Dyondzo 8

Vutomi Bya Ndyangu Lebyi Tsakisaka Xikwembu

Xana xikhundla xa wanuna hi xihi endyangwini? (1)

Xana wanuna u fanele ku n’wi khoma njhani nsati wa yena? (2)

Xana tatana u ni vutihlamuleri byihi? (3)

Xana wansati u ni xiphemu xihi endyangwini? (4)

Xana Xikwembu xi langutele yini eka vatswari ni vana? (5)

Hi rihi langutelo ra Bibele hi ku hambana evukatini ni ku dlaya vukati? (6, 7)

1. Bibele yi vula leswaku wanuna i nhloko ya ndyangu wakwe. (1 Vakorinto 11:3) Wanuna u fanele ku va ni nsati un’we ntsena. Va fanele ku va va tekane kahle hi ku ya hi nawu.—1 Timotiya 3:2; Tito 3:1.

2. Wanuna u fanele ku rhandza nsati wa yena kukota loko a tirhandza. U fanele ku n’wi khoma ku fana ni ndlela leyi Yesu a khomeke valandzeri va yena ha yona. (Vaefesa 5:25, 28, 29) A nga fanelanga a ba nsati wakwe kumbe ku n’wi xanisa hi ndlela yihi na yihi. Ematshan’weni ya sweswo, u fanele ku n’wi xixima ni ku n’wi fundzha.—Vakolosa 3:19; 1 Petro 3:7.

3. Tatana u fanele ku tirha hi matimba leswaku a hlayisa ndyangu wa yena. U fanele ku kumela nsati ni vana vakwe swakudya, swiambalo ni ndhawu yo tshama. Nakambe tatana u fanele ku wundla ndyangu wakwe hi tlhelo ra moya. (1 Timotiya 5:8) U fanele ku rhangela eku pfuneni ka ndyangu wakwe leswaku wu dyondza hi ta Xikwembu ni swikongomelo swa xona.—Deteronoma 6:4-9; Vaefesa 6:4.

4. Nsati u fanele ku va mupfuni lonene wa nuna wakwe. (Genesa 2:18) U fanele a pfuna nuna wakwe eku dyondziseni ni le ku leteleni ka vana va vona. (Swivuriso 1:8) Yehovha u langutele leswaku wansati a khathalela ndyangu wakwe hi ndlela ya rirhandzu. (Swivuriso 31:10, 15, 26, 27; Tito 2:4, 5) U fanele ku va ni xichavo lexi enteke eka nuna wa yena.—Vaefesa 5:22, 23, 33.

5. Xikwembu xi lava leswaku vana va yingisa vatswari va vona. (Vaefesa 6:1-3) Xi langutele leswaku vatswari va letela ni ku tshinya vana va vona. Vatswari va fanele ku heta nkarhi ni vana va vona va dyondza Bibele na vona, va va khathalela hi tlhelo ra moya ni ra mintlhaveko. (Deteronoma 11:18, 19; Swivuriso 22:6, 15) Vatswari a va fanelanga va laya vana va vona hi ku kariha kumbe hi ndlela ya tihanyi.—Vakolosa 3:21.

6. Loko vatekani swi va tikela ku hanyisana hi ku rhula, va fanele va ringeta ku tirhisa ndzayo ya Bibele. Bibele yi hi khongotela ku rhandzana ni ku rivalelana. (Vakolosa 3:12-14) Rito ra Xikwembu a ri ku khutazi ku thalana tanihi ndlela yo tlhantlha swiphiqo leswitsongo. Kambe wansati a nga boha ku tshika nuna wakwe loko (1) a ala ku hlayisa ndyangu wa yena hi ku tiomisa nhloko, (2) loko a ri ni vukarhi ngopfu lerova rihanyo ni vutomi bya nsati byi va ekhombyeni, kumbe (3) loko nkaneto wa yena lowukulu wu endla leswaku nsati a nga swi koti ku gandzela Yehovha.—1 Vakorinto 7:12, 13.

7. Vatekani va fanele va tshembana. Vuoswi i ku dyohela Xikwembu ni loyi u tekaneke na yena. (Vaheveru 13:4) Vuxaka bya rimbewu ehandle ka vukati hi xona ntsena xivangelo xa Matsalwa xo dlaya vukati lexi pfumelelaka ku nghenela vukati byin’wana. (Matewu 19:6-9; Varhoma 7:2, 3) Yehovha wa swi venga loko vanhu va dlaya vukati handle ka xivangelo xa Matsalwa va tlhela va tekana ni munhu un’wana.—Malakiya 2:14-16.

[Swifaniso leswi nga eka tluka 16, 17]

Xikwembu xi langutele vatswari leswaku va letela vana va vona ni ku va tshinya

[Xifaniso lexi nga eka tluka 17]

Tatana la nga ni rirhandzu u phamela ndyangu wakwe hi tlhelo ra nyama ni ra moya