Yehova—I Mufumi Wa Hina!
“Hi fanele ku yingisa Xikwembu [tanihi mufumi] ku tlula vanhu.”—MINTIRHO 5:29.
1, 2. Hi xihi xiyimo xa vaapostola lexi Timbhoni ta Yehova ti xi tekaka loko swileriso swa vanhu swi lwisana ni ku rhandza ka Xikwembu?
YEHOVA XIKWEMBU u pfumelele vavanuna va 12 leswaku va yisiwa emahlweni ka huvo leyikulu. Lembe a ku ri 33 C.E., naswona huvo a ku ri Sanedri ya Vayuda. Lava tengisiwaka a ku ri vaapostola va Yesu Kriste. Yingisela! ‘Hi mi lerisile swinene leswaku mi nga tshuki mi dyondzisa hi vito rero,’ ku vula muprista lonkulu, ‘kambe mi tatile Yerusalema hi dyondzo ya n’wina.’ Kwalaho, Petro ni vaapostola van’wana va hlamula: “Hi fanele ku yingisa Xikwembu [tanihi mufumi] ku tlula vanhu.” (Mintirho 5:27-29) Entiyisweni, va te: “Yehova i Mufumi wa hina!”
2 Ina, Yehova i Mufumi wa valandzeri va ntiyiso va Yesu. Leswi swi vekiwe erivaleni eka buku ya Bibele ya Mintirho ya Vaapostola, leyi tsariweke eRhoma kwalomu ka 61 C.E. hi “Luka, n’anga leyi rhandzekaka.” (Vakolosa 4:14) Tanihi vaapostola, vanhu va Yehova namuntlha va yingisa Mufumi wa vona wa le tilweni loko swileriso swa vanhu swi lwisana ni ku rhandza ka yena. Kambe hi swihi swin’wana leswi hi nga swi dyondzaka eka Mintirho? (Eka dyondzo ya munhu hi xiyexe, hi ringanyeta leswaku u hlaya swiphemu swa buku leyi leswi kombisiweke hi ku tsala loku tshikileriweke.)
Yesu U Nyika Timbhoni Ntirho
3. Loko valandzeri va Yesu Kriste va “khuvuriwa hi Moya lowo Kwetsima,” a ku ri byihi vutihlamuleri bya vona lebyikulu?
3 Vaapstola a a va ta teka xiyimo lexi tiyeke eka Xikwembu hi mhaka ya leswi a va tiyisiwile emoyeni. Kriste u file emhandzini ya nxaniso, kambe a a va swi tiva leswaku u pfuxiwile. (1:1-5) Yesu ‘u tikombisile a hanya’ kutani a dyondzisa mintiyiso ya Mfumo a ri eka mimiri ya nyama ku ringana 40 wa masiku. Nakambe u byele vadyondzisiwa va yena ku tshama eYerusalema va yimela ku khuvuriwa hi “Moya lowo Kwetsima.” Ku chumayela a ku ta va vutihlamuleri bya vona lebyikulu, tanihi laha swi nga ha kona eka Timbhoni ta Yehova namuntlha.—Luka 24:27, 49; Yohane 20:19–21:24.
4. A ku ta humelela yini loko moya lowo kwetsima wu tile ehenhla ka valandzeri va Yesu?
4 Loko va nga si khuvuriwa hi moya lowo kwetsima, vaapostola hi ku hoxisa va ehlekete hi mfumo wa misava wo herisa mfumo wa Rhoma loko va vutisile va ku: “Hosi, xana hi wona nkarhi lowu u nga ta pfuxa mfumo wa Israyele ke?” (1:6-8) Entiyisweni, Yesu u te e-e, hikuva ‘a swi nga va fanelanga ku tiva tinguva hambi yi ri minkarhi.’ ‘Loko moya lowo kwetsima wu tile ehenhla ka vona,’ a wu ta va nyika matimba yo nyikela vumbhoni hi Mfumo wa le matilweni wa Xikwembu, hayi wa laha misaveni leyi. A va ta chumayela eYerusalema, Yudiya na le Samariya, “ni ku ya fika emakun’wini ya misava.” Hi mpfuno wa moya, Timbhoni ta Yehova ti endla ntirho wo tano hi mpimo wa xirhendzevutana xa misava emasikwini lawa ya makumu.
