Ndzima 75
Xihlovo Xa Ntsako
HI NKARHI wa vutirheli bya yena eGaleliya, Yesu u endle mahlori, naswona sweswi u ma phindha eYudiya. Hi xikombiso, u hlongola demona eka munhu, leri ri n’wi siveleke ku vulavula. Mintshungu ya hlamala, kambe vaxopaxopi va pfuxa ku kaneta loku fanaka ni loku ku pfuxiweke eGaleliya. Va ri: “U hlongola mademona hi Belzebule, hosi ya mademona.” Van’wana va lava vumbhoni lebyikulu eka Yesu malunghana ni nhlamuselo ya yena, naswona va ringeta ku n’wi ringa hi ku kombela xikombiso lexi humaka etilweni.
Hi ku tiva leswi va swi anakanyaka, Yesu u nyika nhlamulo leyi fanaka eka vaxopaxopi va yena eYudiya tanihi leyi a yi nyikeke eka lavaya va le Galeliya. U xiya leswaku mfumo wun’wana ni wun’wana lowu avaneke wu ta wa. Wa vutisa: “Hikwalaho, loko Sathana na yena a avana hi le xikarhi a tilwisa, mfumo wa yena wu ta tiyisa ku yini?” U kombisa xiyimo xa khombo xa vasori va yena hi ku: “Loko ndzi hlongola mademona hi matimba ya Xikwembu, swi vula leswaku Mfumo wa Xikwembu wu vile wu fikile eka n’wina.”
Lava vonaka masingita ya Yesu va fanele va ma amukela hi ndlela leyi fanaka ni leyi lavaya eka malembe xidzana ya le mahlweni loko va vone Muxe a endla singita va endleke ha yona. Va huwelerile va ku: “I rintiho ra Xikwembu!” A ku ri “voko ra Xikwembu” leri ri tsaleke Milawu ya Khume emaribyeni. Naswona “matimba ya Xikwembu”—moya wa xona lowo kwetsima—kumbe matimba lama tirhaka, hi wona lama pfunaka Yesu ku hlongola mademona ni ku hanyisa vavabyi. Kutani Mfumo wa Xikwembu hakunene wu le xikarhi ka vaxopaxopi lava tanihi leswi Yesu, Hosi leyi hlawuriweke ya Mfumo, a nga exikarhi ka vona.
Kutani Yesu u kombisa leswaku vuswikoti bya yena byo hlongola mademona i vumbhoni bya matimba ya yena ehenhla ka Sathana, tanihi leswi wanuna wa matimba a taka a ta hlula wanuna la hlomeke kahle la rindzaka yindlu ya yena ya vuhosi. U tlhela a phindha xifaniso lexi a xi vuleke eGaleliya mayelana ni moya wa thyaka. Moya lowu wu sukelaka munhu, kambe loko munhu a nga tati xivandla xa kona hi swilo leswinene, moya wu vuya na yin’wana ya nkombo, naswona xiyimo xa munhu xi biha ku tlula eku sunguleni.
Loko a yingisele tidyondzo leti, wansati entshungwini u susumeteleka ku tlakusa rito a ku: “Ku katekile wansati la ku velekeke, la ku mamiseke!” Leswi ku navela ka wansati un’wana ni un’wana wa Muyuda ku nga ku va mana wa muprofeta naswona ngopfu-ngopfu Mesiya, swa twisiseka leswaku wansati loyi a a ta vula leswi. Swi le rivaleni leswaku u anakanye leswaku Mariya u fanele a tsaka ngopfu hikwalaho ka ku va mana wa Yesu.
Hambi swi ri tano, Yesu hi ku hatlisa u lulamisa wansati loyi mayelana ni xihlovo xa ntiyiso xa ntsako. U ri: “Ngopfu ku katekile lava yingisaka Rito ra Xikwembu, va vuya va ri hlayisa!” Yesu a nga vulanga leswaku mana wa yena, Mariya, u fanele a kombiwa xichavo lexi hlawulekeke. Ematshan’wini ya sweswo, u kombe leswaku ntsako wa ntiyiso wu kumiwa hi ku va nandza wa Xikwembu la tshembekaka, ku nga ri eka vuxaka kumbe matshalatshala ya nyama.
Tanihi laha a endleke ha kona eGaleliya, Yesu u ya emahlweni a tshinya vanhu eYudiya hi ku kombela xikombiso lexi humaka hi le tilweni. U va byela leswaku a ku na xikombiso lexi va nga ta nyikiwa xona loko ku nga ri xikombiso xa Yonasi. Yonasi u ve xikombiso hi ku va enhlampfini masiku manharhu ni ku chumayela ka yena hi xivindzi, leswi endleke leswaku Vaninivha va susumeteleka ku hundzuka. Yesu u ri: “Maswivo, leswi nga kwala i swikulu ku tlula Yonasi.” Hi laha ku fanaka, hosi ya wansati ya Xeba yi hlamale vutlhari bya Solomoni. Yesu u tlhela a ku: “Kutani maswivo, leswi nga kwala i swikulu ku tlula Solomoni.”
Yesu u hlamusela leswaku loko munhu a lumeka rivoni, a nga ri veki laha ku fihlekeke kumbe ehansi ka xirhundzu kambe u ri veka eka xitlhoma-rivoni leswaku vanhu va ta vona ku vonakala. Kumbexana u ringanyeta leswaku ku dyondzisa ni ku endla mahlori eka vanhu lava vo sihalala eka vayingiseri va yena swo fana ni ku fihla ku vonakala ka rivoni. Mahlo ya vahlaleri vo tano a hi manene, kumbe a ma voni, kutani xikongomelo-nkulu xa mahlori ya yena a xi hetiseki.
Yesu wa ha ku hlongola demona ivi a endla leswaku mbeveve yi vulavula. Leswi swi fanele ku susumetela vanhu lava nga ni mahlo lamanene, kumbe lama vonaka, ku dzunisa xiendlo lexi xo saseka ni ku huwelela mahungu lamanene! Kambe, eka vaxopaxopi lava, leswi a hi swona leswi humelelaka. Kutani Yesu u hetelela hi ku: “Hikwalaho tivonele leswaku ku vonakala loku nga ka wena ku nga vi munyama. Loko kunene miri wa wena hinkwawo wu ri eku vonakaleni, ku ri hava laha ku nga ni munyama, miri hinkwawo wu ta voningiwa, kukota loko rivoni ri ku voninga hi ku vonakala ka rona.” Luka 11:14-36; Eksoda 8:18, 19; 31:18; Matewu 12:22, 28.
▪ Hi yihi nhlamulo eku hanyiseni ka Yesu ka wanuna un’wana?
▪ Xana “matimba ya Xikwembu” i yini, naswona Mfumo wa Xikwembu wu le xikarhi ka vayingiseri va Yesu hi ndlela yihi?
▪ Xana xihlovo xa ntsako wa ntiyiso i yini?
▪ Munhu a nga va ni mahlo lamanene hi ndlela yihi?