A Dya Ni Mufarisi

Loko Yesu a ri eYudiya, u amukela xirhambo xa ku ya dya ni Mufarisi. Swi tikomba a rhambiwe ninhlikanhi, ku nga ri hi nkarhi wa swakudya swa nimadyambu. (Luka 11:37, 38; ringanisa Luka 14:12.) Loko va nga si dya, Vafarisi va rhanga hi ku hlamba mavoko va fika exikokolweni hi ku landza mukhuva wa vona. Kambe Yesu a nga endli tano. (Matewu 15:1, 2) Mahlambelo wolawo a ma lwisani ni Nawu wa Xikwembu naswona a hi nchumu lowu Xikwembu xi languteleke leswaku wu endliwa.

Mufarisi u hlamarisiwa hileswi Yesu a nga wu landzeliki mukhuva wolowo. Yesu u xiya leswi nga eku endlekeni, hiloko a ku: “N’wina Vafarisi, mi basisa xinwelo ni ndyelo ehandle, kambe endzeni mi tele makwanga ni vuhomboloki. N’wina vanhu lava nga anakanyiki! Loyi a endleke swa le handle xana a nga endlanga ni swa le ndzeni?”—Luka 11:39, 40.

Ku hlamba mavoko loko munhu a lava ku dya a hi xiphiqo kambe xiphiqo i ku swi hundzula nawu wa Xikwembu. Vafarisi ni vanhu van’wana lava hlambaka mavoko hi ku landza mukhuva wa vona, va tsandzeka ku basisa timbilu ta vona ku nga ku tshika ku endla swilo swo biha. Hikwalaho, Yesu u va tshinya a ku: “Loko u lava ku nyika swisiwana tinyiko, swi nyike swi huma embilwini kutani u ta va loyi a baseke eka swilo hinkwaswo.” (Luka 11:41) Sweswo i ntiyiso! Ku nyika swi fanele swi huma embilwini, ku nga ri ku navela ku tsakisa van’wana hi ku tiendla munhu lonene.

A swi vuli swona leswaku vavanuna lava va tsonana. Yesu u ri: “Mi nyikela vukhume bya musuzwana, mbowa ni swimilana swin’wana leswi byariwaka, kambe mi honisa vululami ni ku rhandza Xikwembu! Swilo leswi a mi boheka ku swi endla, kambe a mi nga fanelanga ku honisa leswin’wana.” (Luka 11:42) Nawu wa Xikwembu a wu lerisa ku humesa vukhume bya leswi tshoveriweke. (Deteronoma 14:22) Sweswo a swi katsa misuzwana, mbowa, swimilana ni swibyariwa swin’wana swa rihanyo leswi nandzihisaka swakudya. Vafarisi a va nga rivali ku humesa vukhume bya swibyariwa leswi kambe xana sweswo swi vula leswaku a va nga fanelanga va endla swilo swa nkoka leswi Nawu a wu lava swona swo fana ni ku kombisa vululami ni ku titsongahata eka Xikwembu?—Mikiya 6:8.

Yesu u ya emahlweni a ku: “Khombo eka n’wina Vafarisi, hikuva mi rhandza switulu swa le mahlweni emasinagogeni ni ku xewetiwa etimakete! Mi ni khombo, hikuva mi fana ni masirha lama nga ha vonakiki, lawa vanhu va fambaka ehenhla ka wona va nga swi tivi!” (Luka 11:43, 44) Entiyisweni, masirha yo tano a ma ta phija vanhu va wa ivi va va lava thyakeke hi ku ya hi mukhuva wa vona. Yesu u tirhisa mhaka leyi ku hlamusela leswaku ku thyaka ka Vafarisi a ku vonaki.—Matewu 23:27.

Wanuna un’wana la tivaka Nawu wa Xikwembu u gungula a ku: “Mudyondzisi, loko u vula sweswo na hina wa hi rhukana.” Kambe vavanuna volavo va fanele va swi xiya leswaku va tsandzeka ku pfuna vanhu. Yesu u ri: “Mi ni khombo na n’wina vativi va Nawu, hikuva mi rhwexa vanhu mindzhwalo yo tika, kambe n’wina a mi yi khumbi hambi ku ri hi ritiho! Mi ni khombo hikuva mi aka masirha ya vaprofeta, kambe va dlayiwe hi vakokwa wa n’wina!”—Luka 11:45-47.

Mindzhwalo leyi Yesu a vulavulaka hi yona i mikhuva ni ndlela leyi Vafarisi va hlamuselaka Nawu hayona. Vavanuna lava va tikisela vanhu vutomi. Va va sindzisa ku hlayisa mikhuva leyi yi va tikiselaka. Vakokwa wa vona va dlaye vaprofeta va Xikwembu, ku sukela eka Avele ku ya emahlweni. Kambe sweswi va endla onge va xixima vaprofeta hi ku va akela maribye emasirheni hileswi va tekelelaka mikhuva ni swiendlo swa vakokwa wa vona. Sweswi se va lava ni ku dlaya muprofeta lonkulu wa Xikwembu. Yesu u vula leswaku rixaka leri ri ta tihlamulela eka Xikwembu. Sweswo swi endlekile endzhaku ka malembe ya kwalomu ka 38, hi 70 C.E.

Yesu u ya emahlweni a ku: “Khombo eka n’wina vativi va Nawu, hikuva mi teke xikhiya lexi pfulelaka vanhu ku tiva Xikwembu. N’wina a mi ngheni naswona mi sivela lava lavaka ku nghena!” (Luka 11:52) Vavanuna lava hi vona va faneleke va dyondzisa vanhu Rito ra Xikwembu kambe a va na mhaka ni ku va pfuna ku ri tiva ni ku ri twisisa.

Xana Vafarisi ni vatsari va angula njhani loko va twa mhaka leyi? Loko Yesu a ri karhi a famba, va sungula ku n’wi kaneta hi vukarhi ni ku n’wi tlhava hi swivutiso. A va n’wi vutiseli ku kuma vutivi. Kambe va lava leswaku Yesu a vula swo karhi leswi nga ta va nyika xivangelo xo n’wi pfalela ekhotsweni.