Ndzima 55

Vadyondzisiwa Vo Tala Va Tshika Ku Landzela Yesu

YESU u dyondzisa esinagogeni eKapernawume mayelana ni xiyenge xa yena tanihi vuswa bya ntiyiso lebyi humaka etilweni. Entiyisweni nkulumo ya yena yi yisa bulo leri sunguriweke hi vanhu loko va n’wi kumile eku vuyeni ka vona etlhelweni ra vuxa ra Lwandle ra Galeliya emahlweni, laha va dyeke swinkwa ni tinhlampfi leti lunghiseleriweke hi hlori.

Yesu u yisa tinhlamuselo takwe emahlweni, a ku: “Vuswa lebyi nga ta nyikiwa hi mina, i nyama yanga; ndzi yi nyika leswaku misava yi va ni vutomi.” Malembe mambirhi ntsena emahlweni, hi ximun’wana xa 30 C.E., Yesu u byele Nikodema leswaku Xikwembu xi rhandzile misava swonghasi lerova xi nyikela N’wana wa xona tanihi Muponisi. Xisweswo, Yesu kutani u kombisa leswaku munhu un’wana ni un’wana wa misava loyi a dyaka nyama ya yena hi ku fanekisela, hi ku kombisa ripfumelo eka gandzelo leri a a ta ri endla hi ku hatlisa, a nga amukela vutomi lebyi nga heriki.

Hambi swi ri tano, vanhu va khunguvanyisiwa hi marito ya Yesu. Va vutisa va ku: “Xana munhu loyi a nga hi nyikisa ku yini nyama ya yena leswaku hi dya xana?” Yesu u lava leswaku vayingiseri va yena va twisisa leswaku ku dya nyama ya yena ku ta endliwa hi ndlela yo fanekisela. Kutani, leswaku a kandziyisa leswi, u vula nchumu lowu wa ha kanakanisaka ngopfu loko wu tekiwa hi ndlela ya xiviri.

Yesu u ri: “Loko mi nga dyi nyama ya N’wana-wa-Munhu, ni loko mi nga nwi ngati ya yena, a mi na vutomi eka n’wina. Loyi a dyaka nyama ya nga ni ku nwa ngati ya nga, ú ni vutomi lebyi nga heriki, kutani mina ndzi ta n’wi pfuxa hi siku ra makumu. Hikuva nyama ya nga i swakudya swa xiviri, ni ngati ya nga i swakunwa swa xiviri. Loyi a dyaka nyama ya nga ni ku nwa ngati ya nga ú tshama eka mina na mina ndzi tshama eka yena.”

Entiyisweni, dyondzo ya Yesu a yi ta twala yi hoxe ngopfu loko a a ringanyeta ku dya vanhu. Kavula, kambe Yesu a nga yimeleli ku dya nyama ni ku nwa ngati ka xiviri. U kandziyisa ntsena leswaku hinkwavo lava amukelaka vutomi lebyi nga heriki va fanele ku kombisa ripfumelo eka gandzelo leri a nga ta ri endla loko a nyiketela miri wa yena wa munhu lowu hetisekeke ni ku halata ngati ya yena ya vutomi. Kambe, hambi va ri vo tala va vadyondzisiwa va yena a va ringeti ku twisisa dyondzo yakwe kutani va kaneta va ku: “Rito leri ra nonon’hwa; i mani la nga ri tiyelaka xana?”

Hi ku tiva leswaku vo tala va vadyondzisiwa va yena va n’unun’uta, Yesu u ri: “Xana mhaka leyi ya mi khunguvanyisa xana? Swi ta ku yini, siku mi vonaka N’wana-wa-Munhu a tlhandluka a ya laha a a ri kona ni khale xana? . . . Marito lawa ndzi mi byelaka wona, i moya ni vutomi. Hambi swi ri tano, van’wana exikarhi ka n’wina a va pfumeli.”

Yesu u ya emahlweni a ku: “Hikwalaho ndzi mi byeleke, ndzi ku: A ku na munhu loyi a nga taka ka mina, loko a nga nyikiwanga swona hi Tatana.” Kutani, vo tala va vadyondzisiwa va yena va famba ivi va nga ha tlheli va n’wi landza. Kutani Yesu u hundzulukela eka vaapostola va yena va 12 naswona wa vutisa a ku: “Xana na n’wina mi lava ku famba xana?”

Petro wa hlamula a ku: “Hosi, hi nga ya ka mani xana? U ni marito ya vutomi lebyi nga heriki. Kutani hina hi ni ku pfumela, ni ku swi tiva leswaku hi wena Muhlawuleki wa Xikwembu.” Mayana xikombiso lexinene swonghasi xa vutshembeki, hambi leswi Petro ni vaapostola van’wana va nga ha vaka va nga twisisanga dyondzo ya Yesu emhakeni leyi hi laha ku teleke!

Hambi leswi a tsakisiweke hi nhlamulo ya Petro, Yesu wa xiya a ku: “Xana a hi mina ndzi nga mi hlawula, n’wina lava khume na vambirhi? Kasi un’wana wa n’wina i xirha!” U vulavula hi Yudasi Iskariyota. Kumbexana eyinhleni leyi Yesu u paluxela Yudasi “masungulo,” kumbe ku sungula ka ndlela yo homboloka.

Yesu wa ha ku khomisa vanhu tingana hi ku ala matshalatshala ya vona yo n’wi endla hosi, naswona va nga ha va va anakanya ku, ‘Xana loyi a nga va Mesiya hi ndlela yihi loko a nga amukeli xiyimo lexi faneleke xa Mesiya?’ Nakambe, leswi a swi ta va mhaka leyintshwa emiehleketweni ya vanhu. Yohane 6:51-71; 3:16.

▪ Xana Yesu u nyika vamani nyama yakwe, naswona xana lava va ‘dya nyama yakwe’ hi ndlela yihi?

▪ I marito wahi man’wana ya Yesu lawa ya chavisaka vanhu, hambi swi ri tano xana u kandziyisa yini?

▪ Loko lavo tala va tshika ku landzela Yesu, xana nhlamulo ya Petro hi yihi?