Dyondzo 9

Malandza Ya Xikwembu Ma Fanele Ma Basa

Ha yini hi fanele hi basa hi tindlela hinkwato? (1)

Xana swi vula yini ku basa emoyeni? (2) ku basa emahanyelweni? (3) ku basa emianakanyweni? (4) ku basa emirini? (5)

Xana hi fanele ku papalata mavulavulelo wahi lama thyakeke? (6)

1. Yehovha Xikwembu u basile naswona wa kwetsima. U langutele leswaku vagandzeri vakwe va tshama va basile—emoyeni, emahanyelweni, emianakanyweni ni le mirini. (1 Petro 1:16) Swi lava leswaku hi endla matshalatshala ya xiviri leswaku hi tshama hi basile ematihlweni ya Xikwembu. Hi hanya emisaveni leyi nga basangiki. Nakambe hi fanele ku lwisana ni mimboyamelo ya hina vini yo endla swo biha. Kambe a hi fanelanga hi lan’wa.

2. Ku Basa eMoyeni: Loko hi lava ku tirhela Yehovha, a hi nge hambeti hi namarhela tidyondzo kumbe mikhuva yihi na yihi ya vukhongeri bya mavunwa. Hi fanele ku hambana ni vukhongeri bya mavunwa naswona hi nga byi seketeri hi ndlela yihi kumbe yihi. (2 Vakorinto 6:14-18; Nhlavutelo 18:4) Loko hi kala hi tiva ntiyiso malunghana ni Xikwembu, hi fanele ku tivonela leswaku hi nga xisiwi hi vanhu lava dyondzisaka mavunwa.—2 Yohane 10, 11.

3. Ku Basa eMahanyelweni: Yehovha u lava leswaku minkarhi hinkwayo vagandzeri vakwe va hanya ku fana ni Vakreste va ntiyiso. (1 Petro 2:12) U vona swilo hinkwaswo leswi hi swi endlaka, hambi leswi hi swi endlelaka exihundleni. (Vaheveru 4:13) Hi fanele hi papalata ku tikhoma loko biha hi tlhelo ra rimbewu ni swiendlo swin’wana swa misava leswi nga tengangiki.—1 Vakorinto 6:9-11.

4. Ku Basa eMianakanyweni: Loko hi tata mianakanyo ya hina hi swilo leswi baseke, leswi tengeke, mahanyelo ya hina na wona ma ta va lama baseke. (Vafilipiya 4:8) Kambe loko hi tshamela ku ehleketa hi swilo leswi nga tengangiki, swi ta hetelela hi swiendlo leswo homboloka. (Matewu 15:18-20) Hi fanele ku papalata swiyenge swihi na swihi swa ku tihungasa leswi nga thyakisaka mianakanyo ya hina. Hi nga tata mianakanyo ya hina hi swilo leswinene hi ku dyondza Rito ra Xikwembu.

5. Ku Basa eMirini: Leswi va nga vayimeri va Xikwembu, Vakreste va fanele ku hlayisa miri ni swiambalo swa vona swi basile. Hi fanele ku hlamba mavoko ya hina loko hi huma exihambukelweni, hi fanele ku hlamba mavoko hi nga si dya swakudya kumbe ku khoma swakudya. Loko mi nga ri na fambiselo lerinene ra nkululo, thyaka ri fanele ku seleteriwa. (Deteronoma 23:12, 13) Ku tihlayisa hi basile emirini swi hoxa xandla eka rihanyo lerinene. Kaya ra Mukreste ri fanele ku hleleka ni ku basa ehandle ni le ndzeni. Ri fanele ku va xikombiso lexinene eka vaaki.

6. Mavulavulelo Lama Baseke: Malandza ya Xikwembu ma fanele ku vulavula ntiyiso nkarhi hinkwawo. Lava hembaka a va nge ngheni eMfun’weni wa Xikwembu. (Vaefesa 4:25; Nhlavutelo 21:8) Vakreste a va ri tirhisi ririmi ro homboloka. Mafenya kumbe timhaka leti thyakeke a va ti yingiseli hambi ku vulavula ha tona. Hikwalaho ka mavulavulelo ya vona lama baseke, va hlawuleka eka vanhu lavan’wana entirhweni ni le xikolweni hambi ku ri endhawini leyi va tshamaka eka yona.—Vaefesa 4:29, 31; 5:3.

[Swifaniso leswi nga eka tluka 18, 19]

Malandza ya Xikwembu ma fanele ku basa etimhakeni hinkwato