Ndzima 77
Mphikamakaneta Ya Ndzhaka
VANHU entiyisweni va swi tiva leswaku Yesu a a ri eku dyeni endlwini ya Mufarisi. Kutani va hlengeletana ehandle hi magidi naswona va yimele nkarhi lowu Yesu a nga ta huma ha wona. Ku hambana ni Vafarisi lava kanetaka Yesu ni ku ringeta ku n’wi phasela ku vula xin’wana lexi hoxeke, vanhu va n’wi yingisela swinene hi ku tlangela.
Loko a rhanga hi ku hundzulukela eka vadyondzisiwa va yena, Yesu u ri: “Tivoneleni, eka comela xa Vafarisi, byi nga vukanganyisi.” Hi laha swi kombisiweke ha kona hi nkarhi wa swakudya, mafambiselo hinkwawo ya vukhongeri bya Vafarisi ma tele hi vukanganyisi. Kambe hambi leswi vuhomboloki bya Vafarisi byi nga ha fihliwaka hi ku kombisa vunene, eku heteleleni byi ta paluxeka. “A ku na xilo lexi funengetiweke,” ku vula Yesu, “lexi nga ta ka xi nga fununguriwi, ni xilo xa xihundla, lexi nga ta ka xi nga tiviwi.”
Yesu u ya emahlweni a phindha xikhutazo lexi a xi nyikeke eka lava va 12 loko a va rhuma epfhumbeni ro chumayela ra Galeliya. U ri: “Mi nga tshuki mi chava lava dlayaka miri, va ri hava leswi va nga engetaka va swi endla ku tlula sweswo.” Leswi Xikwembu xi nga rivaliki hambi ku ri xindzingiri xin’we, Yesu u tiyisekisa valandzeri vakwe leswaku Xikwembu xi nge va rivali. U ri: “Loko va mi yisa emasinagogeni, ni ka tindhuna, ni ka tihosi, . . . Moya lowo Kwetsima wu ta mi dyondzisa hi nkarhi wolowo leswi mi fanelaka ku swi vula.”
Wanuna un’wana loyi a nga exikarhi ka ntshungu wa vulavula. “Mudyondzisi,” wa kombela, “lerisa makwerhu leswaku hi avelana ndzhaka.” Nawu wa Muxe wu tiyisa leswaku n’wana wa mufana wa mativula u fanele ku kuma swiphemu swimbirhi swa ndzhaka, kutani a ku nga fanelanga ku va ni xivangelo xo holova. Kambe wanuna loyi entiyisweni u lava leswi tlulaka xiyenge xa yena xa le nawini xa ndzhaka.
Yesu hi laha ku faneleke u ala ku katseka. “Munhu ndziwena! Xana i mani la nga ndzi veka muavanyisi kumbe muaveri ehenhla ka n’wina?” ku vutisa yena. Kutani u nyikela xitsundzuxo lexi xa nkoka eka ntshungu a ku: “Tlharihani mi tivonela eka makwanga wahi ni wahi, hikuva vutomi bya munhu a byi humi eka swilo leswi a swi fuweke hambi loko swi n’wi talele ngopfu.” Ina, ku nga khathariseki leswaku munhu a nga va ni swo tala ku fikela kwihi, kahle-kahle u ta fa ivi a swi siya. Ku kandziyisa mhaka leyi, kun’we ni ku kombisa vuphukuphuku byo hluleka ku aka ku twala lokunene na Xikwembu, Yesu u tirhisa xikombiso. Wa hlamusela:
“Masimu ya munhu wa mufuwi a ma vekile ngopfu; kutani a anakanya embilwini ya yena a ku: ‘Ndzi ta endla yini xana, hikuva a ndzi na laha ndzi nga hlengeletaka kona mavele ya mina?’ Kutani a ku: ‘Ndzi ta endla leswi: ndzi ta ntlhantlha switlati swa mina, ndzi swi kurisa, kutani ndzi ta hlengeleta mavele ya mina ni rifuwo ra mina hinkwaro kona; kutani ndzi ta tibyela ndzi ku: Munhu wo kateka, u ni swilo leswo tala, leswi hlengeleteriweke malembe layo tala, wisa, u dya, u nwa, u tsaka.’ Kambe Xikwembu xi ku ka yena: ‘Wee xihunguki! Hi vusiku byebyi, u ta tekeriwa moya wa wena; kutani leswi u swi lunghiseleleke swi ta va swa mani xana?’”
Loko a dlayelela, Yesu u ri: “Swi tano ni ka loyi a tihlengeletelaka xuma, a nga fuweri Xikwembu.” Hambi leswi vadyondzisiwa va nga ha vaka va nga phasiwi hi vuhunguki bya ku hlengeleta rifuwo, hikwalaho ka swilaveko swa siku na siku swa vutomi va nga hambukisiwa hi ku olova eku tirheleni ka Yehova hi mbilu hinkwayo. Kutani Yesu u tirhisa nkarhi lowu ku phindha ndzayo leyinene leyi a yi nyikeleke eku sunguleni kwalomu ka lembe na hafu eka Dyondzo ya le Ntshaveni. Loko a hundzulukela eka vadyondzisiwa va yena, u ri:
“Hikokwalaho ndzi nge ka n’wina: Mi nga tshuki mi vilela hi swa vutomi bya n’wina leswaku mi ta dya yini, hambi ku ri ku vilela hi swa miri leswaku mi ta ambala yini. . . . Anakanyani mawukuwuku: a ma byari, a ma tshoveri, a ma na ngula kumbe xitlati; kambe Xikwembu xa ma phamela. . . . Langutani hi laha makhon’wa ma milaka ha kona: a ma tirhi, a ma swuli; kambe ndza mi byela leswaku hambi a ri Solomoni evukosini bya yena hinkwabyo, a nga ambalanga tanihi rin’wana ra wona. . . .
“Hikokwalaho mi nga vileli hi leswi mi nga ta dya swona, ni leswi mi nga ta nwa swona, na swona, mi nga kanakani; hikuva swilo sweswo hinkwaswo swi laviwa hi vamatiko; Tata wa n’wina wa swi tiva leswaku ma swi pfumala. Ngopfu-ngopfu lavani Mfumo wa yena, kutani swilo leswi mi ta engeteleriwa swona.”
Marito ya Yesu ma lava ku anakanyiwa swinene ngopfu-ngopfu hi minkarhi ya xihinga xa ikhonomi. Munhu loyi a sungulaka ku hisekela ngopfu swilaveko swa yena swa nyama ivi a sungula ku tsana etimhakeni ta moya, entiyisweni u kombisa ku kayivela ripfumelo eka vuswikoti bya Xikwembu byo phamela malandza ya xona. Luka 12:1-31; Deuteronoma 21:17.
▪ Ha yini, kumbexana, wanuna un’wana a vutisa malunghana ni ndzhaka, naswona i xitsundzuxo xihi lexi Yesu a xi nyikelaka?
▪ I xikombiso xihi lexi Yesu a xi tirhisaka, naswona yinhla ya xona hi yihi?
▪ I ndzayo yihi leyi Yesu a yi phindhaka, naswona ha yini yi fanela?