Ndzima 54

“Vuswa Bya Xiviri Lebyi Humaka eTilweni”

SIKU hakunene a ri ri na swiendlakalo swo tala. Yesu u phamele magidi hi hlori ivi endzhaku a balekela matshalatshala ya vanhu yo n’wi endla hosi. Hi vusiku byebyo u fambe eLwandle leri nga ni bubutsa ra Galeliya; u ponise Petro, loyi a sunguleke ku nwela loko a famba ematini lama kavanyetiwaka hi bubutsa; naswona u miyete magandlati leswaku a ponisa vadyondzisiwa va yena eku onhakeriweni hi xikepe.

Sweswi vanhu lava Yesu a va phameleke hi hlori en’walungu-vuxa bya Lwandle ra Galeliya va n’wi kuma ekusuhi na Kapernawume, naswona va vutisa: “U te rini laha?” Loko a va tshinya, Yesu u vula leswaku va fambe va n’wi lava ntsena hi leswi a va langutela ku kuma swakudya swin’wana swa mahala. U va khutaza ku tirha, va nga tirheli swakudya leswi helaka, kambe swakudya swa hi masiku swa vutomi lebyi nga heriki. Kutani vanhu va vutisa va ku: “Xana hi fanele ku endla yini ku tirha mintirho ya Xikwembu xana?”

Yesu u boxa ntirho wun’we ntsena wa nkoka lowukulu. Wa hlamusela a ku: “Ntirho wa Xikwembu hi lowu: Hi leswaku mi pfumela eka Loyi xi n’wi rhumeke.”

Hambi swi ri tano, vanhu a va kombisi ripfumelo eka Yesu, ku nga khathariseki mahlori hinkwawo lama a ma endleke. Hi ku pfumala ripfumelo, va vutisa va ku: “Xana u endle mahlori wahi hi ma vona, leswaku hi ta pfumela eka wena, xana? U endle ntirho wihi xana? Vatata wa hina va dyile manna emananga, hi laha Matsalwa ma vuleke ha kona ma te: ‘Ú va hile vuswa lebyi humaka etilweni, va dya.’”

Loko a hlamula xikombelo xa vona xa xikombiso, Yesu u veka Xihlovo xa malunghiselelo ya hlori erivaleni, a ku: “A a nga ri Muxe la mi nyikeke vuswa lebyi humaka etilweni, kambe Tata wa mina hi yena la mi nyikaka vuswa bya xiviri lebyi humaka etilweni. Hikuva vuswa bya Xikwembu hi lebyi byi xikaka hi le tilweni, lebyi nyikaka misava evutomi.”

Vanhu va ku: “Hosi, hi nyike vuswa byebyo hi masiku hinkwawo.”

Yesu wa hlamusela a ku: “Hi mina vuswa bya vutomi; loyi a taka eka mina, a nga ka a nga twi ndlala, ni loyi a pfumelaka eka mina a nga ka a nga twi torha ni siku ni rin’we. Kambe ndzi mi byerile leswaku, hambi leswi mi ndzi voneke, a mi pfumeli. Hinkwavo lava Tatana a ndzi nyikaka vona, va ta ta ka mina; ni loyi a taka ka mina, ndzi nga ka ndzi nga n’wi cukumeteli handle. Hikuva ndzi xikile hi le tilweni, ku nga ri ku ta endla ku rhandza ka mina, kambe ku endla ku rhandza ka Loyi a ndzi rhumeke. Kutani ku rhandza ka La ndzi rhumeke hi loku: Hi leswaku ndzi nga lahli na un’we wa hinkwavo lava a ndzi nyikeke vona, kambe ndzi va pfuxa hi siku ra makumu. Hi koloku ku rhandza ka Tata wa mina: Hi leswaku un’wana ni un’wana la langutaka N’wana, a va a pfumela eka yena, a va ni vutomi lebyi nga heriki.”

Eka leswi Vayuda va sungula ku n’unun’utela Yesu hikuva u te, “Hi mina vuswa lebyi xikeke hi le tilweni.” A va voni nchumu lowu engetelekeke eka yena ku tlula ku va n’wana wa vatswari va vanhu naswona hi ndlela leyi fanaka hi laha ku endleke vanhu va le Nazareta, va kaneta va ku: “Xana loyi a hi yena Yesu n’wana Yosefa, loyi hi tivaka tata wa yena ni mana wa yena ke? Kutani sweswi u vurisa ku yini, loko a ku: ‘Ndzi xikile hi le tilweni’?”

Yesu wa hlamula a ku: “Ku nga vi na ku n’unun’uta exikarhi ka n’wina. A ku na munhu la nga taka ka mina, loko a nga kokeriwi ka mina hi Tatana la ndzi rhumeke, kutani mina ndzi ta n’wi pfuxa hi siku ra makumu. Ku tsariwile etibukwini ta vaprofeta, va ku: ‘Hinkwavo va ta dyondzisiwa hi Xikwembu.’ Un’wana ni un’wana la tweke Tatana ni ku dyondza eka yena, wa ta eka mina. A hi leswaku ku ni munhu loyi a tshamaka a vona Tatana, loko a nga ri loyi a humaka eka Xikwembu; hi yena a voneke Tatana. Ndzi tiyisile ndzi ri ka n’wina, loyi a pfumelaka, u ni vutomi lebyi nga heriki.”

Loko a ya emahlweni, Yesu u engeta a ku: “Hi mina vuswa bya vutomi. Vatata va n’wina va dyile manna emananga, kambe va file. Vuswa lebyi xikaka hi le tilweni hi byo byebyi, lebyi endlaka leswaku loko munhu a dya byona, a nga ka a nga fi. Hi mina vuswa lebyi hanyaka lebyi xikeke hi le tilweni; loko munhu a dya vuswa bya kona, u ta hanya hi laha ku nga heriki.” Ina, hi ku kombisa ripfumelo eka Yesu, loyi a rhumiweke hi Xikwembu, vanhu va nga va ni vutomi lebyi nga heriki. A ku na manna, kumbe vuswa byin’wana, lebyi nga lunghiselelaka sweswo!

Bulo malunghana ni vuswa lebyi humaka etilweni kumbexana ri sungule endzhakunyana ka loko vanhu va kume Yesu ekusuhi na Kapernawume. Kambe ri hambeta, ri chaputa endzhakunyana loko Yesu a ri karhi a dyondzisa esinagogeni eKapernawume. Yohane 6:25-51, 59; Psalma 78:24; Esaya 54:13; Matewu 13:55-57.

▪ I swiendlakalo swihi leswi landzeleke bulo ra Yesu malunghana ni vuswa lebyi humaka etilweni?

▪ Hikwalaho ka leswi Yesu a ha ku swi endlaka, ha yini xikombelo xa xikombiso xi nga fanelanga?

▪ Hikwalaho ka yini Vayuda va n’unun’uta loko Yesu a vula leswaku hi yena vuswa bya ntiyiso lebyi humaka etilweni?

▪ Xana bulo ehenhleni ka vuswa lebyi humaka etilweni ri endleke kwihi?