Tengani eMianakanyweni Ni Le Mirini
“Mi nyiketa vutomi bya n’wina hinkwabyo, mi va mhamba leyi hanyaka, leyi hlawulekeke, leyi amukelekaka eka Xikwembu.”—VARHOMA 12:1.
1. Hi ku ya hi muapostola Pawulo, ha yini ku tenga emianakanyweni ni le mirini swi fanela?
MUNHU la navelaka ku tirhela Yehova Xikwembu xo kwetsima u fanele a basa emoyeni ni le mahanyelweni. Hi laha ku twisisekaka, leswi swi tlhela swi vula ku tenga emianakanyweni ni le mirini. Mafambiselo ya sweswi ya swilo ya ri leswi ya nga xiswona, vanhu lava humaka eka wona leswaku va tirhela Yehova va fanele va cinca ku nga ri ntsena eka mikhuva ya vona ya ku anakanya kambe hakanyingi ni le ka mikhuva ya vona ya munhu hi xiyexe. Muapostola Pawulo u tsalele Vakriste va le Rhoma a ku: “Loko swi ri tano vamakwerhu, ndza mi khongotela hikwalaho ka tintswalo ta Xikwembu, leswaku mi nyiketa vutomi bya n’wina hinkwabyo, mi va mhamba leyi hanyaka, leyi hlawulekeke, leyi amukelekaka eka Xikwembu; hi wona magandzelele ya n’wina ya xiviri. Mi nga landzi hanyelo ra nguva leyi, kambe mi pfumela ku hundzuka mi va vantshwa emiehleketweni ya n’wina, mi ta kota ku twisisa leswi ku rhandza lokunene ka Xikwembu, loku nkhensekaka ni ku hetiseka, ku nga swona.” (Varhoma 12:1, 2) Xana ku tenga ka mianakanyo ni miri ku katsa yini?
Ku Tenga Ka Mianakanyo
2. Xana mahlo ni timbilu ta hina swi nga hi endla leswaku hi nghenela ku tikhoma ko biha hi ndlela yihi, naswona ku laveka yini leswaku hi papalata leswi?
2 Hambi loko nawu wu nga si vekiwa, Yobo la tshembekaka u kombe leswaku mahlo ni timbilu ta hina swi nga hi endla hi dyoha loko hi nga swi lawuli. U te: “A nḍi endla šinakulobye ni mahlo ya mina, leŝaku nḍi nga ṭhuki nḍi languta wanhwana. Loko mbilu ya mina yi kanganyisiwe hi wansati, . . . i ku dyoha lo’kukulu, i ku biha lo’ku fanelaka hi ku biwa hi v̌aav̌anyisi.” (Yobo 31:1, 9-11) Loko hi ri ni mahlo lama tsendzelekaka ni timbilu leti nga tshembekiki, hi lava ndzayo ya mianakanyo, “dyonḍo ya ku anakanya ŝo lulama.”—Swivuriso 1:3.
3, 4. (a) Xana xikombiso xa Davhida na Batšeba xi kombisa yini, naswona i yini lexi lavekaka ku cinca mikhuva yo biha yo anakanya? (b) Ha yini vakulu va vukriste ngopfu-ngopfu va fanele ku tivonela?
3 Mahlo ya hosi Davhida ya n’wi yise eku endleni ka vuoswi na Batšeba. (2 Samuel 11:2, 4) Xikombiso lexi xi komba leswaku hambi va ri vanhu lava tirhisiwaka swinene hi Yehova va nga wela exidyohweni loko va nga layi mianakanyo ya vona. Swi nga lava matshalatshala lamakulu ku cinca mikhuva ya hina yo anakanya. Matshalatshala yo tano ya fanele ku fambisana ni xikhongelo lexi humaka embilwini xa mpfuno wa Yehova. Endzhaku ka ku hundzuka exidyohweni xa yena na Batšeba, Davhida u khongerile a ku: “Oho Šikwembu! V̌umba e nḍeni ka mina e mbilu le’yo tenga. U tlhela u pfuša e nḍeni ka mina e moya lo’wo tiya.”—Psalma 51:10.
