Eribuweni Ra Lwandle Ra Galeliya

Eka madyambu yakwe yo hetelela ni vaapostola, Yesu u va byele a ku: “Loko ndzi pfuxiwile, ndzi ta ya eGaleliya mi ta ndzi kuma kona.” (Matewu 26:32; 28:7, 10) Sweswi valandzeri vakwe vo tala va teka riendzo leri kambe va fanele va endla yini eGaleliya?

Hi ku famba ka nkarhi, Petro u byela vaapostola van’wana va tsevu a ku: “Ndzi ya eku phaseni ka tihlampfi. Hinkwavo lava va tsevu va hlamula va ku: “Hi famba na wena.” (Yohane 21:3) A va phasanga nchumu vusiku hinkwabyo. Loko ri sungula ku xa, Yesu wa humelela elwandle kambe a va swi xiyi leswaku i mani. Yesu u huwelela a ku: “Vananga, xana mi na swakudya?” Va hlamula va ku: “A hi na swona!” Yesu a va byela a ku: “Hoxani nete etlhelweni ra xinene ra xikepe mi ta phasa.” (Yohane 21:5, 6) Va phasa tinhlampfi to tala lerova va tsandzeka ni ku koka nete ya vona.

Yohane u byela Petro a ku: “I Hosi!” (Yohane 21:7) Hi ku hatlisa, Petro a boha nguvu yakwe ya le handle leyi a a nga yi ambalanga loko a phasa tinhlampfi. U ti lahlela elwandle ivi a hlambela kwalomu ka 90 wa timitara ku ya eribuweni ra lwandle. Van’wana lava nga exikepeni va n’wi landzela hi ku nonoka, va ri karhi va koka nete leyi taleke hi tinhlampfi.

Loko va fika eribuweni, va vona “ndzilo wa makala ku ri ni tinhlampfi ni xinkwa ehenhla ka wona.” Yesu u ri: “Tisani tin’wana ta tihlampfi leti ma ha ku ti phasaka.” Petro a koka nete a ta na yona eribuweni, yi tele hi tihlampfi letikulu ta 153! Yesu a ku: “Tanani mi ta fihlula.” A ku na munhu ni un’we loyi a nga ni xivindzi xo vutisa a ku: “Hi wena mani?” hikuva va swi xiya leswaku i Yesu. (Yohane 21:10-12) Se swi endla kanharhu a humelela eka vadyondzisiwa vakwe va ri ntlawa.

Yesu u nyika un’wana ni un’wana wa vona xinkwa ni nhlampfi leswaku va dya. Kutani swi tikomba onge u langutisa tinhlampfi leti phasiweke, ivi a vutisa a ku: “Simoni n’wana wa Yohane, xana u ndzi rhandza ku tlula leswi?” Xana Petro u ri rhandza ngopfu bindzu ra ku phasa tinhlampfi ku tlula ntirho lowu Yesu a lavaka leswaku a wu endla? Petro wa hlamula a ku: “Ina Hosi, wa swi tiva leswaku ndza ku rhandza.” Yesu a ku: “Phamela swinyimpfana swa mina.”—Yohane 21:15.

Nakambe, Yesu a vutisa a ku: “Simoni n’wana wa Yohane, xana wa ndzi rhandza?” Kumbexana hikwalaho ko hlamala, Petro u hlamula hi ku tiyimisela a ku: “Ina Hosi, wa swi tiva leswaku ndza ku rhandza.” Yesu u hlamula hi ndlela leyi fanaka a ku: “Risa swinyimpfana swa mina.”—Yohane 21:16.

Yesu a vutisa ra vunharhu a ku: “Simoni n’wana wa Yohane, xana wa ndzi rhandza?” Sweswi Petro a nga ha va a tivutisa loko Yesu a kanakana ku tshembeka kakwe. Petro hi ndlela yo khorwisa u hlamula a ku: “Hosi u tiva swilo hinkwaswo; wa swi tiva leswaku ndza ku rhandza.” Yesu u tlhela vula leswi Petro a faneleke a swi endla, a ku: “Phamela swinyimpfana swa mina.” (Yohane 21:17) Hakunene lava va rhangelaka namuntlha va fanele va tirhela vanhu lava nga entlhambini wa Xikwembu.

Yesu u xanisiwile a tlhela a dlayiwa hileswi a endleke ntirho lowu Xikwembu xi n’wi leriseke leswaku a wu endla. Sweswi u swi veka erivaleni leswaku Petro u ta va ni mahetelelo lama fanaka. Yesu u ri: “Loko wa ha kula a wu tiambexa u tlhela u ya laha u lavaka kona. Kambe loko se u dyuharile, u ta yimisa mavoko u ambexiwa hi munhu un’wana naswona u ta ku yisa laha u nga laviki ku ya kona.” Hambiswiritano, Yesu u n’wi khongotela a ku: “U nga tshiki ku ndzi landzela.”—Yohane 21:18, 19.

Petro u vona muapostola Yohane ivi a vutisa a ku: “Hosi, ku ta endleka yini hi wanuna loyi?” Ina, ku ta humelela yini hi vumundzuku bya muapostola loyi Yesu a n’wi rhandzaka swinene? Yesu u hlamula a ku: “Loko ndzi swi rhandza a nga hanya kukondza ndzi vuya, hikwalaho ka yini u lava ku swi tiva?” (Yohane 21:21-23) Petro u fanele a landzela Yesu handle ko karhateka hi leswi van’wana va swi endlaka. Hambiswiritano, Yesu u kombisa leswaku Yohane u ta hanya nkarhi wo leha ku tlula vaapostola lavan’wana naswona u ta nyikiwa xivono xa ku vuya ka Yesu a ri ematimbeni ya Mfumo.

Kavula, ku ni swilo swin’wana leswi Yesu a swi endleke, ku tlula leswi tsariweke etibukwini to tala leti songiwaka.