Dyondzo 14

Ndlela Leyi Timbhoni Ta Yehovha Ti Hlelekeke Ha Yona

Xana Timbhoni ta Yehovha ta manguva lawa ti humelele rini? (1)

Xana minhlangano ya Timbhoni ta Yehovha yi fambisiwa njhani? (2)

Xana leswi lavaka mali swi hakeleriwa njhani? (3)

I vamani lava rhangelaka evandlheni? (4)

Hi yihi minhlangano leyikulu leyi khomiwaka lembe na lembe? (5)

Hi yihi mintirho leyi endliwaka eyindlu-nkulu ni le marhavini ya tona? (6)

1. Timbhoni ta Yehovha ta manguva lawa ti sungule hi va-1870. Eku sunguleni a ti vitaniwa Swichudeni swa Bibele. Kambe hi 1931 ti amukele vito ra Matsalwa leri nge Timbhoni ta Yehovha. (Esaya 43:10) Nhlengeletano leyi yi sungule yi ri yitsongo swinene, yi kula yi va Timbhoni ta timiliyoni, leti khomekeke hi ntirho wo chumayela ematikweni yo tlula 230.

2. Mavandlha yo tala ya Timbhoni ta Yehovha ma va ni minhlangano kanharhu hi vhiki. Wa rhambiwa leswaku u va kona eka wun’wana ni wun’wana wa minhlangano leyi. (Vaheveru 10:24, 25) Bibele hi yona xisekelo xa leswi dyondzisiwaka. Minhlangano yi pfuriwa ni ku pfariwa hi xikhongelo. Eminhlanganweni yo tala ku yimbeleriwa “tinsimu ta moya” leti kufumetaka mbilu. (Vaefesa 5:18, 19) Ku ngheniwa mahala, naswona ku hava minhlengo leyi humesiwaka.—Matewu 10:8.

3. Mavandlha yo tala ma khoma minhlangano eHolweni ya Mfumo. Leyi i miako leyi akiweke hi ndlela ya ntolovelo hi Timbhoni ta ku tirhandzela. A wu nge voni swifaniso, swihambano kumbe swilo swo fana ni sweswo eHolweni ya Mfumo. Leswi lavaka mali swi hakeleriwa hi minyikelo ya ku tirhandzela. Ku ni bokisi ra minyikelo ra lava navelaka ku nyikela.—2 Vakorinto 9:7.

4. Evandlheni rin’wana ni rin’wana, ku ni vakulu kumbe valanguteri. Va rhangela eku dyondziseni evandlheni. (1 Timotiya 3:1-7; 5:17) Va pfuniwa hi malandza ya vutirheli. (1 Timotiya 3:8-10, 12, 13) Vavanuna lava a va tlakusiwi ehenhla ka lavan’wana evandlheni. (2 Vakorinto 1:24) A va nyikiwi swithopo swo hlawuleka. (Matewu 23:8-10) A va ambali ku hambana ni van’wana. Naswona a va hakeriwi entirhweni wa vona. Vakulu va khathalela swilaveko swa moya swa vandlha hi ku tirhandzela. Va chavelela ni ku kongomisa enkarhini wa maxangu.—Yakobo 5:14-16; 1 Petro 5:2, 3.

5. Nakambe Timbhoni ta Yehovha ti khoma tinhlengeletano letikulu kumbe mintsombano lembe na lembe. Eminkarhini leyi mavandlha yo tala ma hlengeletana ndhawu yin’we leswaku ma kuma ndzetelo wo hlawuleka wa Bibele. Ku khuvuriwa ka vadyondzisiwa lavantshwa i xiphemu lexi tshamaka xi ri kona enongonokweni wa nhlengeletano kumbe ntsombano wun’wana ni wun’wana.—Matewu 3:13-17; 28:19, 20.

6. Yindlu-nkulu ya misava hinkwayo ya Timbhoni ta Yehovha yi le New York. Kona ku kumeka Huvo leyi Fumaka, ku nga ntsindza wa ntlawa wa vakulu lava nga ni ntokoto lava langutelaka mavandlha ya misava hinkwayo. Nakambe ku ni tihofisi ta marhavi leti tlulaka 100 emisaveni hinkwayo. Emarhavini lawa, vatirhi va ku tirhandzela va kandziyisa ni ku rhumela tibuku ta Bibele. Nakambe ku nyikeriwa nkongomiso eku hleleni ka ntirho wo chumayela. Ha yini u nga kunguhati ku endzela hofisi ya rhavi leri nga ekusuhi na wena?