“Hi Mina Ndzi Pfuxaka Vafi Ndzi Tlhela Ndzi Va Nyika Vutomi”

Loko a huma ePeriya, Yesu u fika ehandle ka muti wa Betaniya ku nga muti lowu nga kwalomu ka tikhilomitara tinharhu evuxeni bya Yerusalema. Mariya na Marta, vamakwavo vaxisati va Lazaro, va le ku rileni hikwalaho ka rifu rakwe leri ra ha ku endlekaka. Vo tala va tele ku ta va chavelela.

Un’wana u byela Marta leswaku Yesu u le ku teni, hiloko a tsutsuma a ya n’wi hlanganisa. Marta u byela Yesu leswi yena na Mariya a va tshamela ku swi ehleketa masiku lawa ya mune hinkwawo, a ku: “Hosi, loko a wu ri kona, makwerhu a a ta va a nga fanga.” Hambiswiritano, leswi a swi vuli swona leswaku Marta a nga na ntshembo. Marta u ri: “Ndza swi tiva leswaku leswi u swi kombelaka eka Xikwembu, xi ta ku nyika swona.” (Yohane 11:21, 22) Wa swi tiva leswaku Yesu u ta swi kota ku pfuna buti wa yena.

Yesu u hlamula a ku: “Makwenu u ta pfuka.” Marta u ehleketa leswaku u vulavula hi ku pfuxiwa ka nkarhi lowu taka emisaveni, ku nga ntshembo lowu Abrahama ni van’wana a va ri na wona. Nakambe, u kombisa leswaku wa tshemba ku sweswo swi ta endleka hi ku vula a ku: “Ndza swi tiva leswaku u ta pfuka loko ku pfuxiwa lava feke hi siku ro hetelela.”—Yohane 11:23, 24.

Xana Yesu u ta swi kota ku herisa ku vava loku va ku twaka? U tsundzuxa Marta leswaku Xikwembu xi n’wi nyike matimba yo kota ku hlula rifu, hi ku vula a ku: “Loyi a nga ni ripfumelo eka mina, hambiloko o fa u ta tlhela a hanya; naswona loyi a hanyaka a tlhela a va ni ripfumelo eka mina a nge fi.”—Yohane 11:25, 26.

Yesu a nga vuli swona leswaku vadyondzisiwa vakwe lava a va hanya hi nkarhi wolowo a va nga ta fa. Hambi ku ri yena u fanele a fa hilaha a byeleke vaapostola vakwe hakona. (Matewu 16:21; 17:22, 23) Yesu u kandziyisa leswaku loko munhu a va ni ripfumelo eka yena swi ta endla leswaku a kuma vutomi lebyi nga heriki. Vo tala va ta kuma vutomi byebyo loko va pfuxiwa. Kambe vanhu lava tshembekaka lava nga ta va va ha hanya emisaveni leyi swi nga endleka va nga fi. Eka swiyimo leswimbirhi, un’wana ni un’wana loyi a nga ni ripfumelo a nga tiyiseka leswaku a nge he pfuki a fele makumu.

Yesu loyi a nga te, “Hi mina ndzi pfuxaka vafi ndzi tlhela ndzi va nyika vutomi,” xana u ta swi kota ku pfuxa Lazaro loyi se a nga ni masiku a file? Yesu u vutisa Marta a ku: “Xana wa swi tshemba leswi ndzi swi vulaka?” Marta u hlamula a ku: “Ina, Hosi, ndza tshemba leswaku u Kreste N’wana wa Xikwembu, loyi a teke emisaveni.” Leswi a nga ni ripfumelo ra leswaku Yesu u ta endla swo karhi hi siku leri, u tlhelela ekaya hi ku hatlisa ivi a fika a hlevela Mariya a ku: “Mudyondzisi u fikile, wa ku vitana.” (Yohane 11:25-28) Loko a twa sweswo, Mariya wa suka ekaya naswona hi ku hatlisa u landzeriwa hi lava va ehleketaka leswaku u ya esirheni ra Lazaro.

Ku ri na sweswo, Mariya u ya eka Yesu a fika a khinsama emilengeni yakwe a ri karhi a rila kutani a vula leswi Marta a swi vuleke a ku: “Hosi, loko a wu ri kona laha, makwerhu a ta va a nga fanga.” Loko a vona Mariya ni mitshungu yi ri karhi yi rila, Yesu u khomiwa hi gome kutani a xiririka mihloti. Sweswo swi va khumbe timbilu. Kambe van’wana va ku: ‘Loko Yesu a kote ku pfula matihlo ya munhu loyi a a nga voni, hikwalaho ka yini a tsandzeke ku endla leswaku Lazaro a nga fi?’—Yohane 11:32, 37.