4 Vakulu va Vukriste ngofu-ngopfu va fanele va xiya leswaku va nga ngheni eku naveleni loko biha loku nga va yisaka exidyohweni lexikulu. (Yakobo 1:14, 15) Pawulo u tsalele nkulu wa Mukriste Timotiya a ku: “Laha xitsundzuxo xa hina xi kongomeke kona, i ku pfuxa rirhandzu leri humaka embilwini leyo tenga ni le ripfalweni lerinene, ni le ku pfumeleni ka xiviri.” (1 Timotiya 1:5) Kunene a ku ta va vukanganyisi eka nkulu ku tirha mintirho ya yena ya moya loko hi tlhelo a pfumelela mahlo ya yena lama tsendzelekaka ma tinyiketela eka mianakanyo ya mbilu ya yena ya ku endla mahanyelo yo biha.
5. Xana i yini leswi fanelaka ku papalatiwa leswaku ku hlayisiwa ku tenga ka mianakanyo?
5 Hinkwerhu ka hina tanihi Vakriste hi fanele hi endla hi matimba ku va lava tengeke emianakanyweni. Leswi swi vula ku papalata tibayiskopo tihi na tihi, minongonoko ya TV, kumbe ku hlaya mhaka leyi nga vaka ni nkucetelo lowu onhaka emianakanyweni ya hina. Nsivela-mavabyi wa mianakanyo wu katsa matshalatshala lamakulu yo tshama eka swilo leswi nga “ntiyiso, . . . leswi lulameke, . . . leswi tengeke.” Muapostola Pawulo u engetela a ku: “Ni loko ku ri ni swin’wana leswi nga ni vunene kumbe ku dzuneka, swilo leswi hinkwaswo, tshamani mi ri karhi mi swi anakanya.”—Vafilipiya 4:8.
Nsivela-mavabyi Wa Munhu Hi Xiyexe
6. (a) Nyika swikombiso leswi humaka ebukwini ya Levitika leswi kombaka leswaku nsivela-mavabyi wa munhu hi xiyexe ni wa hinkwavo a wu laveka eIsrayele. (b) A ku ri xihi xikongomelo xa milawu yo tano?
6 Swi vuriwile leswaku “ku basa ku vandzamelana ni ku chava Xikwembu.” I ntiyiso, munhu la baseke emahanyelweni ni le mirini a nga ha va a nga ri munhu la chavaka Xikwembu. Kambe munhu la chavaka Xikwembu swa boha leswaku a va la baseke emahanyelweni ni le mirini. Nawu wa Muxe wu nyike swiletelo swa nkoka eku basiseni ka tindlu leti thyakeke ni ku hlamba ka munhu hi xiyexe eka swiendlakalo swo hambana-hambana swo pfumala ku tenga. (Vona Levitika, tindzima 14 na 15.) Vaisrayele hinkwavo a va fanele ku tikombisa va ri lava kwetsimaka. (Levitika 19:2) Buku leyi nge Insight on the Scriptures yi ri: “Swakudya, nsivela-mavabyi ni milawu ya mahanyelo leyi Xikwembu xi yi nyikeke [Vaisrayele] a swi ri switsundzuxo swo tiya eka vona leswaku va tihambanisa ni ku kwetsima eka Xikwembu.”—Vholumo 1, tluka 1128.
7. Xana i yini lexi nga ntiyiso hi Timbhoni ta Yehova tanihi vanhu, kambe xana valanguteri van’wana lava famba-fambaka va vike yini?
