta nyikiwa xona handle ka “singita ra Yonasi.” Yonasi u ve xikombiso xa singita kambirhi hileswi a heteke masiku manharhu endzeni ka nhlampfi ni ku chumayela hi xivindzi, leswi endleke Vaninivha va hundzuka. Yesu u ri: “Kambe vonani, laha ku ni munhu wa nkoka ku tlula Yonasi.” (Luka 11:29-32) Yesu na yena i wa nkoka ku tlula Solomoni loyi hosi ya xisati ya le Xeba yi teke ku ta n’wi yingisela.

Yesu u engetela a ku: “Loko munhu a lumeke rivoni a nga ri veki endhawini leyi tumbeleke kumbe ehansi ka basikiti, kambe u ri veka ehenhla ka xo tlhandleka rivoni.” (Luka 11:33) Kumbexana u hlamusela leswaku ku dyondzisa ni ku endla masingita emahlweni ka vanhu lava, swi fana ni ku tumbeta ku voninga ka rivoni. Tanihi leswi a va nga swi twisisi, va tsandzeka ku twisisa xikongomelo xa mahlori yakwe.

Yesu wa ha ku hlongola dimona eka munhu loyi a a ri mbheveve leswaku a kota ku vulavula. Leswi swi fanele swi susumetela vanhu leswaku va dzunisa Xikwembu ni ku byela van’wana leswi Yehovha a swi hetisisaka. Kutani Yesu u lemukisa vakaneti vakwe a ku: “Hikwalaho, tiyiseka leswaku ku vonakala loku nga eka wena a hi munyama. Kutani loko miri wa wena hinkwawo wu vangama ku nga ri na xiphemu lexi nga ni munyama, wu ta vangama ku fana ni loko wu voningeriwa hi rivoni.”—Luka 11:35, 36.