Kreste A Ri Evokweni Ra Xinene Ra Xikwembu

Endzhaku ka masiku ya khume loko Yesu a tlhandlukele etilweni, ku chululeriwa ka moya lowo kwetsima hi siku ra Pentekosta swi ve vumbhoni bya leswaku hakunene u le etilweni. Vumbhoni byin’wana bya sweswo a bya ha ta endleka. Loko mudyondzisiwa Stefano a nga si khandliwa hi maribye hikwalaho ko nyikela vumbhoni hi ku tshembeka, u te: “Vonani! Ndzi vona matilo ma pfulekile ni N’wana wa munhu a yime evokweni ra xinene ra Xikwembu.”—Mitirho 7:56.

Loko a ri ni tata wakwe etilweni, Yesu u ta yimela xileriso lexi kongomeke lexi tsariweke eRitweni ra Xikwembu. Davhida u huhuteriwe ku tsala a ku: “Yehovha u byele Hosi ya mina [Yesu] a ku: ‘Tshama evokweni ra mina ra xinene ku fikela loko ndzi veka valala va wena va va vunavelo bya mikondzo ya wena.’” Loko nkarhi wolowo wo rindza wu hela, u fanele a “famba [a] ya fuma exikarhi ka valala va [yena].” (Pisalema 110:1, 2) Kambe, xana Yesu u ta endla yini a ri etilweni loko a ha rindzele nkarhi wa ku lwisana ni valala vakwe?

Vandlha ra Vukreste ri simekiwe hi Pentekosta ya 33 C.E. Loko a ri etilweni, Yesu u sungule ku fuma vadyondzisiwa va yena lava hlawuriweke hi moya lowo kwetsima. (Vakolosa 1:13) U va kongomise entirhweni wo chumayela ni ku va lulamisela vutihlamuleri bya vona bya nkarhi lowu taka. Hi byihi vutihlamuleri bya kona? Lava nga ta tshembeka ku fikela ekufeni va ta pfuxiwa naswona va ta va tihosi na Yesu eMfun’weni.

Xikombiso xin’wana lexinene xa loyi a nga ta va hosi, i xa Sawulo loyi a tivekaka kahle hi vito rakwe ra Xirhoma, ku nga Pawulo. A a ri Muyuda loyi a hisekela Nawu wa Xikwembu kambe u hambukisiwile hi varhangeri va vukhongeri lava nga Vayuda lerova a pfumela leswaku Stefano a khandliwa hi maribye. Kutani leswi “a ha tiyimisele ku xanisa ni ku dlaya vadyondzisiwa va Hosi,” Sawulo u kongome eDamaska. A a lerisiwe hi Muprista Lonkulu Kayafasi ku ya khoma vadyondzisiwa va Yesu a va tlherisela eYerusalema. (Mitirho 7:58; 9:1) Kambe loko Sawulo a ha ri endleleni, u tlunyiwe hi ku vonakala lokukulu ivi a wela ehansi.

Rito leri humaka etilweni ri huwelele ri ku: “Sawulo, Sawulo, u ndzi xanisela yini?” Sawulo u vutise a ku: “Hi wena mani, Hosi?” Nhlamulo yi te: “Hi mina Yesu, loyi u n’wi xanisaka.”—Mitirho 9:4, 5.

Yesu u byele Sawulo ku ya eDamaska a ya kuma swiletelo swin’wana kambe u fanele a heleketiwa hikuva ku vonakala ka singita ku n’wi endle a nga ha voni. Eka xivono xin’wana, Yesu u humelele eka Ananiya loyi a nga un’wana wa vadyondzisiwa vakwe loyi a tshamaka eDamaska. Yesu u byele Ananiya laha a faneleke a ya kona leswaku a ya kuma Sawulo. Ananiya wa chava ku ya kambe Yesu u n’wi tiyisekisa a ku: “Wanuna loyi i xibya lexi ndzi tihlawuleleke xona leswaku a ta twarisa vito ra mina eka matiko swin’we ni le ka tihosi ni le ka vana va Israyele.” Sawulo u tlhele a kota ku vona naswona loko a ri eDamaska, u sungule “ku chumayela hi Yesu emasinagogeni leswaku loyi i N’wana wa Xikwembu.”—Mitirho 9:15, 20.

Hi ku pfuniwa hi Yesu, Pawulo ni vadyondzisiwa lavan’wana va ye emahlweni ni ntirho wo chumayela lowu Yesu a wu sunguleke. Xikwembu xi va katekisile leswaku va humelela hi ndlela leyikulu. Kwalomu ka malembe ya 25 endzhaku ka loko Yesu a humelele eka Pawulo endleleni yo ya eDamaska, u tsale leswaku mahungu lamanene ma ‘chumayeriwe eka vanhu hinkwavo.’—Vakolosa 1:23.

Emalembeni lama landzeleke, Yesu u kombe muapostola loyi a n’wi rhandzaka swinene ku nga Yohane, swivono swo hlayanyana leswi kumekaka eka buku ya le Bibeleni ya Nhlavutelo. Kahlekahle hi ku tirhisa swivono leswi, Yohane u hanye kukondza a vona Yesu a vuya ematimbeni ya Mfumo. (Yohane 21:22) ‘Moya lowo kwetsima wu yise Yohane esikwini ra Hosi.’ (Nhlavutelo 1:10) Sweswo a swi ta endleka rini?

Vukambisisi bya vuprofeta bya Bibele byi kombisa leswaku ‘siku ra Hosi’ ri sungule emikarhini ya manguva lawa. Hi 1914, ku ve ni nyimpi leyi vuriweke Nyimpi Yo Sungula Ya Misava. Nakambe makume ya malembe ku sukela kwalaho ma funghiwe hi tinyimpi to tala, makhombo, ndlala, ku tsekatseka ka misava ni vumbhoni byin’wana lebyi funghaka ku hetiseka lokukulu ka “xikombiso” lexi Yesu a xi nyikeke vaapostola vakwe mayelana ni ku “vuya kakwe” ni “makumu.” (Matewu 24:3, 7, 8, 14) Ntirho wo chumayela mahungu lamanene ya Mfumo wu ya emahlweni, ku nga ri endhawini ya Mfumo wa Rhoma ntsena kambe emisaveni hinkwayo.

Yohane u huhuteriwe ku hlamusela leswi sweswo swi vulaka swona hi ku vula a ku: “Sweswi ku ponisa ni matimba ni Mfumo wa Xikwembu xa hina ni vuhosi bya Kreste wa xona se swa tirha.” (Nhlavutelo 12:10) Ina, Mfumo wa Xikwembu wa le tilweni lowu Yesu a tiviseke vo tala ha wona i wa xiviri!

Wolawo i mahungu ya ku tsakisa eka vadyondzisiwa hinkwavo va Yesu. Va nga ma tekela enhlokweni marito ya Yohane lama nge: “Hikwalaho ka sweswo tsakani n’wina matilo na n’wina lava tshamaka eka wona! Khombo eka misava ni lwandle, hikuva Diyavulosi u xikele eka n’wina a hlundzukile swinene, hi ku tiva leswaku u ni nkarhi wo koma.”—Nhlavutelo 12:12.

Hikwalaho, sweswi Yesu a nga ha tshamanga evokweni ra xinene ra Tata wakwe a rindzile. Kambe u fuma tanihi Hosi naswona ku nga ri khale, u ta herisa valala vakwe hinkwavo. (Vaheveru 10:12, 13) Endzhaku ka sweswo, hi kwihi ku cinca ko tsakisa loku hi rindzeleke?