Dyondzo 4
Diyavulosi I Mani?
Sathana Diyavulosi—xana u huma kwihi? (1, 2)
Xana Sathana u va kanganyisa njhani vanhu? (3-7)
Ha yini u fanele ku alela Diyavulosi? (7)
1. Rito leri nge “diyavulosi” ri vula munhu loyi a hembelaka van’wana. “Sathana” swi vula nala kumbe mukaneti. Leswi i swiga leswi nyikiweke nala lonkulu wa Xikwembu. Eku sunguleni, a a ri ni Xikwembu etilweni, a ri ntsumi leyi hetisekeke. Hambiswiritano, endzhaku u tikukumuxile ivi a navela vugandzeri lebyi hi mfanelo byi nga bya Xikwembu.—Matewu 4:8-10.
2. Ntsumi leyi vuriwaka Sathana yi vulavule na Evha hi ku tirhisa nyoka. Hi ku n’wi byela mavunwa, yi n’wi endle leswaku a nga yingisi Xikwembu. Xisweswo Sathana u tlhontlhe leswi vuriwaka “vuhosi” bya Xikwembu, kumbe xikhundla xa xona tanihi La Nge Henhla-henhla. Sathana u tlhele a kanakana loko Xikwembu xi fuma hi ndlela leyinene ni hi ndlela leyi vuyerisaka swinene eka vafumiwa va xona. Sathana u tlhele a endla swi kanakanisa leswaku xana u kona munhu loyi a nga tshamaka a tshembekile eka Xikwembu. Hi ku endla swilo leswi, Sathana u tiendle nala wa Xikwembu. Hi yona mhaka leyi endleke leswaku a vitaniwa Sathana Diyavulosi.—Genesa 3:1-5; Yobo 1:8-11; Nhlavutelo 12:9.
3. Sathana u ringeta ku yenga vanhu leswaku va n’wi gandzela. (2 Vakorinto 11:3, 14) Ndlela yin’wana leyi a kanganyisaka vanhu ha yona i ku tirhisa vukhongeri bya mavunwa. Loko vukhongeri byi dyondzisa mavunwa mayelana ni Xikwembu, entiyisweni byi tirhela swikongomelo swa Sathana. (Yohane 8:44) Vanhu lava nga swirho swa vukhongeri bya mavunwa va nga pfumela hi timbilu ta vona hinkwato leswaku va gandzela Xikwembu xa ntiyiso. Kambe entiyisweni va tirhela Sathana. I “xikwembu xa misava leyi.”—2 Vakorinto 4:4.
4. Vungoma i ndlela yin’wana leyi Sathana a lawulaka vanhu ha yona. Va nga ha vitana mimoya leswaku yi va sirhelela, leswaku yi vavisa van’wana, leswaku yi vhumba vumundzuku kumbe ku endla masingita. Sathana hi yena muhlohloteri lowo biha wa swiendlo leswi hinkwaswo. Leswaku hi tsakisa Xikwembu, hi fanele ku hambana ni vungoma hinkwabyo.—Deteronoma 18:10-12; Mintirho 19:18, 19.
5. Sathana u tlhela a kanganyisa vanhu hi ku tirhisa ku tinyungubyisa hi rixaka loku hundzeletiweke ni ku gandzela minhlangano ya tipolitiki. Van’wana va anakanya leswaku tiko kumbe rixaka ra vona ra antswa ku tlula ra van’wana. Kambe leswi a hi ntiyiso. (Mintirho 10:34, 35) Van’wana va tshembele eka minhlangano ya tipolitiki leswaku yi ololoxa swiphiqo swa vanhu. Hi ku endla tano, va ala Mfumo wa Xikwembu. Hi wona ntsena ntlhantlho wa swiphiqo swa hina.—Daniyele 2:44.
6. Ndlela yin’wana leyi Sathana a kanganyisaka vanhu ha yona i ku va ringa hi ku navela ka vudyoho. Yehovha u hi byela leswaku hi papalata swiendlo swa vudyoho hikuva wa swi tiva leswaku swi ta hi vavisa. (Vagalatiya 6:7, 8) Vanhu van’wana va nga ha lava leswaku u hlanganyela na vona eka swiendlo leswo tano. Hambiswiritano, tsundzuka, i Sathana hi byakwe loyi a lavaka leswaku u endla swilo leswi.—1 Vakorinto 6:9, 10; 15:33.
7. Sathana a nga ha endla leswaku u fularhela Yehovha hi ku tirhisa nxaniso kumbe nkaneto. Van’wana va varhandziwa va wena va nga ha hlundzuka swinene hikwalaho ka leswi u dyondzaka Bibele. Van’wana va nga ha ku hlekula. Xana vutomi bya wena u byi kolota mani? Sathana u lava ku ku chavisa leswaku u ta tshika ku dyondza hi Yehovha. U nga pfumeleli Sathana a hlula! (Matewu 10:34-39; 1 Petro 5:8, 9) Hi ku alela Diyavulosi, u nga tsakisa Yehovha ni ku kombisa leswaku u seketela vuhosi bya Yena.—Swivuriso 27:11.
[Swifaniso leswi nga eka tluka 9]
Vukhongeri bya mavunwa, vungoma ni vutiko swi hambukisa vanhu
[Xifaniso lexi nga eka tluka 9]
Alela Sathana hi ku hambeta u dyondza hi ta Yehovha