Marito Ya Yesu Ma Tsema Vanhu Vo Tala Nhlana

Esinagogeni ya le Kapernawume, Yesu u dyondzisa hi mhaka ya leswaku yena i xinkwa xa ntiyiso lexi humaka etilweni. Marito yakwe ma engetela eka leswi a swi byelaka vanhu lava teke va huma hi le vuxeni bya Lwandle ra Galeliya, lava dyeke swinkwa ni tihlampfi leti a va nyikeke tona.

Yesu u ya emahlweni ni bulo rakwe a ku: “Vakokwa wa n’wina va dye manna emananga kambe va file.” Leswaku a kombisa ku hambana loku nga kona, u va hlamusela a ku: “Hi mina xinkwa lexi hanyaka lexi humaka hi le tilweni. Loko munhu a dya xinkwa lexi u ta hanya hilaha ku nga heriki; naswona ku tlula kwalaho, miri wa mina i xinkwa lexi ndzi nga ta xi nyikela ku ponisa vutomi bya vanhu.”—Yohane 6:48-51.

Hi ximun’wana xa 30 C.E., Yesu u byele Nikodema leswaku Xikwembu xi rhandze misava swinene xi kala xi nyikela hi N’wana wa xona leswaku a va Muponisi. Sweswi Yesu u kandziyisa mhaka yo dya nyama yakwe hi ku va ni ripfumelo eka gandzelo rakwe leri a ta ri endla. Yoleyo i ndlela yo kuma vutomi lebyi nga heriki.

Hambiswiritano, vanhu a va yimi na wona marito ya Yesu. Va vutisa va ku: “Xana wanuna loyi a nga hi nyika nyama yakwe hi dya hi ndlela yihi?” (Yohane 6:52) Yesu u lava va twisisa leswaku mhaka leyi a yi vulavulaka a hi ya xiviri. Leswi a swi vulaka endzhaku swi kombisa leswi sweswo swi vulaka swona.

“Loko mi nga dyi nyama ya N’wana wa munhu mi tlhela mi nwa ngati yakwe, a mi na vutomi. Loyi a dyaka nyama ya mina a tlhela a nwa ngati ya mina u ni vutomi lebyi nga heriki, . . . hikuva nyama ya mina i swakudya swa ntiyiso ni ngati ya mina i swakunwa swa ntiyiso. Loyi a dyaka nyama ya mina a tlhela a nwa ngati ya mina u ni vun’we na mina, na mina ndzi ni vun’we na yena.”—Yohane 6:53-56.

Anakanya ndlela leyi sweswo swi va hlundzukisaka hayona Vayuda lava yingiseleke! Kumbexana va ehleketa leswaku Yesu u seketela mhaka ya ku dya nyama ya vanhu van’wana kumbe ku tlula nawu wa Xikwembu mayelana ni ku dya ngati. (Genesa 9:4; Levhitika 17:10, 11) Yesu a nga vulavuli hi ku dya nyama kumbe ku nwa ngati ya xiviri. Kambe u vula leswaku hinkwavo lava lavaka vutomi lebyi nga heriki va fanele va va ni ripfumelo eka gandzelo leri a nga ta ri nyikela loko a nyikela miri wakwe lowu nga riki na xidyoho ni ku halata ngati yakwe. Hambiswiritano, vo tala va vadyondzisiwa vakwe a va yi twisisi dyondzo leyi. Van’wana va ri: “Mhaka leyi yi tsema nhlana; a hi swi lavi ku yi twa.”—Yohane 6:60.

Yesu u xiya leswaku van’wana va vadyondzisiwa vakwe va n’unun’uta kutani u va vutisa a ku: “Xana mhaka leyi ya mi khunguvanyisa? Hikwalaho, xana mi ta endla yini loko mi vona N’wana wa munhu a tlhandlukela laha a a ri kona eku sunguleni? . . . Marito lawa ndzi mi byeleke wona ma huma eka moya lowo kwetsima naswona ma ta mi nyika vutomi. Kambe ku ni van’wana va n’wina lava nga riki na ripfumelo.” Sweswo swi endle leswaku vadyondzisiwa vo tala va famba ivi va tshika ku n’wi landzela.—Yohane 6:61-64.

Hiloko Yesu a vutisa vadyondzisiwa vakwe va 12 a ku: “Xana na n’wina a mi swi lavi ku famba?” Petro u n’wi hlamula a ku: “Hosi, hi ta ya eka mani? Hi wena loyi a nga ni marito lama nga ni vutomi lebyi nga heriki. Ha ku tshemba naswona ha swi tiva leswaku u Mukwetsimi loyi a humaka eka Xikwembu.” (Yohane 6:67-69) Mawaku xikombiso xa ku tshembeka ka Petro, hambileswi hi nkarhi wolowo yena ni vaapostola lavan’wana a va nga swi twisisi hi ku helela leswi Yesu a ri ku swi dyondziseni hi mhaka leyi!

Hambileswi Yesu a tsakisiwaka hi nhlamulo ya Petro, u vutisa a ku: “Xana a hi mina ndzi nga hlawula n’wina va 12? Kambe un’wana wa n’wina u ta ndzi xenga.” (Yohane 6:70) Yesu u vulavula hi Yudasi Iskariyota. Kumbexana Yesu se wa swi vona leswaku Yudasi u sungula ku va ni ku navela ko biha.

Nilokoswiritano, swi n’wi tsakisile Yesu ku tiva leswaku Petro ni vaapostola lavan’wana a va pfumelanga ku kuceteriwa leswaku va tshika ku n’wi landzela ni ku katseka eka ntirho lowu ponisaka vutomi lowu a wu endlaka.