Ndzima 101
EBetaniya, eNdlwini Ya Simoni
LOKO Yesu a suka eYeriko, u kongoma eBetaniya. Riendzo ri teka xiphemu lexikulu xa siku, tanihi leswi ku nga ku gonya ka kwalomu ka 19 wa tikhilomitara eka xitsunga lexo nonon’hwa. Yeriko yi kwalomu ka 250 wa timitara ehansi ka vuandlalo bya lwandle, naswona Betaniya yi kwalomu ka 760 wa timitara ehenhla ka vuandlalo bya lwandle. U nga ha tsundzuka leswaku Betaniya i kaya ra Lazaro ni vamakwavo va xisati. Muti lowuntsongo wu kwalomu ka tikhilomitara tinharhu ku sukela eYerusalema, wu ri exiehlweni xa le vuxeni xa Ntshava ya Mitlhwari.
Vo tala ana se va fikile eYerusalema va tela Paseka. Va tile ka ha ri na nkarhi leswaku va tibasisa hi ndlela leyi xiximekaka. Kumbexana va khumbe ntsumbu kumbe ku endla xin’wana lexi va nyamisaka. Kutani va landzela maendlelo yo tibasisa leswaku va dya Paseka hi ndlela leyi amukelekaka. Loko vanhu lava fikeke eku sunguleni va hlengeletana etempeleni, vo tala va tivutisa ehenhleni ka loko Yesu a ta ta ePasekeni.
Yerusalema i xivandla xa ku kanetana malunghana na Yesu. I vutivi lebyi tolovelekeke leswaku varhangeri va vukhongeri va lava ku n’wi khoma leswaku va n’wi dlaya. Entiyisweni, va nyike swileriso swa leswaku loko un’wana a twelela lomu a nga kona, u fanele ku vika eka vona. Hi makhamba manharhu eka tin’hweti leta ha ku hundzaka—eNkhubyeni wa Mintsonga, eNkhubyeni wa ku Khangula, ni le ndzhaku ka loko a pfuxe Lazaro—varhangeri lava va ringete ku n’wi dlaya. Kutani ke, vanhu va tivutisa va ku, xana Yesu u ta humela erivaleni nakambe ke? “Xana mi ehleketa yini?” va vutisana.
Hi nkarhi lowu fanaka, Yesu u fika eBetaniya masiku ya tsevu emahlweni ka Paseka, leyi nga hi Nisan 14 hi ku ya hi khalendara ya Xiyuda. Yesu u fika eBetaniya kun’wana hi Ravuntlhanu ni madyambu, lama ku nga masungulo ya Nisan 8. A a nga ta endla riendzo ro ya eBetaniya hi Mugqivela hikuva ku teka riendzo hi Savata—ku sukela eku peleni ka dyambu hi Ravuntlhanu ku ya eku peleni ka dyambu hi Mugqivela—swa ariwa hi nawu wa Vayuda. Yesu kumbexana u ya ekaya ra Lazaro, tanihi laha a endleke ha kona emahlweni, naswona u heta vusiku bya Ravuntlhanu kona.
Hambi swi ri tano, muaki un’wana wa Betaniya u rhamba Yesu ni vanghana vakwe eswakudyeni hi Mugqivela ni madyambu. Wanuna loyi i Simoni, khale ka munhu wa nhlokonho, loyi eku sunguleni kumbexana a horisiweke hi Yesu. Leswaku a pfumelelana ni mahanyelo ya yena ya migingiriko, Marta u tirhela vaendzi. Kambe hi ntolovelo, Mariya u yisa nyingiso eka Yesu, nkarhi lowu hi ndlela leyi pfuxaka ku kanetana.
Mariya u pfula xikutsu lexi xi nga ni mafurha yo nun’hwela ya kwalomu ka hafu ya khilogiramu, “murhi wa narda leyinene.” Wona i ya nkoka swinene. Hakunene, ntikelo wa wona wu ringana ni kwalomu ka muholo wa lembe! Loko Mariya a chela mafurha enhlokweni ya Yesu ni le milengeni ya yena ivi a sula milenge ya yena hi misisi yakwe, ku nun’hwela lokunene ku tata yindlu hinkwayo.
Vadyondzisiwa va hlundzukile naswona va vutisa va ku: “Swilo leswi swi halateriwa yini ntsena ke?” Kutani Yudasi Iskariyota u ri: “Hikwalaho ka yini mafurha lawa ma nga xavisiwanga hi tidenari ta 300, mali yi nyikiwa swisiwana, xana?” Kambe Yudasi entiyisweni a nga na mhaka ni swisiwana, hikuva a a ri karhi a yiva enkwameni wa mali leyi hlayisiweke hi vadyondzisiwa.
Yesu u vulavulela Mariya. “N’wi tshikeni,” wa lerisa. “Xana mi n’wi karhatela yini wansati loyi xana? Ú ndzi endlele ntirho lowo saseka. Hikuva, loko swi ri swisiwana, mi ta va na swona hi masiku hinkwawo, kambe mina, ndzi nga ka ndzi nga vi na n’wina hi masiku hinkwawo. Loko a tota miri wa mina hi mafurha lawa, ú endlela siku ra ku lahliwa ka mina. Ndzi tiyisile ndzi ri ka n’wina: Emisaveni hinkwayo laha Evangeli leyi yi nga ta twarisiwa kona, leswi a swi endleke swi ta vuriwa na swona, a anakanyiwa ha swona.”
Yesu sweswi a a ri eBetaniya ku tlula tiawara ta 24, naswona mhaka ya vukona bya yena yi hangalake hinkwako. Hikwalaho, vo tala va ta endlwini ya Simoni leswaku va ta vona Yesu, kambe a va tlhele va tela ku ta vona Lazaro, loyi a nga kona na yena. Kutani vaprista lavakulu va endla makungu ya ku dlaya na Lazaro, hayi Yesu ntsena. Leswi swi hikwalaho ka leswi vanhu vo tala va pfumelaka eka Yesu hikwalaho ko vona loyi a n’wi pfuxeke eku feni a ri karhi a hanya! Entiyisweni, varhangeri lava va vukhongeri va hombolokile swinene! Yohane 11:55–12:11; Matewu 26:6-13; Marka 14:3-9; Mintirho 1:12.
▪ I bulo rihi leri nga kona etempeleni eYerusalema, naswona ha yini?
▪ Ha yini Yesu a fanela ku fika eBetaniya hi Ravuntlhanu ematshan’wini ya Mugqivela?
▪ Loko Yesu a fika eBetaniya, u yi heta kwihi Savata ya yena?
▪ I xiendlo xihi xa Mariya lexi pfuxaka ku kanetana, naswona Yesu u n’wi vulavulela hi ndlela yihi?
▪ I yini lexi kombisaka vuhomboloki lebyikulu bya vaprista lavakulu?