7 Hambi leswi Timbhoni ta Yehova tanihi vanhu lava baseke eka thyaka rihi na rihi ra vukhongeri bya mavunwa bya Babilona naswona va nga amukeriki mahanyelo ya thyaka exikarhi ka vona, swiviko leswi humaka eka valanguteri lava famba-fambaka swi komba leswaku vanhu van’wana va honisa nsivela-mavabyi ni ku basa ka munhu hi xiyexe. Xana hi nga tiyiseka hi ndlela yihi leswaku hina hi basile ni le ka mhaka leyi ke? Xikombiso lexinene xa makaya hinkwawo ya Vukriste i Bethele, vito leri vulaka ku “Yindlu ya Xikwembu.”
8, 9. (a) I ndzayo yihi leyi nyikiwaka swirho leswintshwa hinkwaswo swa ndyangu wa Bethele? (b) Xana i misinya ya milawu yihi leyi landzeleriwaka eMakaya ya Bethele leyi faneleke ku lawula kaya ra Mukriste un’wana ni un’wana?
8 Loko munhu a va xirho xa ndyangu wa Bethele eyindlu-nkulu ya Sosayiti ya Watch Tower kumbe eka rin’wana ra marhavi ya yona emisaveni hinkwayo, u nyikiwa broxara leyi lunghiseleriweke hi Huvo leyi Fumaka. Buku leyi yi hlamusela leswi languteriweke eka yena hi ndlela ya mikhuva ya ntirho ni mahanyelo ya munhu hi xiyexe. Ehansi ka xihloko lexi nge “Mahlayiselo Ya Kamara Ni Ku Basa,” yi ri: “Vutomi bya le Bethele byi lava ku hlayisa mimpimanyeto leyi tlakukeke ya miri, mahanyelo ni ya moya. Un’wana ni un’wana eBethele u fanele a khathalela ku tibasisa kun’we ni kamara ra yena. Leswi swi tisa rihanyo lerinene. Ku hava xivangelo xa leswaku un’wana ni un’wana a va ni thyaka. I mukhuva lowunene ku hlamba masiku hinkwawo. . . . I swa nkoka ku hlamba u nga si dya naswona swi languteriwa eka mani na mani. Hi ku ehleketelela loyi u tshamaka na yena ekamareni ni mubasisi wa yindlu, ndhawu yo hlambela mavoko kumbe bavhu swi fanele ku basisiwa endzhaku ka ku tirhisiwa kun’wana ni kun’wana.”
9 EMakaya ya Bethele, swihambukelo swi tshama swi basisiwile hi vukheta, naswona lunghiselelo ro pfuneta lava swi tirhisaka leswaku va hlamba mavoko ya vona hi nkarhi wolowo ri endliwile. Swirho swa ndyangu swi languteriwa ku siya xihambukelo xi basile endzhaku ko xi tirhisa, leswi vulaka ku kamba leswaku xihambukelo xi gwedliwe kahle. Leswi swi komba ku khathalela mutirhisi la landzelaka kumbe mubasisi wa yindlu. Xana misinya ya milawu yo tano leyinene, ya rirhandzu a yi fanelanga ku lawula kaya ra Mukriste un’wana ni un’wana?
10. (a) Ha yini kamara ro hlambela ri nga bohi ku endla leswaku munhu ni vana va yena va tshama va basile? (b) Xana i milawu yihi eIsrayele leyi a yi pfuna rihanyo lerinene, naswona namuntlha i dyondzo yihi leyi vanhu va Yehova va nga yi dyondzaka eka leswi?
