A Dya Swakudya Endlwini Ya Simoni Ebetaniya

Yesu u kongoma eBetaniya loko a suka eYeriko. Riendzo leri ri katsa ku famba 20 wa tikhilomitara endhawini leyi swi tikaka ku famba eka yona. Yeriko yi kwalomu ka 250 wa timitara ehansi ka vuandlalo bya lwandle naswona Betaniya yi kwalomu ka 610 wa timitara ehenhla ka vuandlalo bya lwandle. Lazaro ni vamakwavo vambirhi vaxisati va tshama eximutanini xa Betaniya lexi nga kwalomu ka 3 wa tikhilomitara ku suka eNtshaveni ya Mitlhwari.

Vayuda vo tala se a va fikile eYerusalema hi Paseka. Va fike ka ha ri nkarhi “leswaku va ya tibasisa” loko ku ri leswaku va tshuke va khumba ntsumbu kumbe va endla nchumu lowu nga tengangiki. (Yohane 11:55; Tinhlayo 9:6-10) Van’wana va vanhu lava fikeke ka ha ri ni nkarhi va hlengeletana etempeleni. Va tivutisa loko Yesu a ta va kona eka Paseka.—Yohane 11:56.

Ku ni ku phikizana lokukulu hi Yesu. Varhangeri van’wana va vukhongeri va lava ku n’wi khoma leswaku va ta n’wi dlaya. Entiyisweni, va humese xileriso xa leswaku loyi a nga ta vona Yesu, a va tivisa “leswaku va ta n’wi khoma.” (Yohane 11:57) Varhangeri lava va ringete ku n’wi dlaya endzhaku ka loko Yesu a pfuxe Lazaro. (Yohane 11:49-53) Swa twisiseka leswi van’wana a va kanakana leswaku Yesu a a ta va kona.

Yesu u fike eBetaniya hi Ravuntlhanu, “loko ku sale masiku ya tsevu leswaku ku fika Paseka.” (Yohane 12:1) Siku lerintshwa (Savata, Nisani 8) ri sungula loko dyambu ri pela. Hikwalaho, u hete riendzo Savata yi nga si fika. A a nga ta swi kota ku ya eYeriko hi Savata, ku sukela loko dyambu ri pela hi Ravuntlhanu ku ya fikela loko dyambu ri pela hi Mugqivela hikuva nawu wa Vayuda a wu nga swi pfumeleli sweswo. Swi nga endleka leswaku Yesu u ye ekaya ra Lazaro hilaha a endleke hakona eku sunguleni.

Simoni loyi na yena a tshamaka eBetaniya, u rhamba Yesu ni vanghana vakwe, ku katsa na Lazaro leswaku va ta dya swakudya hi Mugqivela nimadyambu. Simoni, u tiviwa a ri “munhu loyi a nga ni nhlokonho,” kumbexana hileswi a nga tshama a va ni nhlokonho lowu Yesu a wu horiseke. Leswi a nga munhu wa migingiriko, Marta wa gingiriteka loko ku ri ni vaendzi. Mariya u yingisele Yesu hi vurhon’wana naswona sweswo swi pfuxe njhekanjhekisano.

Mariya u pfula xikutsu xa alabasta kumbe xibya lexitsongo lexi khomaka “mafurha yo durha ngopfu, yo nun’hwela lama endliweke hi narda ya xiviri, lawa a ma ri mpimo wa kwalomu ka hafu ya litara.” (Yohane 12:3) Mafurha lawa i ya risima swinene naswona ntikelo wa wona (300 wa tidenari) wu nga ringana ni muholo wa kwalomu ka lembe! Mariya u chela mafurha enhlokweni ya Yesu ni le milengeni yakwe ivi a n’wi sula hi misisi yakwe. Hiloko yindlu hinkwayo yi nun’hwela hi mafurha.

Vadyondzisiwa va hlundzuka ivi va vutisa va ku: “Hikwalaho ka yini mafurha lawa yo nun’hwela ma tlangisiwa?” (Marka 14:4) Yudasi Iskariyota wa karhateka ivi a ku: “Hikwalaho ka yini mafurha lawa yo nun’hwela ma nga xavisiwanga hi tidenari ta 300 kutani ti nyikiwa swisiwana?” (Yohane 12:5) Kahlekahle Yudasi a ngo karhateka hi swisiwana. A tshamela ku yiva mali ebokisini ra mali leri a ri hlayiselaka vadyondzisiwa.

Yesu u sirhelela Mariya, u ri: “Hikwalaho ka yini mi ringeta ku karhata wansati loyi? U ndzi endlele leswinene. Hikuva swisiwana mi ta tshama mi ri na swona kambe mina a mi nge tshami mi ri na mina. Loko wansati loyi a ndzi chela mafurha lawa yo nun’hwela emirini wa mina, a a lulamisela miri wa mina ku lahliwa. Ndzi tiyisile ndzi ri eka n’wina, laha mahungu lawa lamanene ma nga ta chumayeriwa kona emisaveni hinkwayo, leswi wansati loyi a swi endleke swi ta vuriwa, u ta tsundzukiwa ha swona.”—Matewu 26:10-13.

Se swi tlula siku Yesu a ri eBetaniya naswona sweswo a swi dumile. Vayuda vo tala va ta endlwini ya Simoni ku nga ri ku ta vona Yesu ntsena kambe va lava ku vona na Lazaro, “loyi [Yesu] a n’wi pfuxeke eku feni.” (Yohane 12:9) Vaprista lavakulu va kunguhata ku dlaya Yesu na Lazaro. Varhangeri lava va vukhongeri va swi vona leswaku vanhu vo tala va ni ripfumelo eka Yesu hileswi va voneke ku pfuxiwa ka Lazaro. Hakunene varhangeri lava va vukhongeri va hombolokile!