Ndzima 131

Ku Humelela Ko Hetelela, Ni Pentekosta Ya 33 C.E.

ENKARHINI wun’wana Yesu u endla malunghiselelo leswaku vaapostola va yena hinkwavo va 11 va ya hlangana na yena entshaveni ya le Galeliya. Swi le rivaleni leswaku vadyondzisiwa lavan’wana va byeriwile hi ta nhlangano lowu, naswona ntsengo wa vanhu lava nga ehenhla ka 500 va hlangana. Mawaku ntsombano lowu tsakisaka swonghasi loko Yesu a humelela a sungula ku va dyondzisa!

Exikarhi ka swilo swin’wana, Yesu u hlamusela ntshungu lowukulu leswaku Xikwembu xi n’wi nyike vuhosi hinkwabyo etilweni ni le misaveni. Wa va khutaza a ku: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.”

Anakanya ha swona! Vavanuna, vavasati, ni vana hinkwavo va amukela ntirho lowu fanaka wo hlanganyela entirhweni wa ku endla vadyondzisiwa. Vakaneti va ta ringeta ku sivela ku chumayela ni ku dyondzisa ka vona, kambe Yesu wa va chavelela a ku: “Vonani, ndzi na n’wina masiku hinkwawo, ku ko ku hela misava.” Yesu u tshama ni valandzeri va yena hi ku tirhisa moya lowo kwetsima, ku va pfuna ku hetisisa vutirheli bya vona.

Yesu u tikombisa a ri la hanyaka eka vadyondzisiwa va yena ku ringana masiku ya 40 endzhaku ka ku pfuxiwa ka yena. Eka ku humelela loku u va letela hi ta Mfumo wa Xikwembu, naswona u tshikilela vutihlamuleri bya vona tanihi vadyondzisiwa va yena. Nkarhi wun’wana u humelela ni le ka Yakobo makwavo wa yena hi manana, loyi eka nkarhi wun’wana a a nga ri mupfumeri, a n’wi khorwisa leswaku Hi yena Kriste hakunene.

Loko vaapostola va ha ri eGaleliya, handle ko kanakana Yesu u va byela leswaku va tlhelela eYerusalema. Loko a hlangana na vona kwale, u ri eka vona: “Mi nga tshuki mi suka eYerusalema, kambe tshamani kona, mi langutela lexi Tatana a mi tshembiseke xona, lexi mi nga xi twa ndzi xi vula, hikuva Yohane ú khuvurile hi mati, kambe n’wina mi ta khuvuriwa hi Moya lowo Kwetsima, endzhaku ka masiku ma nga ri mangani.”

Endzhakunyana Yesu u hlangana nakambe ni vaapostola va yena kutani a huma na vona emutini ku ya eBetaniya, lowu akiweke eriweni ra le vuxeni ra Ntshava ya Mitlhwari. Lexi hlamarisaka, ku nga khathariseki hinkwaswo leswi a nga swi vula hi ta ku tlhandlukela ka yena etilweni, va ha tshemba leswaku Mfumo wa yena wu ta tlhomiwa la misaveni. Kutani va n’wi vutisa: “Hosi, xana hi wona nkarhi lowu u nga ta pfuxa mfumo wa Israyele ke?”

Ematshan’wini yo tlhela a ringeta ku lulamisa matwisiselo ya vona lama hoxeke, Yesu u hlamula hi ku olova a ku: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena.” Kutani, nakambe hi ku tshikilela ntirho lowu va faneleke ku wu endla, u ri: “Mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.”

Loko va ha langutile, Yesu u sungula ku tlhandlukela etilweni kutani papa ri n’wi siva va nga ha n’wi voni. Endzhaku ko hluvula miri wa yena wa nyama, u tlhandlukela etilweni a ri munhu wa moya. Loko lava va 11 va hambeta va languta etilweni, vavanuna vambirhi lava ambaleke tinguvu to basa va humelela ematlhelweni ya vona. Tintsumi leti ta miri wa nyama ta vutisa: “Vavanuna va Galeliya, mi yimele yini mi langutile etilweni ke? Yesu loyi a susiweke exikarhi ka n’wina ni ku tlakuleriwa etilweni, ú ta tlhela a vuya hi mukhuva lowu mi n’wi voneke a ya etilweni ha wona.”

Mukhuva lowu Yesu a sukeke emisaveni ha wona a wu voniwanga hi mani na mani, naswona wu xiyiwa hi valandzeri va yena vo tshembeka ntsena. Kutani ke, u ta vuya hi mukhuva lowu fanaka—handle ko voniwa hi mani na mani naswona i valandzeri va yena vo tshembeka ntsena lava twisisaka leswaku u vuyile naswona u sungurile ku va kona ematimbeni ya Mfumo.

Vaapostola sweswi va ehla eNtshaveni ya Mitlhwari, va tsemakanya Nkova wa Kidroni, kutani va nghena eYerusalema nakambe. Va tshama kwalaho hi ku pfumelelana ni xileriso xa Yesu. Masiku ya khume endzhakunyana, eNkhubyeni wa Xiyuda wa Pentekosta ya 33 C.E., loko vadyondzisiwa va kwalomu ka 120 va hlengeletane endlwini ya le henhla eYerusalema, mpfumawulo lowu fanaka ni ku hunga ka xidzedze xikan’we-kan’we wu tata yindlu hinkwayo. Tindzimi leti fanaka ni ndzilo ta humelela, kutani rin’we ri tshama ehenhla ka un’wana ni un’wana wa lava a a va ri kona, kutani vadyondzisiwa hinkwavo va sungula ku vulavula hi tindzimi to hambana-hambana. Loku i ku chuluriwa ka moya lowo kwetsima loku Yesu a ku tshembiseke! Matewu 28:16-20; Luka 24:49-52; 1 Vakorinto 15:5-7; Mintirho 1:3-15; 2:1-4.

▪ Yesu u nyikela swiletelo swa ku hambana eka vamani entshaveni ya le Galeliya, naswona swiletelo leswi hi swihi?

▪ I xikhutazo xihi lexi Yesu a xi nyikaka vadyondzisiwa va yena, naswona u ta va na vona hi ndlela yihi?

▪ Xana Yesu u humelela nkarhi wo tanihi kwihi endzhaku ka ku pfuxiwa ka yena eka vadyondzisiwa va yena, naswona u va dyondzisa yini?

▪ Yesu u humelela eka munhu wihi, loyi handle ko kanakana a a nga ri mudyondzisiwa emahlweni ka rifu ra Yesu?

▪ I ku hlangana kwihi kumbirhi ko hetelela loku Yesu a vaka na kona ni vaapostola va yena, naswona ku humelela yini eka swiendlakalo leswi?

▪ Xana Yesu u ta vuya njhani hi mukhuva lowu fanaka ni lowu a fambeke ha wona?

▪ Ku humelela yini hi Pentekosta ya 33 C.E.?