10 Hi ntumbuluko, swiyimo swa hambana hi ku ya hi matiko. Etindhawini tin’wana, makaya ya hava bavhu ro hlambela hambi ku ri xawara. Hambi swi ri tano, hi ntolovelo vavanuna ni vavasati va Vukriste va nga kuma xisibi ni mati leswi ringaneke ku endla leswaku mimiri ya vona yi tshama yi basile ni ku vona leswaku vana va vona va basile.a Makaya yo tala emisaveni hinkwayo a ya hlanganisiwanga ni fambiselo ra nkululo. Kambe thyaka ri nga lahliwa kahle hi ku ri celela, hi laha a swi laviwa ha kona exikarhi ka Vaisrayele, hambi ku ri emixaxeni ya mavuthu. (Deuteronoma 23:12, 13) Handle ka leswi, milawu ya Yehova leyi lawulaka vutomi bya le mixaxeni a yi lava ku hlantswiwa ka swiambalo ni ku hlamba ka nkarhi na nkarhi, ku kambisisa xivangelo xa vuvabyi hi ku hatlisa ni ku tshungula vuvabyi, ku tamela lokunene ka mintsumbu, ni ku hlayisa mati lama baseke ni mimphakelo ya swakudya. Milawu leyi hinkwayo a yi pfuneta rihanyo ra tiko. Xana vanhu va Yehova namuntlha va fanele va va ni nsivela-mavabyi lowu nga nyawuriki emahanyelweni ya vona ya munhu hi xiyexe?—Varhoma 15:4.
Makaya Ni Mimovha Swo Hleleka
11. (a) Xana i yini leswi faneleke swi vonaka hambi ku ri ekaya leri nga nyawuriki ra Mukriste? (b) Xana i ku tirhisana kwihi loku lavekaka eka swirho hinkwaswo swa ndyangu wa Bethele?
11 Makaya ya hina, hambi ya nga nyawuli, ya nga hleleka ni ku basa, kambe leswi swi lava ku hleleka lokunene eka xiyimo xa ndyangu. Manana wa Mukriste u ta lava ku tirhisa nkarhi wo tala hi laha swi nga kotekaka ha kona etimhakeni ta swa moya, ku katsa ntirho wa ku chumayela, kutani a nga fanelanga a heta nkarhi siku na siku a basisa endzhaku ka loko swirho swa ndyangu swi tshike swiambalo, tibuku, maphepha, timagazini ni swin’wana, swi hangalakile. EBethele, hambi leswi ku nga na valanguteri va tindlu lava basisaka, xirho xin’wana ni xin’wana xa ndyangu xi languteriwa ku tiandlalela mubedo wa xona ni ku siya kamara ra xona ri hlelekile nimixo. Hinkwerhu ka hina hi tlangela Tiholo ta hina ta Mfumo ni Tiholo ta Tinhlengeletano leti tengeke ni leti baseke. Onge makaya ya hina na wona ya nga kombisa leswaku hi xiphemu xa vanhu va Yehova lava baseke ni lava kwetsimaka!
12, 13. (a) I ndzayo yihi leyi nyikiwaka mayelana ni mimovha leyi tirhisiwaka entirhweni wa Yehova, naswona ha yini leswi swi nga laveki leswaku swi dya nkarhi wo tala? (b) Xana i xivangelo xihi xa moya xi nga kona xa ku basa ka miri ni ku va ni makaya ni mimovha swo hleleka?
12 Namuntlha vo tala va malandza ya Yehova va tirhisa mimovha ku ya eminhlanganweni ni le ntirhweni wa nsimu. Ematikweni man’wana, movha wu ve nchumu lowu lavekaka swinene tanihi xitirho xo tirhela Yehova. Hikwalaho, wu fanele wu tshama wu hlelekile ni ku basa, tanihi leswi makaya ya hina ya nga xiswona. Kahle-kahle, Vakriste va nge tirhisi nkarhi wo tala va tirhana ni mimovha ya vona ku tlula mpimo hi ndlela leyi vanhu van’wana va misava va endlaka ha yona. Kambe handle ko fika eka mpimo wolowo, malandza ya Yehova ya fanele ku ringeta ku endla leswaku mimovha ya wona yi tshama yi base kahle ni ku va exiyin’weni lexinene. Ematikweni man’wana, ku hlantswa movha exiticini xa petirolo a swi durhi ngopfu naswona a swi dyi nkarhi. Malunghana ni le ndzeni ka movha, hi khume ra timinete matshalatshala yo yi basisa ni ku yi hlela ma nga endliwa. Ngopfu-ngopfu vakulu ni malandza ya vutirheli, va fanele va ringeta ku va swikombiso emhakeni leyi, tanihi leswi hakanyingi va tirhisaka mimovha ya vona ku rhwala mintlawa ya vahuweleri entirhweni wa nsimu. Loko muhuweleri a rhwala munhu la tsakelaka ku n’wi yisa enhlanganweni, kunene a hi ku nyikela vumbhoni lebyinene loko movha wu thyakile naswona wu hlanga-hlanganile.