5. Xana Yesu a ta tisa ku yini hi ndlela leyi a fambeke ha yona?
5 Yesu a ha ku humesa xileriso xolexo xa ku chumayela emisaveni hinkwayo loko a sungula ku tlhandlukela etilweni. Ku tlhandluka koloko ku sungule hi ku tlhandlukela ehenhla a siya vadyondzisiwa vakwe, kutani endzhaku Yesu u nghene eka xivandla xa le tilweni xa Mfumo ni le ntirhweni exivandleni xa moya. (1:9-11) Endzhaku ka loko papa ri sive ku vonakala ka Yesu eka vaapostola, u cince miri wa yena wa nyama. Tintsumi timbirhi ti humelerile kutani ti vula leswaku ‘u ta vuya hi mukhuva lowu fanaka.’ Naswona swi ve tano. I vadyondzisiwa va Yesu ntsena lava n’wi voneke a tlhandluka, tanihi leswi ku nga Timbhoni ta Yehova ntsena leti vonaka ku vuya ka yena loku nga vonakiki.
Yehova Wa Hlawula
6. Xana musivi wa Yudasi Iskariyota u hlawurisiwe ku yini?
6 Hi ku hatlisa vaapostola a va tlhelele eYerusalema. (1:12-26) Endlwini ya le henhla (kumbexana ekaya ka mana wa Marka, Mariya), vaapostola lavo tshembeka va 11 va phikelela exikhongelweni kun’we ni makwavo wa Yesu, mudyondzisiwa wa yena un’wana, ni mana wa yena, Mariya. (Marka 6:3; Yakobo 1:1) Kambe i mani loyi a ta amukela “vutshamo” bya Yudasi? (Psalma 109:8) Kwalomu ka 120 wa vadyondzisiwa a va ri kona loko Xikwembu xi hlawula munhu loyi a nga ta pfala xivandla xa muxengi wa Yesu, Yudasi, ni ku vuyisela nhlayo ya vaapostola eka 12. La hlawuriwaka a ku laveka a va un’wana loyi a ri mudyondzisiwa hi nkarhi wa vutirheli bya Yesu ni mbhoni ya ku pfuka ka yena. Kavula, munhu loyi a fanele a teka Yehova tanihi Mufumi wa yena. Endzhaku ka xikhongelo, vuhlolotwana byi hoxiwile exikarhi ka Matiyasi na Yosefa Barnabasi. Xikwembu xi endle leswaku vuhlolotwana byi wela ehenhla ka Matiyasi.—Swivuriso 16:33.
7. (a) Xana Yudasi ‘u xave nsimu hi mali ya vubihi’ hi ndlela yihi? (b) Yudasi u fise ku yini?
7 Yudasi Iskariyota entiyisweni a nga amukelanga Yehova tanihi Mufumi wa yena. Phela, u xenge N’wana wa Xikwembu hikwalaho ka mali ya tisilivhere ta 30! Yudasi u tlherisele mali yoleyo eka muprista lonkulu, kambe Petro u vule leswaku muxengi u ‘xave nsimu hi mali ya vubihi.’ Njhani? Ina, u nyikele mali naswona hi xivangelo xo xava “Nsimu ya ngati,” hi laha swi vuriweke ha kona. Yi kumiwe yi ri rivala ra le tlhelweni ra dzonga wa Nkova wa Hinom. Leswi vuxaka bya yena ni Mufumi wa le tilweni a byi hele hi laha ku heleleke, Yudasi “a tisunga.” (Matewu 27:3-10) Kumbexana ntambu kumbe rhavi ra murhi ri tshovekile, lerova a ‘wa hi nhloko, a phyandlaka hi huwa leyikulu’ loko a wela emaribyeni lama karihaka. Onge ni un’we wa hina a nga ka a nga vi makwerhu wa vunwa!
