Ndzima 132

Evokweni Ra Xinene Ra Xikwembu

KU CHULURIWA ka moya lowo kwetsima hi Pentekosta i vumbhoni bya leswaku Yesu u tlhelele etilweni. Xivono lexi endzhakunyana xi nyikiweke mudyondzisiwa Stefano na xona xi kombisa leswaku U fikile. Emahlweni ko va a khandleriwa ku nyikela ka yena vumbhoni hi ku tshembeka, Stefano u huwelerile: “Langutani! Ndzi vona tilo ri pfulekile, ni N’wana-wa-Munhu a yimile evokweni ra xinene ra Xikwembu.”

Loko a ri evokweni ra xinene ra Xikwembu, Yesu u yimele xileriso lexi humaka eka Tata wa yena: “Tshama exikarhi ka valala va wena.” Kambe hi nkarhi lowu, ku kondza a teka goza ehenhleni ka valala va yena, xana Yesu u endla yini? Wa fuma ehenhla ka vadyondzisiwa va yena lava totiweke, u va kongomisa entirhweni wa vona wo chumayela ni ku lunghiselela leswaku va va tihosi-kulobye na yena eMfun’weni wa Tata wa yena hi ku pfuxiwa.

Hi xikombiso, Yesu u hlawula Sawulo (loyi eku heteleleni a tiviwaka hi vito ra yena ra Xirhoma, Pawulo) ku ndlandlamuxa ntirho wo endla vadyondzisiwa ematikweni man’wana. Sawulo u hisekela Nawu wa Xikwembu, kambe u hambukisiwa hi varhangeri va vukhongeri va Vayuda. Hikwalaho, Sawulo a nga seketeli ku dlayiwa ka Stefano ntsena, kambe u ya ni le Damaska hi mpfumelelo wa Kayafasi muprista lonkulu leswaku a khotsa vavanuna ni vavasati lava a va kumaka va ri valandzeri va Yesu a va tisa eYerusalema. Hambi swi ri tano, loko Sawulo a ri endleleni, ku hatima ka n’wi rhendzela naswona u wela ehansi.

Rito leri humaka eka xihlovo lexi nga vonakiki ra vutisa ri ku: “Sawulo, Sawulo! U ndzi xanisela yini?” Sawulo wa vutisa a ku: “U mani Hosi?”

Kutani ku ta nhlamulo leyi nge: “Hi mina Yesu loyi u n’wi xanisaka.”

Sawulo loyi a dlayiweke mahlo hi ku vonakala ka masingita, u byeriwa hi Yesu ku nghena eDamaska kutani a yimela swileriso. Kutani Yesu u humelela hi xivono eka Ananiya, un’wana wa vadyondzisiwa va yena. Mayelana na Sawulo, Yesu u byela Ananiya a ku: “Munhu loyi i xitirho lexi ndzi nga tihlawulela xona ku ya twarisa vito ra mina eka vamatiko ni ka tihosi, ni ka Vaisrayele.”

Entiyisweni, a ri na ku seketeriwa hi Yesu, Sawulo, (loyi sweswi a tiviwaka tanihi Pawulo) ni vaevhangeli van’wana va humelela swinene entirhweni wa vona wo dyondzisa no chumayela. Entiyisweni, kwalomu ka malembe ya 25 endzhaku ka ku humelela ka Yesu eka yena egondzweni ro ya eDamaska, Pawulo u tsala leswaku “Evhangeli leyi yi twarisiwile eka swivumbiwa hinkwaswo.”

Endzhaku ka ku hundza ka malembe man’wana yo tala, Yesu u nyike nongonoko wa swivono eka muapostola wa yena la n’wi rhandzaka, Yohane. Hi ku tirhisa swivono leswi Yohane a swi hlamuselaka eka buku ya Bibele ya Nhlavutelo, entiyisweni u hanyela ku vona ku vuya ka Yesu ematimbeni ya Mfumo. Yohane u vula leswaku “hi ku huhuteriwa,” u yisiwe emahlweni hi nkarhi eka “siku ra Hosi.” Xana hi rihi “siku” leri?