13 Xisweswo, hi matshalatshala ya hina ya ku va lava baseke emirini ni ku va ni makaya ni mimovha leswi baseke, hi xixima Yehova tanihi swirho swa nhlengeletano ya yena leyi baseke.
Ku Basa Loko U Humesa Magandzelo Ya Moya
14. Xana i milawu yihi leyi yi lawuleke ku basa ka miri eIsrayele, naswona milawu leyi yi kombisa yini?
14 Ku basa ka miri malunghana ni vugandzeri a swi laveka eIsrayele, ehansi ka xigwevo xa rifu. Yehova u byele Muxe na Aroni a ku “Mi ta susa ŝeŝo e ku yila ka v̌ana v̌a Israel, v̌a nga ṭhuki v̌a fa hikwalaho ka tšhyaka ra v̌ona, loko v̌a nyamisa yindlu ya mina leyi nge šikari ka v̌ona.” (Levitika 15:31) Hi Siku ro Phahlelana Mariyeta, muprista lonkulu a a fanele a hlamba kambirhi ematini. (Levitika 16:4, 23, 24) Nkambana wa koporo etabarnakeleni, naswona endzhakunyana lwandle lerikulu ra koporo etempeleni, a swi nyika vaprista mati yo hlamba eka wona va nga si humesa magandzelo eka Yehova. (Eksoda 30:17-21; 2 Tikronika 4:6) Ku vuriwa yini hi Vaisrayele hinkwavo? Loko va ve lava nga basangiki emirini hi xivangelo xihi na xihi, a va siveriwa ku hlanganyela evugandzerini ku kondza va hetisisa swilaveko swa ku tibasisa. (Tinhlayo 19:11-22) Hinkwaswo leswi swi kandziyise leswaku ku basa emirini ka laveka eka lava va gandzelaka Yehova, Xikwembu lexo kwetsima.
15. Ha yini magandzelo ya swiharhi ya nga ha laveki, kambe xana i swivutiso swihi swi vutisiwaka?
15 I ntiyiso, vanhu va Yehova namuntlha a va fanelanga ku nyikela magandzelo ya swiharhi etempeleni ya la misaveni. Magandzelo ehansi ka Nawu ya siviwe hi ‘miri wa Yesu Kriste, lowu a wu nyiketeke kan’we ku va mhamba ya hinkwavo.’ (Vaheveru 10:8-10) Hi “gandzela Tatana hi moya ni ntiyiso.” (Yohane 4:23, 24) Kambe xana leswi swi vula leswaku a hi na magandzelo lama hi nga ma humeselaka Yehova, Xikwembu xa hina lexo kwetsima? Naswona xana i ku basa kuntsongo loku lavekaka eka hina ku tlula leswi a ku ri xiswona eka Vaisrayele?
16. Vuprofeta bya Malakia 3:3, 4 byi hetiseke njhani ehenhla ka Vakriste lava totiweke ku sukela hi 1918, naswona i magandzelo wahi lama amukelekaka lama va nga ya humeselaka Yehova?