Va Tatiwe Hi Moya Lowo Kwetsima!
8. Vadyondzisiwa va Yesu va khuvuriwe rini hi moya lowo kwetsima, naswona vuyelo byi ve byihi?
8 Ku vuriwa yini hi nkhuvulo lowu tshembisiweke wa moya lowo kwetsima? Wu humelela hi Pentekosta ya 33 C.E., masiku ya khume endzhaku ka ku tlhandluka ka Yesu. (2:1-4) Mawaku xiendlakalo lexo nyanyula swonghasi lexi nkhuvulo wolowo wu veke xona! Anakanya xivono. Kwalomu ka vadyondzisiwa va 120 a va ri endlwini ya le henhla loko ‘hi xitshuketa ku twakala mpfumawulo lowu humaka etilweni wu fana ni ku hunga ka xidzedze wu tata yindlu.’ A ku nga ri moya, kambe wu twakale tanihi wona. Ririmi leri “fanaka ni malangavi ya ndzilo.” ri tshama ehenhla ka un’wana ni un’wana wa vadyondzisiwa ni vaapostola. “Hinkwavo va tala hi moya lowo kwetsima kutani va sungula ku vulavula hi tindzimi tin’wana.” Loko nkhuvulo wolowo wu humelela, nakambe va tswariwe hi moya lowo kwetsima, va totiwile va funghiwa hi mfungho wa ndzhaka ya moya.—Yohane 3:3, 5; 2 Vakorinto 1:21, 22; 1 Yohane 2:20.
9. Vadyondzisiwa lava a a va tatiwe hi moya a va vulavula hi yini?
9 Xiendlakalo lexi xi khumbe Vayuda ni Vaproselite eYerusalema vo huma ‘ematikweni hinkwawo ehansi ka tilo.’ (2:5-13) Hi ku hlamala, va vutisile: ‘Ha yini un’wana ni un’wana wa hina a twiwa hi ririmi ra yena ra ku velekiwa?’ Ri nga ha va ririmi ra tindhawu to tanihi Mediya (evuxeni bya Yudiya), Phrygia (eAsia Minor), na Rhoma (eYuropa). Loko vadyondzisiwa va vulavula hi tindzimi to hambana-hambana “hi mintirho leyikulu ya Xikwembu,” vayingiseri vo tala va hlamarisiwile, kambe vasandzi va ehlekete leswaku a va pyopyiwile.
Petro U Nyikela Vumbhoni Lebyi Nyanyulaka
10. Xiendlakalo xa Pentekosta ya 33 C.E. xi hetisise vuprofeta byihi, naswona xana leswi swa fana ni manguva-lawa?
10 Petro u sungula ku nyikela vumbhoni hi ku komba leswaku awara ya kaye na mpundzu a ka ha ri mixo swinene leswaku va nga pyopyiwa. (2:14-21) Kambe, xiendlakalo lexi a ku ri ku hetisisiwa ka xitshembiso xa Xikwembu xo chululela moya lowo kwetsima ehenhla ka vanhu va xona. Xikwembu xi huhutele Petro ku kombetela enkarhini wa hina hi ku engetela marito lama nge “emasikwini ya makumu” ni leswaku “[va] ta profeta.” (Yoel 2:28-32) Yehova a a ta nyika swikombiso ematilweni ni swikombiso emisaveni emahlweni ka siku ra yena lerikulu, naswona hi lava va vitanaka vito ra yena hi ku pfumela ntsena lava nga ta ponisiwa. Ku chuluriwa loku fanaka ka moya lowo kwetsima ehenhla ka vatotiwa ku va endle va swi kota ku “profeta” hi ku gingirika ni ku humelela swinene namuntlha.
