Dyondzo 15

Ku Pfuna Van’wana Leswaku Va Endla Ku Rhandza Ka Xikwembu

Ha yini u fanele u byela van’wana hi swilo leswinene leswi u swi dyondzaka? (1)

Xana i vamani lava u nga bulaka na vona hi mahungu lamanene? (2)

Xana mahanyelo ya wena ma nga va khumba njhani van’wana? (2)

Hi rini laha u nga chumayelaka swin’we ni vandlha ra ka n’wina? (3)

1. Sweswi, se u dyondze swilo swo tala leswinene eBibeleni. Vutivi lebyi byi fanele ku ku kongomisa eku hlakuleleni ka vumunhu bya Vukreste. (Vaefesa 4:22-24) Vutivi byo tano i bya nkoka leswaku u kuma vutomi lebyi nga heriki. (Yohane 17:3) Hambiswiritano, ni van’wana va fanele ku twa mahungu lamanene leswaku na vona va ta ponisiwa. Vakreste hinkwavo va ntiyiso va fanele ku vula vumbhoni eka van’wana. I xileriso xa Xikwembu.—Varhoma 10:10; 1 Vakorinto 9:16; 1 Timotiya 4:16.

2. U nga sungula hi ku byela vanhu lava nga kusuhi na wena swilo leswi u swi dyondzaka. Byela vandyangu wa wena, vanghana, vadyondzi-kuloni ni vatirhi-kuloni. Swi endle hi tintswalo naswona u lehisa mbilu. (2 Timotiya 2:24, 25) Tsundzuka leswaku hakanyingi vanhu va languta ngopfu mahanyelo ya munhu ku tlula ndlela leyi va yingisaka ha yona leswi a swi vulaka. Hikwalaho mahanyelo ya wena lamanene ma nga ha susumetela van’wana leswaku va yingisela rungula leri u va byelaka rona.—Matewu 5:16; 1 Petro 3:1, 2, 16.

3. Hi ku famba ka nkarhi, u nga ha fanelekela ku sungula ku chumayela ni vandlha ra Timbhoni ta Yehovha ra ndhawu ya ka n’wina. Leri i goza ra nkoka enhluvukweni wa wena. (Matewu 24:14) Mawaku ntsako lowu nga vaka kona loko a wo kota ku pfuna munhu leswaku a hundzuka nandza wa Yehovha ni ku kuma vutomi lebyi nga heriki!—1 Vatesalonika 2:19, 20.