Ndzima 90

Ntshembo Wa Ku Pfuxiwa

YESU eku heteleleni u fika emindzilakaneni ya Betaniya, muti lowu nga kwalomu ka tikhilomitara tinharhu ku suka eYerusalema. A ku ri masiku ma nga ri mangani ntsena Lazaro a file ni ku lahliwa. Vamakwavo va xisati Mariya na Marta va ha ri eku rileni, naswona vo tala va te ekaya ka vona ku ta va chavelela.

Loko va ha ri eku rileni, un’wana u tivisa Marta leswaku Yesu wa ta. Kutani wa suka ivi a hatlisa a ya n’wi hlanganisa, entiyisweni handle ko byela makwavo wa yena wa xisati. Loko a fika eka Yesu, Marta u phindha leswi yena ni makwavo wa xisati va nga ha vaka va swi vurile hi minkarhi yo tala hi masiku ya mune lama hundzeke: “Loko onge u vile kona, ingi makwerhu a nga fanga.”

Hambi swi ri tano, Marta u phofula ntshembo, a langutele leswaku Yesu a nga ha endla swin’wana eka makwavo. U ri: “Ndza swi tiva leswaku xin’wana ni xin’wana lexi u xi kombelaka eka Xikwembu, Xikwembu xi ta ku nyika.”

“Makwenu ú ta tlhela a pfuka,” ku tshembisa Yesu.

Marta u twisisa Yesu a ri la vulavulaka hi ku pfuxiwa loku taka ka la misaveni, loku Abrahama ni malandza man’wana ya Xikwembu na vona a va langutele kona. Kutani wa hlamula: “Ndza swi tiva leswaku u ta pfuka hi siku ra makumu, eku pfukeni ka vafi.”

Hambi swi ri tano, Yesu u nyika ntshembo wa ku ntshunxeka ka xihatla, a ku: “Hi mina ku pfuka ni vutomi.” U tsundzuxa Marta leswaku Xikwembu xi n’wi nyike matimba ehenhla ka rifu, a ku: “La pfumelaka ka mina, hambi a nga fa, ú ta hanya, kutani un’wana ni un’wana la hanyaka, a va a pfumela ka mina, a nga ka a nga fi ni siku ni rin’we.”

Yesu a nga ringanyeti eka Marta leswaku vanhu lava tshembekeke lava hanyaka hi nkarhi wolowo va nge fi nikantsongo. E-e, kambe yinhla leyi a yi endlaka hi leswaku ku kombisa ripfumelo eka yena ku nga yisa evuton’wini lebyi nga heriki. Vutomi byo tano byi ta tsakeriwa hi vanhu vo tala hikwalaho ka ku pfuxiwa ka vona esikwini ra makumu. Kambe van’wana lava tshembekaka va ta pona makumu ya mafambiselo lawa ya swilo emisaveni, naswona eka lava marito ya Yesu ma ta va ntiyiso hi ku twisisa lokukulu ka xiviri. Va nge fi nikantsongo! Endzhaku ka marito lawa ma xiyekaka, Yesu u vutisa Marta a ku, “Xana wa swi pfumela swo sweswo xana?”

“Ina Hosi,” wa hlamula. “Ndza pfumela leswaku hi wena Mesiya, N’wana wa Xikwembu, loyi a taka laha misaveni.”

Kutani Marta u tsutsumela endzhaku ku ya vitana makwavo wa xisati, a n’wi byela exihundleni a ku: “Mudyondzisi u kwala, wa ku vitana.” Hi ku hatlisa Mariya u huma endlwini. Loko van’wana va n’wi vona a famba, va n’wi landzelela, va ehleketa leswaku u ya esirheni.

Loko a fika eka Yesu, Mariya u wa emilengeni ya yena a ri karhi a rila. U ri: “Hosi, loko a wu vile kona, ingi makwerhu a nga fanga.” Yesu u tlhaveka swinene loko a vona leswaku Mariya na mintshungu ya vanhu lava n’wi landzelelaka va le ku rileni. Wa vutisa: “Mi n’wi vekile kwihi xana?”

Va hlamula va ku: “Hosi, tana u ta vona.”

Yesu na yena wa rila, a vangela Vayuda va ku: “Vonani hi laha a a n’wi rhandza ha kona!”

Van’wana va tsundzuka leswaku tin’hweti ti nga ri tingani emahlweni, hi nkarhi wa Nkhuvo wa Mintsonga, Yesu u horise jaha leri a ri velekiwe ri fe mahlo, ivi va vutisa va ku: “Yena loyi a nga pfula mahlo ya lavo-fe-mahlo, hikwalaho ka yini a nga swi kotanga ku endla leswaku munhu loyi a nga fi xana?” Yohane 5:21; 6:40; 9:1-7; 11:17-37.

▪ Eku heteleleni xana Yesu u fika nkarhi muni ekusuhi na Betaniya, naswona xiyimo hi xihi kwalaho?

▪ I xisekelo xihi lexi Marta a nga na xona xo pfumela eku pfuxiweni ka vafi?

▪ Yesu u khumbekisa ku yini hi rifu ra Lazaro?