11. Malunghana na Yesu, i yini leswi endliweke hi Vayuda na hi Xikwembu?
11 Petro nakambe u twarise Mesiya. (2:22-28) Xikwembu xi tiyisekise Vumesiya bya Yesu hi ku n’wi pfumelela ku endla mintirho ya matimba, swikombiso, ni swifaniso. (Vaheveru 2:3, 4) Kambe Vayuda va n’wi khomile kutani va n’wi belela emhandzini “hi voko ra vanhu lavo homboloka,” Varhoma lava nga wu landzeriki nawu wa Xikwembu. Yesu u “nyiketiw[e], hi makungu lama tiyeke ya Xikwembu ni ku tiva ka xona ka khale” hi mhaka ya leswi leswi a ku ri ku rhandza ka Xikwembu. Hambi swi ri tano, Xikwembu xi pfuxe Yesu, ni ku herisa miri wa yena wa nyama lerova wu nga ha tokoti ku bola.—Psalma 16:8-11.
12. I yini leswi Davhida a swi voneke ka ha ri emahlweni, naswona ku ponisiwa ku titshege ha yini?
12 Vuprofeta bya Mesiya byi kandziyisiwe ku ya emahlweni hi laha vumbhoni bya Petro byi hambetaka ha kona. (2:29-36) U vule leswaku Davhida u vone ku pfuxiwa ka n’wana wa yena lonkulu, Yesu la nga Mesiya, ka ha ri emahlweni. A ri eka xivandla lexi tlakukeke evokweni ra xinene ra Xikwembu etilweni, Yesu u chululele moya lowo kwetsima lowu a wu kumeke eka Tata wa yena. (Psalma 110:1) Vayingiseri va Petro va ‘vone ni ku twa’ ku tirha ka wona hi ku vona tindzimi leti a ti fana ni malangavi ya ndzilo ehenhla ka tinhloko ta vadyondzisiwa ni ku twa tindzimi timbe leti va ti vulavuleke. Nakambe u kombise leswaku ku ponisiwa ku tiseketela hi ku amukela Yesu tanihi Hosi ni Mesiya.—Varhoma 10:9; Vafilipiya 2:9-11.
Yehova U Nyika Ku Engeteleka
13. (a) Leswaku va khuvuriwa kahle, xana Vayuda ni vaproselita a va fanele ku amukela yini? (b) I vangani lava khuvuriweke, naswona vuyelo byi ve byihi eYerusalema?
13 Vona vuyelo lebyi marito ya Petro ya veke na byona! (2:37-42) Vayingiseri va yena a va tlhaviwile embilwini hikuva va seketele ku dlayiwa ka Mesiya. Kutani u tsundzuxile: “Hundzukani kutani un’wana ni un’wana wa n’wina a khuvuriwa hi vito ra Yesu Kriste; leswaku mi rivaleriwa swidyoho swa n’wina; kutani mi ta amukela nyiko, wu nga moya lowo kwetsima.” Vayuda ni vaproselita ana a va n’wi amukela Yehova tanihi Xikwembu ni ku lava ka vona moya wa yena. Sweswi a va fanele va hundzuka ni ku amukela Yesu tanihi Mesiya leswaku va ta khuvuriwa (va amukela xiyimo kumbe ntirho) evitweni ra Tatana, N’wana ni moya lowo kwetsima. (Matewu 28:19, 20) Hi ku nyikela vumbhoni eka Vayuda volavo ni vaproselita, Petro u tirhise xilotlelo xo sungula xa moya lexi Yesu a n’wi nyikeke xona ku pfula nyangwa ya vutivi ni nkarhi wa Vayuda lava pfumelaka ku nghena emfun’weni wa matilo. (Matewu 16:19) Eka siku rero rin’we, 3 000 va khuvuriwile! Anakanya timbhoni to tala ta Yehova to tano ti chumayela ensin’wini leyintsongo ya Yerusalema!