Ku hlaya ka vukheta ka vuprofeta bya Bibele, ku katsa ni vuprofeta bya Yesu hi yexe mayelana ni masiku ya makumu, swi paluxa leswaku “siku ra Hosi” ri sungule hi lembe ra matimu ra 1914, ina exikarhi ka rixaka leri! Kutani a ku ri hi 1914 laha Yesu a vuyeke a nga vonaki, a nga amukeriwi hi vanhu, ku vuya ka yena ku xiyiwa hi malandza ya yena layo tshembeka ntsena. Elembeni rero Yehova u nyike Yesu xileriso xa leswaku a fuma exikarhi ka valala va yena!

Hi ku yingisa xileriso xa Tata wa yena, Yesu u basise matilo ya Sathana ni mademona ya yena, a va cukumetela ehansi emisaveni. Endzhaku ko vona leswi, Yohane u twa rito ra le tilweni ri twarisa ri ku: “Sweswi, ku hlayiseka ka Xikwembu xa hina ni matimba ya xona, ni mfumo wa xona, ni vuhosi bya Mesiya wa xona, swi fikile.” Ina, hi 1914, Kriste u sungule ku fuma tanihi Hosi!

Mawaku mahungu lamanene swonghasi eka vagandzeri va Yehova ematilweni! Va khutaziwa: “Tsakani n’wina matilo, na n’wina lava akeke eka wona.” Kambe hi xihi xiyimo xa lava va nga emisaveni? “Mi ni khombo, n’wina misava ni lwandle,” rito leri humaka etilweni ri ya emahlweni, “hikuva Diyavulosi ú xikele ka n’wina, ú karihile ngopfu hi ku tiva leswaku nkarhi wa yena wu komile.”

Hi le nkarhini wolowo wo koma sweswi. Sweswi vanhu va hambaniseriwa ku nghena emisaveni leyintshwa ya Xikwembu kumbe ku lovisiwa. Ntiyiso hi leswaku, makumu ya wena sweswi ya titshege hi ndlela leyi u amukelaka ha yona mahungu lamanene ya Mfumo wa Xikwembu lama chumayeriwaka emisaveni hinkwayo ehansi ka nkongomiso wa Kriste.

Loko ku hambanisiwa ka vanhu ku herile, Yesu Kriste u ta tirha tanihi Xitirho xa Xikwembu ku herisa misava ya Sathana ya mafambiselo hinkwawo ya swilo ni hinkwavo lava ma seketelaka. Yesu u ta hetisisa ku susiwa loku ka vubihi hinkwabyo enyimpini leyi eBibeleni yi vuriwaka Harmagedoni, kumbe Armagedoni. Endzhaku, Yesu, Munhu la tlhandlamaka Yehova Xikwembu hi vukulu evuakweni, hi yexe u ta khoma Sathana ni mademona ya yena kutani a va boha ku ringana malembe ya gidi ‘ekheleni,’ hi leswaku, xiyimo xo fana na rifu, laha ku nga riki na ntirho. Mintirho 7:55-60; 8:1-3; 9:1-19; 16:6-10; Psalma 110:1, 2; Vaheveru 10:12, 13; 1 Petro 3:22; Luka 22:28-30; Vakolosa 1:13, 23; Nhlavutelo 1:1, 10; 12:7-12; 16:14-16; 20:1-3; Matewu 24:14; 25:31-33.

▪ Endzhaku ka loko Yesu a tlhandlukele etilweni, hi kwihi laha a nga kona, naswona u yimela yini?

▪ Yesu u fuma ehenhla ka vamani loko a tlhelele etilweni, naswona ku fuma ka yena ku hetisisa yini?

▪ Xana “siku ra Hosi” ri sungule rini, naswona ku humelele yini eku sunguleni ka rona?

▪ I ntirho wihi wo hlawula lowu yaka emahlweni namuntlha lowu khumbaka un’wana ni un’wana wa hina hi ku kongoma, naswona ntirho wo hlawula wu endliwa hi xisekelo xihi?

▪ Loko ntirho wo hlawula wu herile, i swiendlakalo swihi leswi nga ta landzela?