Ndzima 76

Ku Dya Ni Mufarisi

ENDZHAKU Yesu u hlamula vaxopaxopi lava kanakanaka xihlovo xa matimba yakwe yo hanyisa munhu la nga kotiki ku vulavula, Mufarisi u n’wi rhambela eswakudyeni. Loko va nga si dya, Vafarisi va nghenela mukhuva wo hlamba mavoko ya vona ku ya fika eswikokolweni. Va endla leswi emahlweni ni le ndzhaku ka swakudya hambi ku ri exikarhi ka swiendlakalo. Hambi leswi mukhuva lowu wu nga tluriki nawu lowu tsariweke wa Xikwembu, wu hundzeleta leswi Xikwembu xi swi lavaka emhakeni ya ku basa ka mahanyelo lamanene.

Loko Yesu a hluleka ku hlayisa mukhuva lowu, muamukeri wakwe wa hlamala. Hambi leswi ku hlamala kakwe ku nga ha vaka ku nga hlamuseriwi hi marito, Yesu wa ku vona ivi a ku: “Sweswi ke, n’wina Vafarisi, mi hlantswa ndzheko ni nkambana ehandle, kasi endzeni mi tele makwanga ni lunya. Swihunguki ndzin’wina! Loyi a nga endla swa le handle, xana a nga endlanga ni swa le ndzeni?”

Yesu xisweswo u paluxa vukanganyisi bya Vafarisi lava hi ku ya hi mukhuva lowu va hlambaka mavoko ya vona kambe va hluleka ku hlantswa vuhomboloki etimbilwini ta vona. Wa tshinya a ku: “Nyikani swilo leswi nga endzeni ka swibya eka swisiwana, hi kona hinkwaswo swi nga ta va swi basile eka n’wina.” Ku nyika ka vona ku fanele ku susumetiwa hi mbilu leyi nga ni rirhandzu, hayi hi ku navela ku hlamarisa van’wana hi ku kanganyisa ka vona ka vululami.

Yesu u ya emahlweni a ku: “Mi ni khombo n’wina Vafarisi, hikuva mi humesa vukhume bya ximbowa-mbowani, ni bya mbowa, ni bya matsavu hinkwawo, kasi a mi na mhaka ni ku lulama ni rirhandzu ra Xikwembu! A mi fanerile ku endla swilo leswi, loko mi ri karhi mi endla ni leswiya swin’wana.” Nawu wa Xikwembu eka Israyele wu lava ku hakela vukhume, kumbe xiyenge xa vukhume, xa leswi humesiwaka emasin’wini. Mint na rue i swimilana leswintsongo kumbe timitsu leti tirhisiwaka eku nandzihiseni ka swakudya. Vafarisi va hakela vukhume bya hambi ku ri timitsu leti nga riki ta nkoka hi vukheta, kambe Yesu wa va sola hi ku honisa xilaveko xa nkoka swinene xo kombisa rirhandzu, xo kombisa musa ni ku titsongahata.

Loko a va sola ku ya emahlweni, Yesu u ri: “Mi ni khombo n’wina Vafarisi, hikuva mi rhandza switshamo swa le mahlweni emasinagogeni, ni ku xewetiwa hi mafundza emintsendzeleni. ‘Mi ni khombo, hikuva mi fana ni masirha lama nga vonakiki, lawa vanhu va ma kandziyelaka va nga ma tivi!” Thyaka ra vona a ri le rivaleni. Vukhongeri bya Vafarisi byi ni xikombiso xa le handle kambe byi hava ku faneleka ka le ndzeni! Byi seketeriwe evukanganyisini.

Loko a yingise ku sola ko tano, mudyondzisi wa nawu, un’wana wa lava va tivaka Nawu wa Xikwembu, wa vilela a ku: “Mudyondzisi, loko u vula sweswo, wa hi sandza na hina.”

Yesu u vona vatshila lava eNawini va ri ni vutihlamuleri na vona, a ku: “Mi ni khombo na n’wina vadyondzisi va Nawu, hikuva mi rhwexa vanhu mindzhwalo leyo tika, kasi n’wina a mi khumbi mindzhwalo yoleyo hi rintiho hambi ri ri rin’we. Mi ni khombo na n’wina, hikuva mi akela masirha ya vaprofeta lava nga dlayiwa hi vatata wa n’wina.”

Mindzhwalo leyi Yesu a yi boxaka i mikhuva leyi nga tsariwangiki, kambe vadyondzisi lava va nawu a va nga ta wu tlakusa nikantsongo nawunyana wun’we ntsena ku olovisela vanhu. Yesu u paluxa leswaku va pfumelelana ni mudlayi wa vaprofeta, kutani wa tsundzuxa a ku: “Ngati ya vaprofeta hinkwavo leyi halatiweke ku sukela loko misava yi tumbuluka, yi ta tlhela yi laviwa eka rixaka leri, ku sungula hi ngati ya Avele, ku hetelela hi ngati ya Zakariya, la nga dlayiwa exikarhi ka altari ni tempele. Ina, ndza mi byela ndzi ri: Yi ta laviwa eka rixaka leri.”

Misava ya vanhu lava kutsulekaka yi ve ni masungulo ya yona eku tswariweni ka vana va Adamu na Evha; xisweswo, Avele u hanye “ku sukela loko misava yi tumbuluka.” Endzhaku ka ku dlayiwa ka Zakariya hi tihanyi, vuthu ra Asiriya ri thyakise Yuda. Kambe Yesu u vhumba ku thyakisiwa loku nyanyaka ka rixaka ra yena n’wini hikwalaho ka vuhomboloki bya rona lebyikulu. Ku thyakisa loku ku humelela kwalomu ka malembe ya 38 endzhakunyana, hi 70 C.E.

Loko a ya emahlweni ni ku sola kakwe, Yesu u ri: “Mi ni khombo n’wina vadyondzisi va Nawu, hikuva mi tekile mpfungura wa vutivi; kambe a mi nghenanga, kutani mi siverile lava a va lava ku nghena.” Vatshila va Nawu va bohiwa hi ntirho ku hlamusela Rito ra Xikwembu evanhwini, va paluxa nhlamuselo ya rona. Kambe va hluleka ku endla leswi naswona va tekela ni vanhu nkarhi wo twisisa.

Vafarisi ni vatshila lava nga enawini va hlundzukela Yesu hikwalaho ka ku va paluxa. Loko a huma endlwini, va sungula ku n’wi kaneta hi matimba ni ku n’wi rhendzela hi swivutiso. Va ringeta ku n’wi phasela ku vula nchumu lowu va nga n’wi khomaka ha wona. Luka 11:37-54; Deuteronoma 14:22; Mikea 6:8; 2 Tikronika 24:20-25.

▪ Ha yini Yesu a sola Vafarisi ni vatshila va Nawu?

▪ I mindzhwalo yihi leyi vadyondzisi va nawu va yi vekaka evanhwini?

▪ “Loko misava yi tumbuluka” a ku ri rini?