14. Ha yini naswona xana vapfumeri a va ri ni, ‘swilo hinkwaswo hi ku fana’ hi ndlela yihi?
14 Vo tala lava humaka etindhawini ta le kule va pfumale malunghiselo ya ku tshama nkarhi wo leha kambe va navele ku dyondza swo tala hi ripfumelo ra vona lerintshwa ni ku chumayela van’wana. Hikwalaho valandzeri va Yesu Kriste vo sungula hi rirhandzu a va pfunana, tanihi laha Timbhoni ta Yehova ti endlaka ha kona namuntlha. (2:43-47) Vapfumeri hi xinkarhana va ve ni “swilo hinkwaswo hi ku ringana.” Van’wana va xavise nhundzu, naswona mali a yi nyikiwa un’wana ni un’wana loyi a a pfumala. Leswi swi fikelele laha bandlha ri vaka eka xiyimo lexinene tanihi leswi ‘Yehova a engetela eka vona siku rin’wana ni rin’wana lava ponisiweke.’
Ku Horisa Ni Vuyelo Bya Kona
15. Xana ku humelele yini loko Petro na Yohane va nghena etempeleni, naswona vanhu va endlise ku yini?
15 Yehova u seketele valandzeri va Yesu hi “swikombiso.” (3:1-10) Xisweswo, loko Petro na Yohane va nghena etempeleni hi 3:00 p.m. hi nkarhi wa xikhongelo lexi yelanaka ni magandzelo ya ni madyambu, munhu la lamaleke ku sukela eku velekiweni ka yena a a ri kusuhi ni Nyangwa leyo Saseka a kombela “swihanano.” Petro u te ‘silivhere ndzi hava, ni nsuku a ndzi na wona, kambe lexi ndzi nga na xona, ndzi ta ku nyika xona: hi vito ra Yesu Kriste wa Nazareta, ndzi ri famba!’ Wanuna u horisiwile xikan’we-kan’we! Loko a nghena etempeleni “a ri karhi a famba-famba, a tlula-tlula, a dzunisa Xikwembu,” vanhu va ‘khomiwa hi ku chava.’ Kumbexana van’wana va tsundzuke marito lama nge: “Ŝilema ŝi ta tlula kukota tinhlangu.”—Esaya 35:6.
16. Xana vaapostola va swi kotise ku yini ku hanyisa wanuna la lamaleke?
16 Vanhu lava hlamarisiweke va hlengeletana erikupakupeni ra Solomoni, rikupakupa leri funengeteke tlhelo ra tempele ra le vuxeni. Kwalaho Petro u nyikele vumbhoni. (3:11-18) U kombise leswaku Xikwembu xi nyike vaapostola matimba yo horisa vanhu lava lamaleke hi ku tirhisa Yesu, Nandza wa Yena la kwetsimisiweke. (Esaya 52:13–53:12) Vayuda va landzule munhu yoloye “la hlawulekeke, la lulameke”; kambe Yehova u n’wi pfuxile. Hambi loko vanhu ni vafumi va vona a va nga swi tivi leswaku a va dlaya Mesiya, xisweswo Xikwembu xi hetisise marito ya vuprofeta lama nge “Mesiya wa xona a a ta twisiwa ku vaviseka.”—Daniel 9:26.
17. (a) I xiendlo xihi lexi Vayuda a va fanele va xi teka? (b) Xana ku humelele yini ku sukela eku ‘rhumeriweni ka Kriste’ esikwini ra hina?
17 Hikwalaho ka ndlela leyi va khomeke Mesiya ha yona, Petro u kombise leswi Vayuda va fanelaka ku swi endla. (3:19-26) A va fanele va “hundzuka,” kumbe ku tivona nandzu hi swidyoho swa vona, kutani ‘va hundzuluka,’ kumbe va hundzuluxiwa, va teka ndlela leyi hambaneke. Loko va kombisa ripfumelo eka Yesu tanihi Mesiya, va amukela nkutsulo, ku phyuphya ku ta ta eka vona ku huma eka Yehova tanihi lava rivaleriweke swidyoho. (Varhoma 5:6-11) Vayuda va tsundzuxiwe leswaku i vana va ntwanano lowu Xikwembu xi wu endleke ni vakokwa wa vona, xi byela Abrahama xi ku: “[hi rixaka ra wena], ku ta katekisiwa tinŝaka hikwato ta misav̌a.” Kutani eku sunguleni Xikwembu xi rhumile Nandza wa xona wa Vumesiya ku ta kutsula Vayuda lava hundzukaka. Lexi tsakisaka, ku sukela eku ‘rhumeriweni ka Kriste’ ematimbeni ya Mfumo wa le tilweni hi 1914, a ku ri na ku vuyeteriwa loku phyuphyisaka ka mintiyiso ni ku hleleka ka le tilweni exikarhi ka Timbhoni ta Yehova.—Genesa 12:3; 18:18; 22:18.
