Yesu—“xinkwa Xa Vutomi”

Loko a ri etlhelo ra le vuxeni bya Lwandle ra Galeliya, Yesu u phamele vanhu va magidi hi singita kutani a baleka loko va lava ku n’wi endla hosi. Hi vusiku byebyo, u fambe elwandle leri a ri ri ni xidzedze ivi a ponisa Petro loyi na yena a fambeke ehenhla ka mati kambe a sunguleke ku mbombomela loko a kanakana. Yesu u tlhele a miyeta xidzedze, kumbexana a ponisa vadyondzisiwa vakwe leswaku xikepe xi nga mbombomeli.

Sweswi Yesu u vuyile ku suka evupeladyambu bya lwandle, endhawini ya le Kapernawume. Lava a va phameleke hi singita va n’wi kumile kutani va n’wi vutisa va ku: “U fike rini laha?” Yesu u va tshinya hi ku va byela leswaku va n’wi lava hi leswi va lavaka a va nyika swakudya nakambe. U va khutaza leswaku ‘va nga tirheli swakudya leswi bolaka, kambe va tirhela swakudya leswi nyikaka vutomi lebyi nga heriki.’ Kutani va n’wi vutisa va ku: “Hi fanele hi endla yini leswaku mitirho ya hina yi amukeleka eka Xikwembu?”—Yohane 6:25-28.

Swi nga endleka va ehleketa hi swileriso leswi tsariweke eka Nawu kambe Yesu u vulavula hi ntirho wa nkoka swinene loko a ku: “Xikwembu xi lava leswaku mi va ni ripfumelo eka loyi xi n’wi rhumeke.” Swi nga ri na mhaka swilo hinkwaswo leswi a swi endleke, vanhu a va na ripfumelo eka Yesu. Va n’wi byela leswaku a endla singita ku va ta n’wi tshemba. Va n’wi vutisa va ku: “U ta hi endlela yini? Vakokwa wa hina va dye manna emananga, hilaha swi tsariweke hakona va ku: ‘U va nyike xinkwa xo huma etilweni leswaku va dya.’”—Yohane 6:29-31; Pisalema 78:24.

Leswi a va lava ku endleriwa singita, Yesu u va byela laha masingita wolawo ma humaka kona hi ku vula a ku: “Ndzi ri eka n’wina, Muxe a nga mi nyikanga xinkwa lexi humaka etilweni, kambe Tata wa mina u mi nyika xinkwa xa ntiyiso lexi humaka etilweni. Hikuva xinkwa xa Xikwembu hi loyi a xikaka hi le tilweni, a tisa vutomi emisaveni.” Leswi a va nga swi twisisi leswi a swi vulaka, va n’wi kombela va ku: “Hosi, hi nyike xinkwa lexi hi masiku.” (Yohane 6:32-34) Kambe hi xihi “xinkwa” lexi Yesu a vulavulaka hi xona?

U ri: “Hi mina xinkwa xa vutomi. Loyi a taka eka mina a nge pfuki a khomiwe hi ndlala naswona loyi a nga ni ripfumelo eka mina a nge pfuki a khomiwe hi torha. Kambe hilaha ndzi mi byeleke hakona, a mi tshembi hambileswi mi ndzi vonaka. . . . Ndzi xike hi le tilweni ku ta endla ku rhandza ka loyi a ndzi rhumeke, ku nga ri ka mina. Loyi a ndzi rhumeke u rhandza leswaku ndzi nga lahlekeriwi ni hi un’we eka lava a ndzi nyikeke vona, kambe ndzi fanele ndzi va pfuxa eka lava feke hi siku ro hetelela. Hikuva Tata wa mina u lava leswaku loyi a amukelaka N’wana ivi a va ni ripfumelo eka yena, a kuma vutomi lebyi nga heriki.”—Yohane 6:35-40.

Leswi swi hlundzukisa vanhu ni ku endla Vayuda va sungula ku n’unun’uta hi yena. A nga vurisa ku yini leswaku i “xinkwa lexi humaka etilweni”? (Yohane 6:41) Eka vona ko va n’wana loyi a velekiweke hi vatswari lava humaka emutini wa Galeliya, eNazareta. Vanhu va vutisa va ku: “Xana loyi a hi Yesu n’wana wa Yosefa, loyi vatswari vakwe hi va tivaka?”—Yohane 6:42.

Yesu u va hlamula a ku: “Tshikani ku n’unun’uta. A ku na munhu loyi a nga taka eka mina handle ka loko Tatana, loyi a ndzi rhumeke, a n’wi koka naswona ndzi ta n’wi pfuxa eku feni hi siku ro hetelela. Vaprofeta va tsale va ku: ‘Hinkwavo va ta dyondzisiwa hi Yehovha.’ Loyi a yingiseke Tatana a tlhela a dyondza u ta eka mina. A ku na loyi a voneke Tatana, handle ka loyi a humaka eka Xikwembu; yoloye u n’wi vonile Tatana. Hakunene ndzi tiyisile ndzi ri eka n’wina, loyi a nga ni ripfumelo u ta kuma vutomi lebyi nga heriki.”—Yohane 6:43-47; Esaya 54:13.

Loko Yesu a vulavula na Nikodema, u vulavule hi vutomi lebyi nga heriki ivi a byi fanisa ni ku va ni ripfumelo eka N’wana wa munhu, a ku: ‘Loyi a pfumelaka eka N’wana wa Xikwembu loyi a tswariweke a ri swakwe, a nge lovisiwi kambe u ta kuma vutomi lebyi nga heriki.’ (Yohane 3:15, 16) Sweswi u vulavula ni vanhu vo tala ivi a va byela leswaku u hoxa xandla eku endleni ka leswaku va kuma vutomi lebyi nga heriki, ku nga nchumu lowu manna kumbe xinkwa lexi nga kona eGaleliya swi nga taka swi nga swi koti ku va nyika vutomi. Hikwalaho, xana vutomi lebyi nga heriki byi ta kumiwa njhani? Yesu u phindha marito yakwe a ku: “Hi mina xinkwa xa vutomi.”—Yohane 6:48.

Bulo leri ra xinkwa lexi humaka etilweni ri ya emahlweni ri fika ni le tindhawini ta le kule loko Yesu a ri karhi a dyondzisa esinagogeni ya le Kapernawume.