Madzana Ya Vanhu Ma N’wi Vona Ku Nga Si Fika Pentekosta

Loko se Yesu a pfuxiwile, u hlela ku hlangana ni vaapostola vakwe va 11 entshaveni ya Galeliya. Kwalaho ku ni vadyondzisiwa va kwalomu ka 500 naswona van’wana va vona hi lava eku sunguleni a va kanakana. (Matewu 28:17; 1 Vakorinto 15:6) Kambe leswi Yesu a swi vulaka sweswi, swi pfuna un’wana ni un’wana wa vona a tiyiseka leswaku wa hanya.

Yesu u hlamusela leswaku Xikwembu xi n’wi nyike vulawuri hinkwabyo etilweni ni laha misaveni. U va rhuma a ku: “Fambani mi ya endla vanhu va matiko hinkwawo va va vadyondzisiwa. Mi va khuvula hi vito ra Tatana, ni ra N’wana, ni ra moya lowo kwetsima, mi va dyondzisa ku yingisa hinkwaswo leswi ndzi mi leriseke swona.” (Matewu 28:18-20) Ina, hambileswi Yesu a hanyaka kambe wa ha lava leswaku mahungu lamanene ma chumayeriwa.

Valandzeri hinkwavo va Yesu lava katsaka vavanuna, vavasati ni vana, va kuma xileriso lexi fanaka xa ku endla vadyondzisiwa. Vakaneti va nga ringeta ku yimisa ntirho wa vona wo chumayela ni wo dyondzisa kambe Yesu u va tiyisekisa a ku: “Ndzi nyikiwe matimba yo lawula swilo hinkwaswo etilweni ni le misaveni.” Xana sweswo swi vula yini eka valandzeri vakwe? U va byela a ku: “Vonani! Ndzi na n’wina mikarhi hinkwayo kukondza makumu ma fika.” Yesu a nga vuli swona leswaku hinkwavo lava katsekaka entirhweni wo chumayela mahungu lamanene va ta kota ku endla masingita yo hlamarisa. Ku ri ni sweswo, va ta kuma mpfuno eka moya lowo kwetsima.

Loko Yesu a pfuxiwile, u humelele eka vadyondzisiwa vakwe “ku ringana masiku ya 40.” U humelele hi swivumbeko swo hambanahambana leswaku “va ta swi tiva leswaku hakunene wa hanya” kutani a va dyondzisa hi “Mfumo wa Xikwembu.”—Mitirho 1:3; 1 Vakorinto 15:7.

Loko vaapostola va ha ri eGaleliya, Yesu u va byele leswaku va tlhelela eYerusalema. Kutani loko a hlangana na vona emutini, u ri: “Mi nga suki eYerusalema, kambe tshamani mi rindzela leswi Tatana a swi tshembiseke, leswi mi swi tweke eka mina; hikuva Yohane hakunene u khuvule hi mati, kambe n’wina mi ta khuvuriwa hi moya lowo kwetsima endzhaku ka masiku ma nga ri mangani.”—Mitirho 1:4, 5.

Yesu u tlhela a hlangana ni vaapostola vakwe. U “famba na vona ku ya fika eBetaniya” leyi nga evuxeni bya Ntshava ya Mitlhwari. (Luka 24:50) Hambileswi Yesu a va byeleke hi ku famba kakwe, va ha tshemba leswaku Mfumo wakwe wu ta va kwala misaveni.—Luka 22:16, 18, 30; Yohane 14:2, 3.

Vaapostola va vutisa Yesu va ku: “Hosi, xana u ta pfuxa mfumo eIsrayele sweswi?” Yesu u va hlamula hi ndlela yo olova a ku: “A swi mi fanelanga ku tiva mikarhi kumbe tinguva leswi lawuriwaka hi Tatana.” Nakambe loko a va byela hi ntirho wa nkoka lowu va faneleke va wu endla, u ri: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema, etikweni hinkwaro ra Yudiya ni le Samariya ni ku ya fika emakumu ka misava.”—Mitirho 1:6-8.

Vaapostola va le Ntshaveni ya Mitlhwari na Yesu loyi a pfuxiweke naswona u sungula ku tlhandlukela etilweni. Hi ku hatlisa u pfariwe hi papa va nga ha n’wi voni. Loko se Yesu a pfuxiwile, u humelele hi mimiri yo hambanahambana. Kambe sweswi Yesu u hundzula miri lowu a wu tirhiseke eka xiendlakalo xexo ivi a tlhandlukela etilweni tanihi xivumbiwa xa moya. (1 Vakorinto 15:44, 50; 1 Petro 3:18) Loko vaapostola lava vo tshembeka va ha n’wi langutile, “ku humelela vavanuna vambirhi lava a va ambale swiambalo swo basa,” va fika va yima etlhelo ka vona. Leti i tintsumi, ti va vutisa ti ku: “Vavanuna va Galeliya, hikwalaho ka yini mi yima mi languta ehenhla? Yesu loyi, loyi a tlhandlukeke a suka eka n’wina u ta vuya hi ndlela leyi fanaka ni leyi mi n’wi voneke a tlhandluka ha yona.”—Mitirho 1:10, 11.

Yesu u fambe emisaveni handle ko voniwa hi vanhu vo tala kambe u voniwa hi valandzeri vakwe vo tshembeka ntsena. U ta vuya “hi ndlela leyi fanaka” a nga voniwi hi vanhu vo tala kambe i valandzeri vakwe vo tshembeka ntsena lava nga ta vona ku vuya kakwe hi matimba ya Mfumo.

Vaapostola va tlhelela eYerusalema. Eka masiku lama landzelaka va hlengeletana ni vadyondzisiwa van’wana ku katsa na “Mariya mana wa Yesu ni vamakwavo.” (Mitirho 1:14) Ntlawa wolowo wu khongela hi ku phindhaphindha. Xin’wana lexi va khongelaka ha xona i ku hlawuriwa ka mudyondzisiwa loyi a nga ta siva Yudasi Iskariyota ivi a vuyetela nhlayo ya vaapostola yi va 12. (Matewu 19:28) Va lava mudyondzisiwa loyi a voneke mitirho ya Yesu ni loko a pfuxiwa. A ku ri ro hetelela swi boxiwa eBibeleni leswaku va hoxe vuhlolotwana ku twisisa leswi Xikwembu xi swi lavaka. (Pisalema 109:8; Swivuriso 16:33) Matiyasi loyi a ri un’wana wa lava 70 lava Yesu a va rhumeke, wa hlawuriwa naswona u “joyina vaapostola va 11.”—Mitirho 1:26.

Endzhaku ka masiku ya khume Yesu a tlhandlukele etilweni, nkhuvo wa Vayuda wa Pentekosta ya 33 C.E. wa sungula. Vadyondzisiwa va kwalomu ka 120 va hlengeletanile ekamareni ra le henhla eYerusalema. Hi ku hatlisa, pongo leri fanaka ni moya lowu baka swinene ri tata yindlu hinkwayo. Ku vonaka tindzimi leti fanaka ni ndzilo, ti va ehenhla ka hinkwavo lava nga kona. Vadyondzisiwa hinkwavo va sungula ku vulavula tindzimi to hambanahambana. Loku i ku chululeriwa ka moya lowo kwetsima loku Yesu a ku tshembiseke!—Yohane 14:26.