Dyondzo 11

Tidyondzo Ni Mikhuva Leyi Nga Xi Tsakisiki Xikwembu

Xana i tidyondzo ni mikhuva ya muxaka muni leyi hoxeke? (1)

Xana Vakreste va fanele ku pfumela leswaku Xikwembu i Vunharhu-un’we? (2)

Ha yini Vakreste va ntiyiso va nga yi tlangeli Khisimusi, Easter kumbe masiku ya ku velekiwa? (3, 4)

Xana vafi va nga va vavisa lava hanyaka? (5)

Xana Yesu u fele exihambanweni? (6)

Xana i swa nkoka wo tanihi kwihi ku tsakisa Xikwembu? (7)

1. Tidyondzo ni mikhuva yin’wana a swi hoxanga. Kambe Xikwembu a xi swi amukeli loko swi huma eka vukhongeri bya mavunwa kumbe swi lwisana ni tidyondzo ta Bibele.—Matewu 15:6.

2. Vunharhu-un’we: Xana Yehovha i Vunharhu-un’we—vanhu vanharhu eka Xikwembu xin’we? E-e! Yehovha, Tatana, i “Xikwembu xin’we xa ntiyiso.” (Yohane 17:3, NW; Marka 12:29) Yesu i N’wana wa Yena wa mativula, naswona u le hansi ka Xikwembu. (1 Vakorinto 11:3) Tatana i nkulukumba eka N’wana. (Yohane 14:28) Moya lowo kwetsima a hi munhu; i matimba ya Xikwembu lama tirhaka.—Genesa 1:2; Mintirho 2:18.

3. Khisimusi Ni Easter: Yesu a nga velekiwanga hi December 25. U velekiwe kwalomu ka October 1, enkarhini wa lembe lowu varisi a va risa mintlhambi ya vona ni vusiku. (Luka 2:8-12) Yesu a nga va lerisanga Vakreste leswaku va tlangela ku tswariwa ka yena. Ematshan’weni ya sweswo, u byele vadyondzisiwa vakwe leswaku va tsundzuka rifu rakwe. (Luka 22:19, 20) Khisimusi ni mikhuva ya rona swi huma eka vukhongeri bya khale bya mavunwa. Swi tano ni hi mikhuva ya Easter, yo tanihi ku tirhisiwa ka mandza ni mimpfundla. Vakreste vo sungula a va yi tlangelanga Khisimusi kumbe Easter, naswona Vakreste va ntiyiso namuntlha a va yi tlangeli.

4. Masiku Ya Ku Velekiwa: Swiendlakalo swimbirhi swa ku tlangela masiku ya ku velekiwa leswi ku vulavuriwaka ha swona eBibeleni swi endliwe hi vanhu lava a va nga gandzeli Yehovha. (Genesa 40:20-22; Marka 6:21, 22, 24-27) Vakreste vo sungula a va nga ma tlangeli masiku ya ku velekiwa. Mukhuva wa ku tlangela masiku ya ku velekiwa wu huma eka vukhongeri bya khale bya mavunwa. Vakreste va ntiyiso va nyikana tinyiko ni ku hungasa swin’we eminkarhini yin’wana ya lembe.

5. Ku Chava Vafi: Vafi a va koti ku endla nchumu naswona a va twi nchumu. A hi nge va pfuni, naswona a va nge hi vavisi. (Pisalema 146:4; Eklesiasta 9:5, 10) Moya-xiviri wa fa; a wu hanyi endzhaku ka rifu. (Ezekiyele 18:4) Kambe minkarhi yin’wana tintsumi leto homboloka, leti vuriwaka mademona, ti tiendla mimoya ya vafi. Mikhuva yihi na yihi leyi fambisanaka ni ku chava kumbe ku gandzela vafi yi hoxile.—Esaya 8:19.

6. Xihambano: Yesu a nga felanga exihambanweni. U fele emhandzini, kumbe nsika. Rito ra Xigriki leri hundzuluxeriweke va ku “xihambano” eTibibeleni to tala ri vula mhandzi yin’we ntsena. Mfungho wa xihambano wu huma eka vukhongeri bya khale bya mavunwa. Vakreste vo sungula a va nga xi tirhisi xihambano hambi ku ri ku xi gandzela. Hikwalaho, xana u anakanya leswaku swi ta va swi lulamile ku tirhisa xihambano loko hi gandzela?—Deteronoma 7:26; 1 Vakorinto 10:14.

7. Swi nga ha nonon’hwa ku cukumeta tin’wana ta tidyondzo ni mikhuva leyi. Maxaka ni vanghana va nga ha ringeta ku ku khorwisa leswaku u nga cinci tidyondzo ta wena. Kambe i swa nkoka ku tsakisa Xikwembu ematshan’weni yo tsakisa vanhu.—Swivuriso 29:25; Matewu 10:36, 37.

[Xifaniso lexi nga eka tluka 22]

Xikwembu a hi Vunharhu-un’we

[Xifaniso lexi nga eka tluka 23]

Khisimusi ni Easter swi huma eka vukhongeri bya khale bya mavunwa

[Xifaniso lexi nga eka tluka 23]

Ku hava xivangelo xo gandzela vafi kumbe ku va chava