Ndzima 130

Elwandle Ra Galeliya

VAAPOSTOLA sweswi va tlhelela eGaleliya, hi laha Yesu a nga va lerisa ha kona eku sunguleni. Kambe a va tiyiseki hi leswi va faneleke va ya swi endla kwalaho. Endzhaku ka nkarhinyana, Petro u byela Tomasi, Nathaniyele, Yakobo ni makwavo wa yena Yohane, ni vaapostola van’wana vambirhi a ku: “Ndzi ya rhiya tinhlampfi.”

“Na hina hi famba na wena,” ku hlamula lava ntsevu.

Vusiku hinkwabyo, a va koti ku phasa nchumu. Hambi swi ri tano, loko ri sungula ku xa, Yesu wa humelela eribuweni, kambe vaapostola a va swi xiyi leswaku i Yesu. A huwelela: ‘Vana lavantsongo, a mi na swakudya, a swi tano ke?’

Va n’wi hlamula va ku “E-e!”

Kutani a ku: “Hoxelani rikoka hi tlhelo ra xinene ra byatso, mi ta phasa.” Ku te loko va hoxile, a va ha swi koti ku humesa rikoka ra vona hi ku tala ka tinhlampfi.

Yohane a huwelela a ku: “I Hosi!”

Hi ku twa leswi, Petro a funengela nguvu ya yena hikuva a a hluvurile, a tihoxela elwandle, kutani a hlambela mpfhuka wa kwalomu ka timitara ta makume-nkaye ku ya eribuweni. Vaapostola van’wana va landzela hi byatso lebyintsongo, va ri karhi va koka rikoka leri a a ri tele hi tinhlampfi.

Loko va fika eribuweni, a ku ri na ndzilo wa makala ni tinhlampfi ehenhla ka wona naswona ku na xinkwa. Yesu a ku: “Pambulani tinhlampfi tin’wana eka leti ma ha ku ti phasaka sweswi, mi tisa haleno.” Petro a nghena ebyatsweni kutani a kokela rikoka eribuweni. A ri ri na tinhlampfi letikulu ta 153!

Yesu wa va vitana: “Tanani, mi ta fihlula.”

A nga kona eka vona la nga ni xivindzi xo vutisa a ku, “u mani?” hikuva hinkwavo va swi tiva leswaku i Yesu. Loku i ku vonakala ka yena ka vunkombo endzhaku ko pfuka ka yena eku feni, naswona i ravunharhu a humelela eka vaapostola va ri hi ntlawa. Kutani sweswi u va phamela swo fihlula, un’wana ni un’wana a n’wi nyika xinkwa ni nhlampfi.

Loko va hetile ku dya, kumbexana a langute tinhlampfi to tala leti phasiweke, Yesu u vutisa Petro: “Simoni n’wana Yohane xana wa ndzi rhandza ku tlula leswi hinkwaswo ke?” Handle ko kanakana u vula leswaku, xana u namarhele swinene eka bindzu leri ra wena ku tlula ntirho lowu ndzi nga ku lunghiselela wona ku wu tirha?

Petro a hlamula a ku: “Hosi, wa swi tiva leswaku ndza ku rhandza.”

Yesu a hlamula a ku: “Risa swinyimpfana swa mina.”

Ra vumbirhi, nakambe a ku: “Simoni, n’wana Yohane, xana wa ndzi rhandza xana?”

Petro a hlamula a tiyile a ku: “Ina, Hosi, wa swi tiva leswaku ndza ku rhandza.”

Yesu a n’wi lerisa: “Hlayisa tinyimpfu ta mina.”

Nakambe a vutisa ra vunharhu: “Simoni, n’wana Yohane, xana wa ndzi rhandza xana?”

Kambe sweswi Petro u khomiwa hi gome. A nga ha va a ehleketa leswaku Yesu u kanakana vutshembeki bya yena. Phela, loko Yesu a ringiwa emahlweninyana hi vutomi bya yena, Petro u n’wi landzurile kanharhu. Kutani Petro a ku: “Hosi, u tiva hinkwaswo, wa swi tiva leswaku ndza ku rhandza.”

Yesu a n’wi lerisa ra vunharhu: “Risa tinyimpfu ta mina.”

Xisweswo Yesu u tirhisa Petro ku khutaza lavan’wana leswaku va tirha ntirho lowu a lavaka leswaku va wu tirha. Ku nga ri khale u ta suka la misaveni, kutani u lava leswaku va rhangela eku tirheleni ka lava nga ta kondleteriwa etshangeni ra tinyimpfu ta Xikwembu.

Tanihi leswi Yesu a bohiweke ni ku dlayiwa hikuva a a endla ntirho lowu Xikwembu xi n’wi rhumeke ku wu endla, kutani sweswi, wa swi paluxa leswaku Petro u ta tokota leswi fanaka. Yesu wa n’wi byela a ku: “Enkarhini lowu a wa ha ri lontshwa, a wu tiboha hi wexe hi vamba ra wena, u ya lomu u lavaka ku ya kona; kambe loko u tava u dyuharile, u ta tshambuluta mavoko ya wena, kutani un’wana u ta ku boha, a ku yisa lomu u nga laviki ku ya kona.” Ku nga khathariseki ku dlawela ku pfumela loku nga yimela Petro, Yesu wa n’wi khutaza: “Ndzi landze.”

Loko a hundzuluka, Petro u vona Yohane kutani wa vutisa. “Hosi swi ta ku yini hi loyi ke?”

Yesu wa hlamula: “Loko ndzi lava leswaku a tshama ndzi kondza ndzi vuya, swi nga va yini eka wena? Wena, ndzi landze.” Vadyondzisiwa vo tala va teke marito lawa ya Yesu ma vula leswaku muapostola Yohane a nge fi. Hambi swi ri tano, hi laha muapostola Yohane endzhaku a hlamuseleke ha kona, Yesu a a nga vuli leswaku a nge fi, kambe Yesu u te: “Loko ndzi lava leswaku a tshama ndzi kondza ndzi vuya, swi nga va yini eka wena ke?”

Yohane endzhaku u tlhele a nyikela nhlamuselo leyi yi xiyekaka: “Ka ha ri na timhaka tin’wana leto tala leti Yesu a nga tiendla, loko ti nga tsariwa ha yin’we-yin’we, a ndzi tshembi leswaku misava hinkwayo yona yi nga ringana tibuku leti a ti ta tsariwa.” Yohane 21:1-25; Matewu 26:32; 28:7, 10.

▪ I yini lexi kombaka leswaku vaapostola a va tiyiseki hi lexi va faneleke ku ya xi endla eGaleliya?

▪ Vaapostola va n’wi tivise ku yini Yesu eLwandle ra Galeliya?

▪ Yesu u humelele kangani hi mpfhuka a pfuxiwa?

▪ Xana Yesu u swi kandziyisa njhani leswi a lavaka leswaku vaapostola va swi endla?

▪ Yesu u kombisa ndlela leyi Petro a nga ta fa ha yona hi ndlela yihi?

▪ Xana i ku vulavula kwihi ka Yesu hi Yohane loku nga twisisiwangiki hi vo tala va vadyondzisiwa?