A Va Nge Yimi!
18. I “ribye” rihi leri landzuriweke hi “vaaki” va Vayuda, naswona hi le ka mani ntsena laha ku nga ni ku ponisiwa?
18 Hi ku hlundzukisiwa hi leswi Petro na Yohane va twariseke ku pfuxiwa ka Yesu, vaprista lavakulu, ndhuna ya tempele, ni Vasaduki va va khotsa. (4:1-12) Vasaduki a va nga pfumeli eka ku pfuxiwa ka vafi, kambe van’wana vo tala va ve vapfumeri, vavanuna va ri voxe a va ri kwalomu ka nhlayo ya 5 000. Loko va vutisiwa emahlweni ka huvo leyikulu eYerusalema, Petro u vule leswaku wanuna la lamaleke u hanyisiwe “hi vito ra Yesu Kriste wa Nazareta,” la vambiweke hi vona kambe a pfuxiweke hi Xikwembu. “Ribye” leri ariweke hi “vaaki” va Vayuda ri ve “Ribye lerikulu ra yinhla.” (Psalma 118:22) Petro u te: “Kutani ku ponisiwa a ku kumeki eka munhu un’wana.”
19. Loko va lerisiwe ku tshika ku chumayela, xana vaapostola va hlamule njhani?
19 Matshalatshala ma endliwile ku yimisa ku vulavula ko tano. (4:13-22) Leswi wanuna la hanyisiweke a a ri kona a swi nga koteki ku kaneta “mahlori [lama] lamakulu,” kambe Petro na Yohane va lerisiwe leswaku ‘va nga ha tshuki va vulavula hi vito ra Yesu.’ Nhlamulo ya vona yi ve yihi? ‘Hi nga ka hi nga koti ku tshika ku vula leswi hi swi voneke ni leswi hi swi tweke.’ Va yingise Yehova tanihi Mufumi wa vona!
Swikhongelo Swi Hlamuriwile!
20. Vadyondzisiwa a va khongelela yini, naswona vuyelo byi ve byihi?
20 Tanihi leswi Timbhoni ta Yehova ti khongelaka eminhlanganweni, hikwalaho vadyondzisiwa va khongerile loko vaapostola lava ntshunxiweke va vikile leswi swi va humeleleke. (4:23-31) Swi xiyiwile leswaku vafumi Heroda Antipasi na Pontiyo Pilato, kun’we ni Vamatiko va Varhoma ni vanhu va Israyele a va hlengeletanile va kaneta Mesiya. (Psalma 2:1, 2; Luka 23:1-12) Ku hlamula xikhongelo xa vona, Yehova u tate vadyondzisiwa hi moya lowo kwetsima, lerova va vulavula rito ra Xikwembu hi xivindzi. Mufumi wa vona a nga kombelanga ku herisa nxaniso kambe ku va pfuna leswaku va chumayela hi xivindzi hambi wu ri kona.
21. Barnaba a a ri mani, naswona i timfanelo tihi leti a a ri na tona?
21 Vapfumeri va ye emahlweni va va ni swilo hinkwaswo hi laha ku fanaka, naswona a ku vanga na un’we loyi a pfumala. (4:32-37) Un’wana la nyikeleke a ku ri Yosefa wa Mulevhi wa le Kipra. Vaapostola va n’wi nyike xivongo xa Barnaba, leswi vulaka “la tiyisaka van’wana,” kumbexana hikuva a pfuna naswona a a ri ni mbilu ya rirhandzu. Entiyisweni, hinkwerhu ka hina hi lava ku fana ni munhu yoloye.—Mintirho 11:22-24.