16 Vuprofeta bya Malakiya byi komba leswaku Vakriste lava totiweke emisaveni hi minkarhi ya makumu a va ta basiseriwa kumbe ku tengiseriwa ntirho wa tempele. Matimu ya komba leswaku ku basisiwa loku ku sungule hi 1918. Ku sukela hi 1919 masalela lama totiweke ‘eka Yehova ya ve vanhu lava hakunene va humesaka magandzelo hi ku lulama,’ naswona ku humesa ka vona magandzelo swi “ṭakisa Yehova.” (Malakia 3:3, 4) Xisweswo, va swi kota ku “humesa magandzelo ya moya lama amukelekaka eka Xikwembu ha Yesu Kriste.” (1 Petro 2:5) Muapostola Pawulo u tsarile a ku: “A hi humeseni magandzelo masiku hinkwawo ha yena Yesu, hi dzunisa Xikwembu ha wona, hi leswaku, hi fanele ku vonga vito ra xona hi marito lama humaka emilon’wini ya hina.”—Vaheveru 13:15.
17. Hambi leswi “ntshungu lowukulu” wu nga riki xiphemu xa vuprista lebyi fumaka, ha yini va fanele va basa emirini, emianakanyweni, emahanyelweni ni le moyeni?
17 Hambi leswi “ntshungu lowukulu” wu nga rhamberiwangiki ku va entirhweni wa vuprista etempeleni ku fana ni masalela lama totiweke, va “tirhela [Yehova] vusiku ni nhlekanhi” eswivaveni swa la misaveni swa tempele ya yena ya moya. (Nhlavutelo 7:9, 10, 15) Swi ta tsundzukiwa leswaku Vaisrayele lava nga riki vaprista a va fanele va va lava baseke emirini leswaku va hlanganyela evugandzerini etabarnakeleni kumbe endzhakunyana, etempeleni. Hi ku fanana, ntshungu lowukulu wa tinyimpfu tin’wana wu fanele ku basa emirini, emianakanyweni, emahanyelweni ni le moyeni loko ti lava ku tirha etempeleni ni ku hlanganyela ni masalela eku ‘humeseleni ka Xikwembu magandzelo ya ku dzunisa’ hi ku ‘vonga vito ra xona hi marito lama humaka emilon’wini ya tona.’
Ku Basa Ni Ku Tenga eNtirhweni Wa Nsimu Ni Le Minhlanganweni
18. Loko hi endla ntirho wo veka vumbhoni bya le rivaleni ni ku va kona eminhlanganweni, hi fanele hi khathalela yini mayelana ni ku basa ka munhu hi xiyexe, swiambalo ni tintangu?
18 Xana leswi swi vula yini hi marito lama tolovelekeke? Swi vula leswaku a swi ta va leswi nga faneliki naswona swi ri leswi delelaka Yehova ku n’wi yimela evutirhelini bya yindlu na yindlu, eswitarateni, kumbe endlwini ya munhu loko hi nga basanga emirini naswona hi nga ambalanga kahle. Hikwalaho, a hi fanelanga ku titekela ehansi timhaka to tano. Hi fanele hi ti nyika nkhathalelo lowukulu, leswaku hi tirha hi ndlela leyi fanelaka vatirheli lava byarhaka vito ra Yehova. Swiambalo swa hina a swi kali swi lava leswaku swi va leswi durhaka, kambe swi fanele swi va leswi baseke, leswi langutekaka ni leswi ringaniseriweke. Tintangu ta hina ti fanele ti lunghisiwa kahle naswona ti languteka. Hi ku fanana, eka minhlangano hinkwayo, ku katsa ni Dyondzo ya Buku ya Bandlha, mimiri ya hina yi fanele yi va leyi baseke, naswona hi fanele hi va lava baseke ni ku ambala kahle.
19. I mimpfuno yihi ya moya leyi yi vaka kona hikwalaho ka ku languteka ka hina loko basa ni ku hleleka tanihi vatirheli va Vakriste?