Vahembi Va Paluxiwa
22, 23. A ku ri xihi xidyoho xa Ananiya na Safira, naswona hi nga pfunekisa ku yini eka ntokoto wa vona?
22 Hambi swi ri tano, Ananiya ni nsati wa yena, Safira, va tshike ku amukela Yehova tanihi Mufumi wa vona. (5:1-11) Va xavise nsimu kutani va pambula mali yin’wana kambe va endla onge va yi nyike vaapostola hinkwayo. Vutivi lebyi nyikiweke hi moya wa Xikwembu byi pfumelele Petro ku vona vukanganyisi bya vona, lebyi va yiseke eku feni. Mawaku xitsundzuxo eka lava Sathana a va ringelaka ku va vaxisi!—Swivuriso 3:32; 6:16-19.
23 Endzhaku ka xiendlakalo lexi, a ku nga ri na un’wana la nga ni makungu yo biha loyi a ri na xivindzi xo joyina vadyondzisiwa. Van’wana va ve vapfumeri. (5:12-16) Ku tlula kwalaho, loko lava vabyaka ni lava karhatiwaka hi mimoya ya thyaka va veka ripfumelo eka matimba ya Xikwembu, ‘hinkwavo a va hanyisiwa.’
Yingisa Xikwembu Ku Tlula Vanhu
24, 25. Ha yini varhangeri va Vayuda va xanise vaapostola, kambe i mpimanyeto wihi lowu vanhu volavo vo tshembeka va wu vekeleke malandza hinkwawo ya Yehova?
24 Muprista lonkulu ni Vasaduki sweswi va ringeta ku sivela ku kula loku tsakisaka hi ku khotsa vaapostola hinkwavo. (5:17-25) Kambe vusiku byebyo ntsumi ya Xikwembu yi va ntshunxa. Loko rixa a va ri karhi va dyondzisa etempeleni! Nxaniso a wu nge ma yimisi malandza ya Yehova.
25 Kambe, ntshikilelo wu tirhisiwile loko vaapostola va yisiwe emahlweni ka Sanedri. (5:26-42) Hambi swi ri tano, loko va lerisiwe ku tshika ku dyondzisa, va te: “Hi fanele ku yingisa Xikwembu ku tlula vanhu.” Leswi swi veke mpimanyeto eka vadyondzisiwa va Yesu, lexi landzeriwaka hi Timbhoni ta Yehova namuntlha. Endzhaku ka xitsundzuxo xo huma eka Gamaliyele, mudyondzisi wa Nawu, varhangeri va be vaapostola, va va lerisa ku tshika ku chumayela, kutani va va ntshunxa.
26. Xana vutirheli bya vaapostola byi njhani loko byi pimanisiwa ni lebyi bya Timbhoni ta Yehova namuntlha?
26 Vaapostola a va tsakile hikuva a va kumiwile va ri lava fanelaka ku soriwa hikwalaho ka vito ra Yesu. “Kutani masiku hinkwawo, a va nga rhuteli ku dyondzisa ni ku twarisa Evhangeli eTempeleni ne mindyangwini ya vanhu.” Ina, a va ri vatirheli va yindlu na yindlu. Ti tano Timbhoni ta Xikwembu ta manguva-lawa, leti na tona ti amukeleke moya wa xona hikuva ta xi yingisa ni ku vula ti ku, “Yehova i Mufumi wa hina!”
A Wu Ta Hlamurisa Ku Yini?
◻ I xileriso xihi lexi xi faneleke ku hetisisiwa hi valandzeri va Yesu, vo sungula ni va sweswi?
◻ Ku humelele yini hi siku ra Pentekosta ya 33 C.E.?
◻ Xana Petro u tirhise xilotlelo xa yena xo sungula xa moya lexi Yesu a n’wi nyikeke xona rini naswona njhani?
◻ Xana hi nga dyondza yini eka ntokoto wa Ananiya na Safira?
◻ Loko va lerisiwe ku tshika ku chumayela, i mpimanyeto wihi lowu vaapostola va wu vekeleke Timbhoni hinkwato ta Yehova?