19 Ku languteka ka hina loku baseke ni loku tengeke loko hi ri entirhweni wo veka vumbhoni ni le minhlanganweni ya hina i ndlela yin’wana yo ‘sasekisa leswi dyondzisiwaka hi tlhelo ra Xikwembu, Muponisi wa hina.’ (Tito 2:10) Kona hi koxe i vumbhoni. Vanhu vo tala va tsakisiwile hi ku basa ni ku hleleka ka hina, naswona leswi swi va endle leswaku va yingisela rungula ra hina mayelana ni swikongomelo leswi hlamarisaka swa Yehova swa matilo lamantshwa yo lulama ni misava leyintshwa leyi basisiweke.—2 Petro 3:13.
20. Xana i mihandzu yihi yin’wana leyinene leyi humaka eku baseni ka hina emianakanyweni ni le mirini?
20 Tanihi leswi mafambiselo yo basa lamantshwa ya Yehova ya tshinelaka, hinkwerhu ka hina hi fanele ku tikambisisa ku vona loko hi lava ku endla ku cinca kun’wana emianakanyweni ya hina kumbe eka mahanyelo ya hina ya munhu hi xiyexe. Pawulo u tsarile a ku: “Ndzi tirhisa mavulavulele ya vanhu, hikuva, hi ntumbuluko, mi vanhu lava tsaneke. Ku fana ni leswi khale a mi nyiketile swirho swa n’wina ku va mahlonga ya thyaka ni ya ku homboloka, leswaku mi endla leswo homboloka ha swona, sweswi nyiketani swirho swa n’wina ku va mahlonga ya ku lulama, leswaku mi endla leswi tengeke ha swona.” (Varhoma 6:19) Ku basa ka moya ni ku basa ka miri ku humesa mihandzu leyinene hambi ku ri sweswi, “mihandzu leyi [hi] yi tshovelaka sweswi yi [hi] yisa eku tengeni; eku heteleleni, [yi ta va] vutomi lebyi nga heriki.” (Varhoma 6:22) Hikwalaho ke, a hi baseni emianakanyweni ni le mirini loko hi ri karhi hi ‘nyiketa vutomi bya hina hinkwabyo yi va mhamba leyi hanyaka, leyi amukelekaka eka Xikwembu.’—Varhoma 12:1.
[Nhlamuselo ya le hansi]
a Ku kuma mindzinganyeto leyi tirhaka ya nsivela-mavabyi ehansi ka swiyimo swo tika, vona xihloko lexi nge “Ku Hlangavetana Ni Mphikamakaneta Ya Ku Basa,” lexi humesiweke eka Awake! ya Xinghezi ya September 22, 1988, matluka 8-11.
Tinhla To Ti Tsundzuka
◻ Mahlo ya hina ni timbilu ta hina swi nga hi dyohisa hi ndlela yihi?
◻ I mimpfuno yihi leyi Vaisrayele va yi kumeke loko va yingise milawu ya Yehova ya nsivela-mavabyi wa vanhu hinkwavo ni wa munhu hi xiyexe?
◻ Xana i misinya ya milawu yihi leyi landzeleriwaka eMakaya ya Bethele leyi faneleke ku lawula kaya ra Mukriste un’wana ni un’wana?
◻ Hi rini laha ngopfu-ngopfu hi faneleke ku tilangutela ehenhleni ka xivumbeko xa hina?
◻ I swivangelo swihi swa moya leswi malandza ya Yehova ma nga na swona swo hlayisa makaya ni mimovha ya wona swi basile ni ku hleleka?
[Xifaniso lexi nga eka tluka 17]
“Vutomi bya Bethele byi lava ku hlayisa mimpimanyeto leyi tlakukeke ya miri, mahanyelo ni ya moya”
[Xifaniso lexi nga eka tluka 18]
Xana manana u fanele a heta nkarhi wo tala siku na siku a ri karhi a basisa endzhaku ka loko swirho swa ndyangu leswi nga anakanyiki swi fambile?
[Xifaniso lexi nga eka tluka 19]
Hi khume ra timinete matshalatshala ya nga endliwa ku basisa endzeni ka movha